१ कोरीन्थी 4 - ल्होमी1 ङीत् ॱङी को़न्ज्योक्की एल्ला ॱमत् तो़म्बे खोङ्गी धो़ङ्गी ॱङीङ्बु गेन् खुर्न ॱस्यो़क्केल्ल को़बे ख्रीष्ट्की ॱयोक्पु हीम्ब मी कुरीक्की ॱसम्ज्यीत्। 2 गेन् खुर्केङ्गी ॱयोक्पु छ्यप्स्यक् च्येम्म युङ् गोगेन् बेत्। 3 ङे गोल थो़न्न च्यो़न्स्यो़त् तो़ङ्गेन् खीत्रङ्रङ् हीन्, यङ् कोलीमी ॱयोङ् ॱसुरङ् हीन्न अक्, हुगो घन्ड अक् मेम्ब ॱसम्गेन्। ङ ङरङ्गी ढीक्ल अक् च्यो़ङ्गी केच्च्य घन्ड अक् ॱमीत् ॱयेङ्। 4 ङे ॱसीम्ल ॱनोङ् घन्ड अक् मीत्। ॱनी मीत् सीन्नी ङ हुनी नुक्रङ्ल ॱनम्बर् धक्पल थो़म्ब मेन्। ङल ठीम् च्यो़क्केन् दी चोव ज्यीन्दक् यो़क्केन् बेत्। 5 चोव ज्यीन्दक् झ्यो़न् झ्यो़न् थुक्ल खीत्रङ् ॱयोङ्गी गोल थो़न्न च्यो़न्स्यो़त् ॱमत् तो़न्ज्यीत्। हुगी यङ्ल मेन्नक्ल केत्मीत्ल झ्यीब घयेत् चोव ज्यीन्दक्की मेङ्गल तो़ङ्गेन् बेत्। मी ॱसीम्बे यीक्ल यो़प्पे केच्च्य घयेत् ॱह घोवल तो़ङ्गेन् बेत्। हुनी मी रीदङ् रील ओ़बे तो़प्प को़न्ज्योक्की ॱनङ्गेन् बेत्। 6 पी़न्ज्यासो, ङ धङ् अपोल्लोस्की ढीक्की केच्च्य हीगो खीत्रङ्ल फेन्दो युङे ढीक्ल ङे ढीबेन्। ङीक्की ॱमीदेल तेन हस्सो़त् खीत्रङ्गी ॱसुङ्रप्ल मीत् डीक्पे लेमु झ्यीदुक् ॱनो़ब घोगेन् बेत्। हुनी क खीत्रङ्गी च्यीक्ले च्यीक् दम्बा झ्यीन तम्दो़त् दी ॱमीत् ॱस्यो़क्केन् बेत्। 7 खीत्रङ् नङ्जोदु च्यीक्ले च्यीक् ज्यीक्पा बेत् सीन्न खीत्ल ॱसी़ सीगुक्क? खीत्ल ॱमत् थोब दी घन्ड दी यो़प्प? खीत्रङ्ल यो़प्प हुगो नुक्रङ् थोब हीन्न ॱनी, घन्डल रङ्स्यीगी ॱसादोक्प तम्दो़त् ॱस्यो़क्केन्? 8 खीत्रङ्ल घन्डे गो़ज्येक्की तोक्प आक् मीप्प झ्युङ्दुक्। खीत्रङ् छ्युक्पुल बर्नत्तुक्। ॱनी ङीत् मीत्न अक्, खीत्रङ् उन ॱवङ् च्येम्मे ज्याबुल थो़न्दुक्। ॱनी गन्दीय ज्याबु दीलरङ् थो़न्ज्ये यो़प्प ज्युक्च्यीत्। हुनी ङीत् इत् खीत्रङ्दङ् कङ्ज्यीक्ल ॱवङ् च्योङ्ज्ये युङ्गो़ट्टो। 9 ङे ॱनो़बल ङीत् ठीक्नल घयेत् म दीरङ् ॱसो़त् गोगेङ्गी छ्येप्प फोक्नरे मी डस्सी दुक्स्योल जम्बुलीङ्गी मी धङ् तेङ् यी़गी भङ्ज्येम्ब घयेक्की तेक्मुल को़न्ज्योक्की स्यक्प हीम्ब थोङ्गुक्। 