१ कोरीन्थी 5 - ल्होमीछ्ये ज्युक्केन् तो़न्न दीक्केन् १-१३ 1 खीत्रङ्गी उन छ्ये ज्युक्केङ्गी दीक्प दुक् सीगुक्। उन मी च्यीक्की रोरङ्गी आम मयम नङ्जङ्ल तीन्न दो़क्कुक् सीगुक्। हुन्दुक् झ्यीबे लेमु को़न्ज्योक् ॱस्यो़च्च्ये मीप्पे छ्यी मी घयेक्की घुङ्दु उक् मीत् युङ्गेन् बेत्। 2 हुन्दुक् झ्यीब झ्यीनी इक्, खीत् हरुङ् तम्दो़त् ॱस्यो़क्केन् सीक्केन्? बोर खीत्रङ् च्युगा झ्यीन हुन्दुक् झ्यीबे मी खीत्रङ्गी घुङ्नी तो़न्न दीत्न क, युङेत् क। 3 हुन्दो ङ सी़ल खीत्रङ्दङ् मीत्न अक्, ङे ॱसीम् दी खीत्रङ्दङ् दल सी़ल यो़प्प डस्सी झ्यीन हुन्दुक् झ्यीबे मी ढीक्ल ङे छ्येप्प को़ज्येम ठीम् च्येत् छरेन्। 4 हज्यरङ्गी चोव ज्यीन्दक् येशुगी छेन्नी खीत्रङ् घयेत्तङ् दल ङे ॱसीम् दी हुदु जोम्न खोङ्गी ॱस्यीक् लीन्न 5 हुगी मी हुगो शैतान्गी लक्ल ची ज्यक् गोगेन् बेत्। हुगी सी़ दी खरप्ल डोवल धङ् ॱनी ॱसीम् दी चोव ज्यीन्दक्की हुगी ङीङ्गी यङ्ल थर्च्ये यो़प्पल ची ज्यक् गोगेन् बेत् सीक्को़त्। 6 खीत्रङ्गी तम्दो़त् हुगो गज्ये मेम्बेत्। ढोप्ची जीबल च्युर् ॱयम्जो़त् च्यीक् ज्यप्न ॱनी, हुगो जेङ् च्युर्ल ॱसोङ्न बो़गेन् बेत्। हुगो खीत्ल ॱस्यो़च्च्ये मीप्प? 7 खीत्रङ्गी हुनी ढोप्चील ॱरीक् ज्यक्च्येमे च्युर् घङ् यो़प्प घयेत् कुरीक् छ्याबे ॱस्यी़ मत् स्यक्प, तो़ल्ल पुर्। हीनी क खीत्रङ् च्युर् मत् ज्यबे ढोप्ची जीब डस्सी ॱसम्ब युङ्गेन् बेत्। ॱनी हुन्दो थुक्ल त खीत्रङ् हुन्दुक् दीरङ् यो़क्केन् बेत्। यहुदी घयेत् छ्यीबे धी़रीम्गी छ्यो़प्पल पु गोगेन् लुक्टुक् दी ख्रीष्ट् झ्युङ बेत्। 8 हुगो झ्यीनी हज्यरङ् धी़रीम् ॱसम्न च्युर् ज्यबे ढोप्ची मत् सेदोङ्। हीगो ङेम्बे ले धङ् अयेक्पे ढङ्ल डोगेन् बेत्। च्युर् मत् ज्यबे ढोप्ची हज्यरङ् सेदोङ्। हीगो क ॱसीम् चङ्म धङ् दीम्बे लेल डोगेन् बेत्। 9 ङे खीत्रङ्ल एल्लादु छ्ये ज्युक्केन् घयेत्तङ् भीन दो़च्च्यीत् सीरे यीगी च्यीक् तङेन्। 10 जम्बुलीङ् ङो़गी मी, छ्ये ज्युक्केन्, लोप् झ्यीक्केन्, झ्यक्प ज्यक्केन्, ॱल्ह धङ् कुल छ्यक् छ्यो़प्प पुगेन् घयेत्नी भीन दो़त् सीन्न ङे ढीब मेन्। हुन्दुक् झ्यीबे मी घयेत् च्यानी भीनी जम्बुलीङ् हीनी घल डोगेन्? 11 ॱनी हुगो मेम्ब, खीत्रङ्गी घुङ्न ॱसी़ रोरङ् पी़न्ज्या हीन् सीन्न हुगी म दी छ्ये ज्युक्केन्, लोप् झ्यीक्केन्, ॱल्ह धङ् कुल छ्यक् छ्यो़प्प पुगेन्, ॱमो़म्बी़त् तोङ्गेन्, च्युक्कोङ धङ् की़न्नक्प हीन्न ॱनी, हुन्दुक् झ्यीबदङ् बोर भीन सम अक् मत् सज्यीत्। 12-13 छ्यी मी घयेत्ल ठीम् च्यो़त् गोगेङ्गी ले ङे मेम्बेत्। हुगो को़न्ज्योक्की ले बेत्। ॱनी छ्यो़ छो नङ्गी ठीम्ज्यो़त् खीत्रङ्गी च्यो़त् गोगेन् बेत्। ॱसुङ्रप्ल थो़ङ्गेन् बेत्। खीत्रङ्गी घुङ्न मी ङेम्ब ॱसु यो़दङ् हुगो तो़न्न दीच्च्यीत्। (ठीम्लु १७:७) |
© 1995 Wycliffe Bible Translators, Inc. and Nepal Bible Society
Wycliffe Bible Translators, Inc.