१ कोरीन्थी 15 - ल्होमीख्रीष्ट् ॱसोम्बुल लोङे केच्च्य १-११ 1 पी़न्ज्यासो, ङे एल्ला खीत्रङ्ल ॱस्येत्न टेप्पे केच्च्य ॱनेम्बु दी फीच्च्य यङ् खीत्रङ्ल ढेन्सो़ ॱलोङ्गेन्। हुगी यङ्ल खीत्रङ्गी नेन्न देप्प डस्सी हुन्दो ओक् थीरीय दो़क्को़ट्टो। 2 ङे ॱस्येप्पे केच्च्य ॱनेम्बु हुगो ॱसीम्बे यीक्ल सुङ्न स्यक्न ॱनी, हस्सो़त् खीत्रङ्ल हुगी लम्नी छी थर्व युङ्गेन् बेत्। हुगो मत् युङ्न ॱनी, खीत्रङ्गी छ्य स्यक्प दी धो़म्मीत्ल डोगेन् बेत्। 3 ङल ॱनङे ॱलोप्से धो़न् छ्यीस्स्यो दी ङे खीत्रङ्ल एल्लादु उक् ॱस्येत् छरेन्। ॱनी हुन्दो ओक् ॱस्यो़क्केन्। ॱसुङ्रप्की केच्च्यल डीक्प ख्रीष्ट् हज्यरङ् घयेक्की दीक्पे ढीक्ल ढोङ बेत्। 4 ॱसुङ्रप्की केच्च्यल डीक्प खोङ्गी कुबुर् रो बेक्सल स्यक्नी, हुनी यङ् स्यक्पु ॱसुम् ॱसोङे ङीन् दी को़न्ज्योक्की ॱसोम्बुल ॱलोङ बेत्। 5 हुनी खोङ् पत्रुस् च्याल थो़न्न ठेप्प बेत्। हुनी च्युन्नीबु दीब च्येल्ल आक् थो़न्न ठेप्प बेत्। 6 हुनी थङ् च्यीक्ल ज्यब ॱङले ॱल्हक्मागी पी़न्ज्या यो़स्सल थो़न्न ठेप्प बेत्। हुब यरी यरीरङ् ॱस्यीय बेत्। ॱनी मङा हुन्दो ओक् यो़क्केन् बेत्। 7 हुनी याकुब् च्याल आक् थो़न्न ठेप्प बेत्। हुनी ठीक्नल घयेत् दी च्येल्ल आक् थो़न्न ठेप्प बेत्। 8 हुनी तीङ्स्युक्ल कीदा ॱमत् छङल कीबे भीज डस्सी ङ च्येल्ल आक् थो़न्न ठेच्च्युङ्। 9 ठीक्नल घयेक्की छीक्नी ङ च्युङ्स्यो हीन्। को़न्ज्योक्की छ्यो़ छोल दुक्प अयेक्प तङ्न युङे मी ङल ठीक्नल सीरल अक् ओ़ब मीत्। 10 ॱनी हीन्न अक्, ङ हुन्दो घन्दुक् झ्यीबे मील झ्युङ बेक्क हुगो को़न्ज्योक्की थुज्यीगी लेगी झ्युङ बेत्। ङल खोङ्गी थुज्यी ॱनङ दी धो़म्मीत्ल ॱमत् ॱसोङ, ठीक्नल ॱयोङ्मा घयेत्ले ङे मङा कले च्येत्न युङेन्। ॱनी हुगो म दी ङे ङरङ्गी झ्यीब मेम्ब, ङे दगुल यो़क्केन् को़न्ज्योक्की थुज्यीगी जेप्पे ले बेत्। 11 ॱनी म दी ङेरङ् ॱस्येत्न टेत्, हुबेरङ् ॱस्येत्न टेत्न आक्, खीत्रङ्गी छ्य स्यक्पे केच्च्य दी हुगोरङ् बेत्। ॱस्यीनर घयेत् ॱसोम्बुल ॱलोङ्गेन् हीम्बे ढीक्ल १२-३४ 12 ख्रीष्ट् ढोङ्नी, यङ् को़न्ज्योक्की ॱसोम्बुल ॱलोङ बेत् सीन्न ङीक्की ॱस्यो़क्को़त्। ॱनी हुगो हीन्न ॱनी, खीक्की घन्दुक् झ्यीन यरीगी मी ॱस्यीन खुर घयेत् को़न्ज्योक्की ॱसोम्बुल ॱमीत् ॱलोङ्गेन् बेत् सीन्न सीर् छुगेन्? 