10 ख्रीष्ट्की ढीक्ल ङीत् ॱनी ॱलीम्बल ॱसोङ्। खीत्रङ्रङ् ख्रीष्ट्तङ् मत् ढेबल खेसील ॱसोङ्दुक्। ङीत् ॱनी ज्यीक्च्ये मीप्प यो़त्। खीत्रङ् ज्यीक्पोक्मल थो़न्दुक्। खीत्रङ्ल त तो़क्केन् बेत्। ङीत्ल ॱनी ॱमो़ङ्गेन् बेत्। 11 हजो़त् थुक्ल ङीत् ॱनी तोब धङ् कोम्बल दो़त् गो़ झ्युङ्। घो़ बदुक्की होक्ल दो़त् गो़ झ्युङ्। दुङ्दक् गुर् गो़ झ्युङ्। ॱलोङ्गेन् डस्सील थो़च्च्युङ्। 12 ङीत्रङ्गीरङ् ले टेत् च्येत्न झ्यीन सये से सेबेन्। मी ॱयोङ्गी ङीत्ल ॱमो़म्बी़त् तोङे यङ्ल ङीक्की हुल ॱमेल्लम् स्यी़न तीक्को़त्। मी ॱयोङ्गी ङीत्ल दुक्प अयेक्प तोङे यङ्ल ङीक्की हुगो गुको़र्त्। 13 मी ॱयोङ्गी ङीत्ल खङेन् डस्सोक् झ्यीप्पे यङ्ल ङीक्की हुल गये तम् लप्को़त्। ॱनी हजो़त् थुक्ल ङीत् म दीरङ् जम्बुलीङ्गी झोस्यो़र् धङ् ॱनोक्तुक् डस्सील झ्युङ्न यो़त्। 14 ङे तम् हीगो खीत्रङ् ङु छदु ची़च्च्येल मेम्ब, ङे झ्यम्बे भीज खीत्रङ्ल ॱलोप्च्य तो़न्ज्य झ्यीच्च्येल ढीब हीन्। 15 खीत्रङ्ल खङ्गी तीक्केन् चयेलम गज्येन् यो़ट्टो। ॱनी यो़त्न अक्, पब दी च्यीगी च्यीक्रङ् यो़क्केन् बेत्। खीत्रङ् ख्रीष्ट् येशुदङ् मत् ढेबल युङ्ज्ये दी ङे ॱस्येप्पे केच्च्य ॱनेम्बुनी झ्युङ बेत्। हुनी खीत्रङ्गी पबल ङ झ्युङ्न यो़क्केन् बेत्। 16 हीगो झ्यीनी खीत्रङ् ङे ॱमीदेल तेन दो़च्च्यीत् सीन्न ॱलोप्स ज्यक्केनो। 17 हीगी ढीक्ल चोव ज्यीन्दक्तङ् मत् ढेब, तेम्बर् यो़क्केन् ङे झ्यम्बे भु तीमोथी खीत्रङ् च्याल तोङ्गेन्। ॱनी रोगी खीत्रङ्ल हुदु ख्रीष्ट् येशुदङ् मत् ढेबल यो़प्पे ङे मीजीगी छ्यलु घयेत् दी ॱस्येत्न, हुदु खीत्रङ्ल धङ् छ्यो़ छो ॱयोङ् ॱयोङ्ल ङे ॱलोप्स ज्यब घयेत् दी ढेन्सो़ ॱलोङ्गेन् बेत्। 18 ॱनी खीत्रङ् यरीगी ङ हुदु मीत् युङ्गो़ट्टो ॱनो़ब ॱसम्न तम्दो़त् ॱस्यो़क्केन् बेत्। 19 चोव ज्यीन्दक्की थुल यो़त्न, ङ खीत्रङ् च्याल ज्योक्पु युङ्गेन्। हुनी तम्दो़प्प हुबे तम् ॱस्येप्पल मेम्ब, हुबल ॱस्यीक् यो़प्प मीप्प दील तगेन्। 20 घन्ड हीन् सीन्न को़न्ज्योक्की ज्यागक्की धो़ङ्गी चव हुगो तम्ल मेम्ब, ॱस्यीक्ल युङ्गेन् बेत्। 21 खीत्रङ् च्याल ङ युङे यङ्ल ङ पच्च्युक् खुर्न युङ्ज्ये न, न ॱम ॱयुङ्बोक्म धङ् झ्यम्बे ॱसीम् खुर्न युङ्ज्ये? घङ्गो गा युङेक्क? |
© 1995 Wycliffe Bible Translators, Inc. and Nepal Bible Society
Wycliffe Bible Translators, Inc.