१ कोरीन्थी 3 - ल्होमी1 पी़न्ज्यासो, ङे खीत्रङ्ल हुदु ॱस्यो़प्पे यङ्ल धम्बे थु यो़प्प च्येम्मे मील ॱस्येप्प डस्सी मेम्ब, ख्रीष्ट् ङो़ल गोम भीजदङ् छ्येत्मीत् कोलीमी ङो़गी ॱसीम् च्येम्मे मील ॱस्येप्प डस्सी ॱस्यो़त् गो़ ॱस्यर्च्युङ्। 2 हुगी यङ्ल खीत्रङ् ओङ्बु ॱमत् ॱलीबल गेम्बागी सज्येमे सम स ॱमत् छुबल ङे नुम टेप्पेन्। ॱनी हुन्दो ओक् खीत्रङ्गी स ॱमीत् छुगेन् बेत्। 3 खीत्रङ् कोलीमी ङो़गी ॱसीम् खुरे मीदङ् छ्येत्मीत् दुक्। खीत्रङ्गी घुङ्न सीगुक् धङ् थक्मु यो़क्केन् बेत्। हुगो झ्यीनी खीत्रङ् कोलीमी ङो़गी ॱसीम् च्येम्मे लेमु डस्सी युङ्गेन् मेम्बेक्क ॱनी? 4 खीत्रङ्गी उन च्यीक्की ङ ॱनी पावल् ङो़गी हीन् सीक्केन्, ॱनी च्यीक्की ङ ॱनी अपोल्लोस् ङो़गी हीन् सीक्को़त्न ॱनी, खीत्रङ् मी स्येम्मादङ् छ्येत्मीत् युङ्गेन् हीन्डो न ॱनी। 5 अपोल्लोस् घन्ड बेक्क? पावल् घन्ड बेक्क? ङीत् चोव ज्यीन्दक्की ॱनङे ले रीदङ् री झ्यीक्केर्रङ् हीन्। ङीत् च्येन्नी क खीत्रङ् छ्य स्योक्केल्ल झ्युङ बेत्। ङीत् हुन्दुक् झ्यीक्केन् को़न्ज्योक्की ॱयोक्पुरङ् क हीन्। 6 ङे ॱसो़न् दीरङ् क तबेन्। अपोल्लोस्की हुल छ्यु ॱलुक्प बेत्। ॱनी कीदु दी हस्सो़त् को़न्ज्योक्की ची़प्प बेत्। 7 हीगो झ्यीनी ॱसो़न् तोप्केन् ॱएन् घन्ड अक् मेम्बेत्। छ्यु ॱलुक्केन् ॱएन् घन्ड अक् मेम्बेत्। कीदु ची़क्केन् को़न्ज्योक् खोङ् चा छ्यीस्स्योल ॱनेगेन् बेत्। 8 ॱसो़न् तोप्केन् धङ् छ्यु ॱलुक्केन् दी म दी ढो़गो च्यीक्की ले बेत्। ॱनी ॱसोस्सोरङ्गी लेल पीबे ॱल ॱङीक्कर्ल थोप्केन् बेत्। 9 ङीत् ॱङी को़न्ज्योक्की ले झ्यीक्केङ्गी छ्यीट्टो हीन्। ॱनी को़न्ज्योक्की स्यीङ्ग दी धङ् खोङ्गी स्युगङ् दी खीत्रङ् बेत्। 10 को़न्ज्योक्की थुज्यी ॱनङल पीब सोबो़न् खेबोक्मे ले डस्सी ङे हुदु ॱसप्तेन् डेन्न स्यक्पेन्। ॱनी हुगी थोक्ल सो़न डोगेन् दी हस्सो़त् ॱयोङ्मा घयेत् युङ्गेन् बेत्। ॱनी हुगो ॱसु हीन्न अक्, हुल खेजो़त् झ्यीन गन्दीक्म तेन सो़ज्यीत्। 11 ङे डेन्न स्यक्पे ॱसप्तेन् दी येशु ख्रीष्ट् बेत्। ॱनी हील ॱसप्तेन् ॱयोङ्मा मी ॱसी़ इक् तीङ् ॱमीत् छुगेन् बेत्। 