13 ॱस्यीन खुर घयेत् को़न्ज्योक्की ॱसोम्बुल ॱमीत् ॱलोङ्गो़त्न ॱनी, ख्रीष्ट् इक् ॱसोम्बुल ॱमत् ॱलोङल डोगेन् बेत्। 14 ॱनी ख्रीष्ट् को़न्ज्योक्की ॱसोम्बुल ॱमत् ॱलोङ्न ॱनी, ङीक्की ॱस्यो़क्केङ्गी केच्च्य हीगो धो़म्मीक्की तम्ल धङ् खीत्रङ्गी छ्य स्यक्प दी इक् घो ॱमीत् छ्यो़त्ल डोगेन् बेत्। 15 ॱनी हुगो छ्युवक् मेम्ब, ख्रीष्ट् को़न्ज्योक्की ॱसोम्बुल ॱमत् ॱलोङ हीन्न ॱनी, ङीक्की ॱस्यो़क्केन् ख्रीष्ट् ॱसोम्बुल ॱलोङ बेत् सीक्केन् हीगो को़न्ज्योक्की ढीक्ल ङीक्की ॱएलमे केच्च्य ॱस्येप्पल डोगेन् बेत्। घन्ड हीन् सीन्न ॱस्यीन खुर घयेत् दीम्बरङ् ॱसोम्बुल ॱमीत् ॱलोङ्गो़त्न ॱनी, ख्रीष्ट् इक् ॱसोम्बुल ॱमत् ॱलोङ बेत्। 16 ॱस्यीनर घयेत् ॱसोम्बुल ॱमीत् ॱलोङ्गो़त्न ॱनी, ख्रीष्ट् इक् ॱसोम्बुल ॱमत् ॱलोङ बेत्। 17 को़न्ज्योक्की ख्रीष्ट् ॱसोम्बुल ॱमत् ॱलोङ हीन्न ॱनी, खीत्रङ्गी छ्य स्यक्प दी धो़म्मीक्की लेल ॱसोङ्न, खीत्रङ् हुन्दो ओक् दीक्पे ॱवङ्गी होक्लरङ् दो़त् गो़ ॱस्यर्केन् बेत्। 18 ॱनी ख्रीष्ट्तङ् मत् ढेबल ॱस्यीनर घयेत् एत् खरप्ल टप् डोगेन् बेत्। 19 ॱनी ख्रीष्ट्ल यो़प्पे हज्यरङ्गी रीगो दी हुन्दुक् झ्यीब हन्देङ्गी छी हीगी मीजीगी ढीक्लरङ् हीन्न ॱनी, मी कुरीक्ले हज्यरङ् दुक्स्योल युङ्गेन् बेत्। 20 ॱनी हुगो मेम्ब, ख्रीष्ट् ढोङ्नरनी को़न्ज्योक्की दीम्बरङ् ॱसोम्बुल ॱलोङ बेत्। ॱनी खोङ् ॱस्यीनर घयेक्की छीक्नी ॱएन्स्युक्ल ॱसोम्बुल लोङ्गेन् दी खोङ् थो़म्ब बेत्। 21 मी च्यीक्की झ्यीत् झ्यीक्की ॱस्यीव नान युङ बेत्। ॱनी हीगो डस्सी यङ् मी च्यीक्की झ्यीत् झ्यीक्की ॱस्यीनरनी यङ् ॱसोम्बुल लोङ्ज्ये यो़प्प झ्युङ बेत्। 22 आदम् ङो़गी लेमुनी मी कुरीक् ॱस्यी गो़ ॱस्यर्केल्ल झ्युङ्न यो़क्केन् बेत्। ॱनी हुगो डस्सील ख्रीष्ट् ङो़गी लेमुनी यङ् खोङ्दङ् मत् ढेबल यो़क्केन् घयेत् कुरीक् को़न्ज्योक्की ॱसोम्बुल ॱलोङ्गेन् बेत्। 23 ॱसोम्बुल ॱलोङे लेमु हीगो पङ्दी पङ्दी युङ्गेन् बेत्। ॱएन्स्युक्ल ख्रीष्ट्, हुनी खोङ् जम्बुलीङ्ल झ्यो़म्बे यङ्ल खोङ्गी छ्योगी मी घयेत् दी युङ्गेन् बेत्। 