१ कोरीन्थी 2 - ल्होमी1 पी़न्ज्यासो, ङ खीत्रङ् च्याल गोम युङ्न को़न्ज्योक्की ढीक्की केच्च्य ॱस्यो़प्पे यङ्ल हुगो ङे ख खेबे तम् धङ् झ्यी़रीक्की केच्च्य ॱमत् ॱस्येत्। 2 घन्ड हीन् सीन्न ङ खीत्रङ् च्येन्दु युङे यङ्ल येशु ख्रीष्ट् धङ् खोङ् कुरुस्तु ढोङे केच्च्य मेन्द, ॱयोङ्मा घन्ड अक् ॱमीत् ॱस्यीगेन् हीन् ॱनो़ब खुर्न युङेन्। 3 ॱनी ङ हुदु योक्या, ज्यीबे ठुक् ठुक्ल ॱनेगील्ल युङ्न देप्पेन्। 4 ङे केच्च्य धङ् केच्च्य ॱस्यो़प्पे लेमु हुगो झ्यी़रीक्की तम् धङ् ख खेजो़क्की केच्च्य मेम्ब, ङे धम्बे थुगी ॱस्यीक्की केच्च्य तो़न्न ॱस्येप्पेन्। 5 हीगो खीत्रङ्गी छ्य स्यक्प दी कोलीमीगी झ्यी़रीक्की केच्च्ये लम्नी मेम्ब, को़न्ज्योक्की ॱस्यीक्की लम्नी झ्यीन युङ्ज्येल बेत्। को़न्ज्योक् ङो़गी झ्यी़रीक् ६-१६ 6 ॱनी हीन्न अक्, फी़न्सुम् छङल झ्युङे मी घयेत्लरङ् क झ्यी़रीक्की केच्च्य हीगो ॱस्यो़क्को़त्। हीगी झ्यी़रीक्की केच्च्य हीगो धी़ धीङ्सङ्गी झ्यी़ मेम्बेत्। ख भोक् डोगेन् दङ् हरीङ्गी ॱवङ् च्येम्म घयेक्की झ्यी़ इक् मेम्बेत्। 7 ङे ॱस्येप्पे को़न्ज्योक्की झ्यी़रीक्की केच्च्य हुगो एल्ला ॱमत् तो़म्ब बेत्। हुनी हज्यरङ् घयेत्ल तो़प्प युङे ढीक्ल ॱस धङ् ॱनम् छ्यादु ॱमत् ची़प्पे एल्लानीरङ् को़न्ज्योक्की थुल हुगो डेन्न यो़क्केन् बेत्। 8 हुगो धीङ्सङ्गी ॱवङ् च्येम्म घयेत् घन् दीगी इक् ॱह मत् घोव बेत्। हुबे ॱह घोव हीन्न ॱनी, तो़त्वङ् च्येम्मे चोव ज्यीन्दक् हुबे कुरुस्ल तान ॱमत् ॱसेत् यो़ट्टो। 9 हीगी ढीक्ल ॱसुङ्रप्ल ढीन यो़क्केन् बेत्। ॱसी़ ॱमीक्की इक् ॱमत् थोङ, ॱसी़ आम्ज्योक्की इक् मत् घोव, ॱसी़ ॱसीम्ल आक् ॱमत् छ्यर हुन्दुक् झ्यीब घयेत् को़न्ज्योक्की खोङ् रोरङ्ल झ्यम्ब खुर्केन् घयेत्ल ठोक्क झ्यीन स्यक्न यो़क्केन् बेत्। (यशैया ६४:४) 10 हुगो को़न्ज्योक्की हज्यरङ्ल धम्बे थुनी झ्यीन तो़म्ब बेत्। धम्बे थुगी हुगो छङ्म नम् च्येत्न को़न्ज्योक्की गोङ्बल यो़प्पे तीङ् सप्पोक्मे केच्च्य आक् ॱह घो छुगेन् बेत्। 11 मी ॱसीम्ल यो़प्पे तीङ् सप्पोक्मे केच्च्य रोरङ्गी ॱसीम्ब दीगी मेन्द, मी ॱयोङ्मागी ॱह घो ॱमीत् छुगेन् बेत्। ॱनी हीगो डस्सी को़न्ज्योक्की गोङ्बल यो़प्पे तीङ् सप्पोक्मे केच्च्य आक् खोङ् रोरङ्गी थु दीगी मेन्द, ॱयोङ्मागी ॱह घो ॱमीत् छुगेन् बेत्। 12 को़न्ज्योक्की ॱनङे ॱनङ्ज्येत् घयेत् हज्यरङ्गी ॱह घोज्ये यो़प्पल जम्बुलीङ् हीगो ङो़गी ॱसीम् मेम्ब, हज्यरङ्ल खोङ् च्येन्नी धम्बे थु थोप्न यो़क्केन् बेत्। 13 हुगो झ्यीनी ङीक्की ॱस्येप्पे केच्च्य हुगो मी ॱलबे, मी झ्यी़रीक्की केच्च्य मेन्। धम्बे थुगी ॱलप्न तो़म्बे केच्च्य हीन्। ॱनी धम्बे थु यो़प्प च्येम्म घयेत्लरङ् धम्बे थुगी धो़न् ॱस्यो़क्केन्। 14 को़न्ज्योक्की थुगी तो़म्बे केच्च्य हुगो धम्बे थु मीप्पे मी गज्ये ॱमीत् छोर्केन् बेत्। हुगी धो़म्मीक्की केच्च्य हीम्ब ॱसम्गेन् बेत्। हुन्दुक् झ्यीबे मी धो़न् दी इक् ॱह घो ॱमीत् छुगेन् बेत्। घन्ड हीन् सीन्न हुगो धम्बे थुगी झ्यीन मेन्द, ॱह घो ॱमीत् छुगेन् बेत्। 15 धम्बे थु यो़प्प च्येम्मे मी कुरीक् नम् च्यो़त् ॱस्यीगेन् बेत्। ॱनी यङ् हुगी मी हुगी ढीक्ल ॱयोङ्म ॱसी़ इक् घन्ड अक् नम् च्यो़त् ॱमीत् ॱस्यीगेन् बेत्। 16 ॱसुङ्रप्ल थो़ङ्गेन् बेत्। चोव ज्यीन्दक्की गोङ्बल तेन ॱह घो छुगेन् दी ॱसु दी यो़प्प बेक्क? खोङ्ल ॱसु दीगी ढो़ टो़त् छुगो़प्प बेक्क? (यशैया ४०:१३) ॱनी हज्यरङ्गी ॱसीम्बे ॱनोक्सम् दी ख्रीष्ट्की थुरीक्की लेमुदङ् डगेन् बेत्। |
© 1995 Wycliffe Bible Translators, Inc. and Nepal Bible Society
Wycliffe Bible Translators, Inc.