12 हुगी ॱसप्तेन् दीनी यल्ल मी ॱसी़ घन्दुक् झ्यीब सो़दुक्क हुगो ॱसीर् हीन्, ङु हीन्, रीम्बुर् छ्यीये दो हीन्, ॱस्यीङ् हीन्, च हीन्, ॱसोक्मक् हीन्न अक्, 13 हुगी झ्यीबे ले दी गलो़त् यो़त् दी तीङ्मागी ङीङ्गी यङ्ल क ॱह घो छुगेन् बेत्। हुगी ङीन् दी मी रीदङ् रीगी झ्यीबे ले दी गलो़त् यो़त् युङ्ज्येल मीरेक् छ्यीम्मु बर्न युङ्गेन् बेत्। 14 ॱनी मी ॱसी़ ले दी ॱमीत् छीक्प दो़क्कुक्क हुगोल ॱल थोप्केन् बेत्। 15 ॱनी यङ् मी ॱसी़ ले दी छीक् डोगुक्क हुगोल घी़न्नक् युङ्गेन् बेत्। ॱनी हुगो रोरङ् मी बरे नङ्नी ढो़न थो़म्ब डस्सी थर्केन् बेत्। 16 खीत्रङ् को़न्ज्योक् स्युसे छ्यो़गङ् धङ् खीत्रङ्गी नङ्ल को़न्ज्योक्की थु स्युन यो़प्प हीम्ब खीत्रङ्ल ॱस्यो़च्च्ये यो़ट्टो। 17 ॱनी को़न्ज्योक्की छ्यो़गङ् हुगो मी ॱसी़ मीत्तल तोङ्गुक्क हुगोल को़न्ज्योक्की लेन् च्येन हुगो ओक् मीत्तल तोङ्गेन् बेत्। घन्ड हीन् सीन्न हुगो को़न्ज्योक्ल तीम्बे छ्यो़गङ् बेत्। ॱनी हीगी छ्यो़गङ् दी क खीत्रङ् घयेत् बेत्। 18 खीत्रङ् ॱसु उक् छ्यी़ज्ये मीप्प युङ झ्यीज्यीत्। खीत्रङ्गी नङ्दु जम्बुलीङ्गी झ्यी़ल ङ खेसी हीन् ॱनो़ब ॱसम्गेन् ॱसु यो़दङ् हुल दीम्बरङ्गी झ्यी़रीक् दी थोबल हुगो ॱलीम्बल ज्युक्च्यीत्। 19 घन्ड हीन् सीन्न कोलीमीगी झ्यी़रीक् को़न्ज्योक्की ढुङ्दु धो़म्मीक्की केच्च्यल डोगेन् बेत्। हीगी ढीक्ल ॱसुङ्रप्ल थो़ङ्गेन् बेत्। झ्यी़रीक् खेबा च्येम्म घयेत् हुबे ज्यीम्गेत् ॱस्येप्पे केच्च्य दीगी हुब ॱङीङ्ल सीम्ब डस्सी को़न्ज्योक्की लक्ल थीप्केन् बेत् सीर यो़क्केन् बेत्। (अय्युब् ५:१३) 20 ॱनी हीगो ओक् थो़ङ्गेन् बेत्। झ्यी़रीक् खेबा च्येम्म घयेक्की ॱनोक्सम् तङ घयेत् घो ॱमीत् छ्यो़त् हीम्ब चोव ज्यीन्दक्ल ॱस्यो़च्च्ये युङ्गेन् बेत्। (ॱसुङ्रप्की गुल्लु ९४:११) 21 हुगो झ्यीनी ॱसी़ इक् मी ॱयोङ्गी ढीक्ल तम्दो़त् ॱमत् ॱस्यो़च्च्यीत्। घङ् यो़प्प कुरीक् खीत्रङ्गीरङ् बेत्। 22 पावल् हीन्, अपोल्लोस् हीन्, पत्रुस् हीन्, जम्बुलीङ् हीन्, छी तक्प हीन्, ॱस्यीव हीन्, धीङ्सङ्गी हीन्, नेम्बेत् ॱनाङ्गी हीन्, घन्ड हीन्न अक्, हुगो कुरीक् खीत्रङ्गीरङ् बेत्। 23 ॱनी खीत्रङ् ख्रीष्ट्की बेत्। ख्रीष्ट् को़न्ज्योक्की बेत्। |
© 1995 Wycliffe Bible Translators, Inc. and Nepal Bible Society
Wycliffe Bible Translators, Inc.