24 हुनी ॱनी स्युक् थमे धी़ दी ॱलीक्केन् बेत्। हुगी कप्ल ॱवङ् च्योङ्गेन्, ॱवङ् च्येम्म धङ् ॱस्यीक् च्येम्म घयेत् मीप्पल सो़नी ज्यागक् च्योङ्से ठी दी खोङ्गी यप् को़न्ज्योक्ल ची ज्यक्केन् बेत्। 25 ख्रीष्ट्की ड घयेत् को़न्ज्योक्की नम् ख्रीष्ट्की कङ्बे होक्ल ॱलुक्न स्योक् स्योक् थुक्ल ज्यागक् च्योङ्गेन् दी ख्रीष्ट् युङ्गेन् बेत्। 26 हुनी स्युक् थदु खोङ्गी ड तुज्येम तीङ्स्युक्म दी ॱस्यीव बेत्। 27 ॱसुङ्रप्ल थो़ङ्गेन् बेत्। खोङ्गी कङ्बे होक्ल को़न्ज्योक्की छङ्म थम्ज्येत् स्यक्न यो़क्केन् बेत्। (ॱसुङ्रप्की गुल्लु ८:६) ख्रीष्ट्की ॱवङ्गी होक्ल छङ्म थम्ज्येत् ॱलुक्न स्योक्केन् को़न्ज्योक् खोङ् रोरङ् पी़प्पे ॱयोङ्मा कुरीक् खोङ्गी होक्ल युङ्गेन् बेत्। हीगो ले ॱल्हस्सी ॱह घो छुगेन् बेत्। 28 को़न्ज्योक्की हुन्दुक् झ्यीन छङ्म थम्ज्येत् खोङ्गी ॱवङ्गी होक्तु स्यक्नी, हुनी हुन्दुक् झ्यीन स्योक्केन् को़न्ज्योक्की ॱवङ्गी होक्तु यङ् ॱरेबी़ रोरङ् अङ् स्योक्केन् बेत्। हुनी म दीरङ् छङ्म थम्ज्येत् कुरीक्की थोक्ल को़न्ज्योक् युङ्गेन् बेत्। 29 ॱस्यीनर घयेत् को़न्ज्योक्की ॱसोम्बुल ॱमीत् ॱलोङ्गो़त्न ॱनी, ॱस्यीनर घयेक्की धो़न्दु यरीगी बप्तीस्ल ॱलुक्प हुगी घन्डे फेन् दी थोगेन्? खीत्रङ् यरीगी ॱस्यीनर घयेत् ॱसोम्बुल ॱस्युली ॱमीत् ॱलोङ्गेन् बेत् सीक्केन् हुगो खुङ्देन् हीन्न ॱनी, ॱस्यीनर घयेक्की धो़ल्ल हुब घन्डल बप्तीस्ल स्युक्केन् ॱनी? 30 हुन्दुक् झ्यीन ॱसोम्बुल ॱमीत् ॱलोङ्गेन् हीन्न ॱनी, ङीस्सो ओक् घन्डे ढीक्ल नुक् झ्यीन ङीन् छेन् धी़रुक् ङीत्रङ्गी ॱरोक्ल फङ मीप्प झ्यीत् गोगेन्? 31 पी़न्ज्यासो, ङ ङीन् रीम फो़स्स्यी ॱस्यीयल थुक्च्येम ॱयेङ्गुक्। ख्रीष्ट् येशु हज्यरङ्गी चोव ज्यीन्दक्तङ् मत् ढेब खीत्रङ्गी ढीक्ल ङल यो़प्पे ङोम्ज्येत् दी खुङ्देन् हीम्ब डस्सी ङे हीगी तम् हीगो खुङ्देन् बेत्। 32 ङ एफीसस् सार्तु यो़प्पे यङ्ल रीगे ॱसीम्ज्येन्दङ् थुक्प डस्सी थुक्न युङ हुगो कोलीमी लुसे लेमु डस्सी झ्यीक्केन् हीन्न ॱनी, ङल घन्डे फेन्दो दी युङ्ज्ये? ॱनी ॱस्यीनर घयेत् ॱसोम्बुल को़न्ज्योक्की ॱमीत् ॱलोङ्गो़त्न ॱनी, ह हज्यरङ् सेदोङ्, थुङ्दोङ्। नेम्बेप्प ॱस्यी गो़दङ् घन्ड ॱस्यी सीन्न अक् डीक् डोगेन् बेत्। (यशैया २२:१३) 33 खीत्रङ् गो ॱमत् थोम्ज्यीत्। दगु गादङ् छ्य झ्यीन गारङ् युङ्गेन् बेत्। दगु आक्पादङ् छ्य झ्यीन आक्पारङ् युङ्गेन् बेत् सीन्न च्योर्केन् बेत्। 34 ॱनोक्सम् ॱलीब झ्यीन ॱसम्ल तङ्न दीक्प फोङ्ज्यीत्। उन को़न्ज्योक् ङु ॱमीत् ॱस्यीगेङ्गी मी यरी दुक्। हीगो खीत्रङ्ल ङु छदु ची़च्च्येल सीक्केन्। ॱसोम्बुल ॱलोङे लेमु धङ् सी़ ३५-५८ 35 मी च्यीक्की ॱस्यीनर घयेत् घन्दुक् झ्यीबे लेमुल को़न्ज्योक्की ॱसोम्बुल ॱलोङ्गेन्? हुनी हुल घन्दुक् झ्यीबे सी़ युङ्गेन्? सीन्न सीगो़ट्टो। 36 ॱवे ॱलीङ्गुव, रङ्गी ॱसल ॱसो़न् तप्नी ॱनी, हुगी ॱसो़न् आम दी ॱस्यीनी, हुनी हस्सो़त् ॱसम्ब कीन ॱसोम्बु युङ्गेन् बेत्। 37 गोम तबे ॱसो़न् दी हुगो ढ हीन्, घन्डरङ् हीन्न अक्, हुगो की छरे दोङ्बु दीरङ् तोप्केन् मेम्बेत्। ॱसो़न् दी तोप्केन् बेत्। 38 हुगो नुक्रङ् कीन युङ्गेन् मेम्बेत्। को़न्ज्योक्की थुल ॱमीबल ॱसो़न् ॱनग रीदङ् रील डीक्पे सी़ज्यप् री ॱनङ्न कीदु ची़क्केन् बेत्। 39 ॱस्यस्सी़ च्येम्म घयेक्की ॱस्य दी च्यीक् डस्सी मीत् युङ्गेन् बेत्। मी ॱस्य रङ्स, ॱसीम्ज्येन् घयेक्की ॱस्य रङ्स, झ्यज्युङ्म घयेक्की ॱस्य रङ्स, न घयेक्की ॱस्य रङ्स युङ्गेन् बेत्। 40 तेङ् यी़न यो़प्प घयेत्ल अक् सी़ यो़क्केन् बेत्। ॱस जम्बुलीङ्न यो़प्प घयेत्ल अक् सी़ यो़क्केन् बेत्। ॱनी तेङ् यी़न यो़प्पे सी़ल तो़प्पे पम्सो दी धङ् ॱस जम्बुलीङ्न यो़प्पे सी़ल तो़प्पे पम्सो दी रङ्स रङ्स युङ्गेन् बेत्। 41 ङीमे ओ़त् दी रङ्स, दच्च्ये ओ़त् दी रङ्स, कर्म घयेक्की ओ़त् दी रङ्स युङ्गेन् बेत्। ॱनी कर्म ॱनम्बी़ ओ़त् दी इक् रङ्स रङ्स युङ्गेन् बेत्। 42 ॱनी हुगो डस्सी दी क ॱस्यीनर घयेत् ॱसोम्बुल लोङे लेमु दी युङ्गेन् बेत्। ॱस्यी डोगेङ्गी सी़ हीगो ॱसो़न् तब डस्सी ॱस्यीनी, हुनी काबे छीरप्ल आक् ॱमीत् ॱस्यीगेङ्गी सी़ल ॱसोम्बुल लोङ्गेन् बेत्। 43 थोङ् मीप्प ॱनङ्ज्युङ् च्येम्मे सी़ हीगो ॱसो़ल्ल तप्नी, ओ़च्च्य च्येम्मे सी़ल ॱसोम्बुल लोङ्गेन् बेत्। योक्याबे सी़ हीगो ॱसो़ल्ल तप्नी, ज्यीक्पोक्मे सी़ल ॱसोम्बुल लोङ्गेन् बेत्। 44 हीगी ॱस्यस्सी़ च्येम्मे सी़ हीगो ॱसो़ल्ल तप्नी, ॱसीम्गी सी़ल ॱसोम्बुल लोङ्गेन् बेत्। ॱस्यस्सी़ च्येम्मे सी़ यो़त्न ॱनी, ॱसीम्गी सी़ दी इक् युङ्गेन् बेत्। 45 हीगी ढीक्ल ॱसुङ्रप्ल थो़ङ्गेन् बेत्। मी ॱएन्स्युक्म आदम्ल को़न्ज्योक्की उ ॱलुक्न टेत्नी, हुनी आदम् ॱउज्येल्ल झ्युङ बेत्। (छ्यारप् २:७) ॱनी तीङ्स्युक्म आदम् खोङ् ॱसोम्बुल सोगेन् थु बेत्। 46 हुगो डस्सी ॱस्यस्सी़गी सी़ एल्ला थो़न्नी, हुनी तीङ्ला क ॱसीम्गी सी़ युङ्गेन् बेत्। 47 मी ॱएन्स्युक्म दी थलल सो़न ॱसनी युङ बेत्। ॱनी मी तीङ्मा दी तेङ् यी़नी मल्ल युङ बेत्। 48 ॱसल यो़प्पे मी घयेत् ॱसनी युङे मी हुगो डस्सीरङ् यो़क्केन् बेत्। ॱनी तेङ् यी़न यो़प्पे मी घयेत् यङ् तेङ् यी़नी युङे मी हुगो डस्सीरङ् युङ्गेन् बेत्। 49 हज्यरङ् हुन्दो हीन थलल सो़बे मीदङ् डगेन् डस्सी यो़क्केन् बेत्। ॱनी तीङ्ला इगीदु तेङ् यी़नी युङे मी हुगोदङ् डगेन् युङ्गेन् बेत्। 50 पी़न्ज्यासो, ङे हीगो ॱस्येत् योङ्। ॱस्य धङ् ठक् च्येम्मे सी़ हीगोल को़न्ज्योक्की ज्यागक्की फक् थोप् ॱमीत् ॱस्यीगेन् बेत्। फु ॱमीत् तक्केन् हीगोल फु तक्केङ्गी फक् थोप् ॱमीत् ॱस्यीगेन् बेत्। 51-52 तेदे ङे खीत्रङ्ल ॱङीङ्बी़ केच्च्य च्यीक् ॱस्येत् योङ्। हज्यरङ् ॱमत् ॱस्यीय यो़प्प घयेत् दी स्युक् थम ॱलीबे यङ्गी कङ्लीङ् दी भी़प्पे यङ्ल हज्यरङ्गी सी़ हीगो म दीरङ् ॱरीप् घङ्ल ज्युर् डोगेन् बेत्। कङ्लीङ्गी केत् दी युङे यङ्ल ॱमीक् ॱरीप् झ्यीब च्यीक्ल ॱस्यीनर घयेत् काबे छीरप्ल आक् ॱमीत् ॱस्यीगेल्ल ॱसोम्बुल ॱलोङ्गेन् बेत्। हुनी हज्यरङ् ॱयोङ्म घयेत् हुगी यङ्ल ज्युर् डोगेन् बेत्। 53 फु ॱमीत् तक्केन् दी फु तक्केल्ल ज्युर्न युङ् गोगेन् बेत्। ॱस्यी डोगेन् दी काबे छीरप्ल आक् ॱमीत् ॱस्यीगेल्ल ज्युर्न युङ् गोगेन् बेत्। 54 फु ॱमीत् तक्केन् दी फु तक्केल्ल धङ् ॱस्यी डोगेन् दी ॱमीत् ॱस्यीगेल्ल ज्युर्न युङ्नी, हस्सो़त् ॱसुङ्रप्की केच्च्य हीगो डुप्केन् बेत्। ॱस्यीव हुगो फम्दु ची़त्न मीप्पल सो़ तङ बेत् सीर धङ् 55 ॱवे ॱस्यीव, खो़त् ज्यला थो़म्ब दी घन ॱनी? ॱवे ॱस्यीव, खोक्की दुङ् ॱसो़ज्येम दी घन ॱनी? सीर यो़क्केन् बेत्। (होशे १३:१४) 56 ॱस्यीवे दुङ् दी दीक्प बेत्। दीक्पल ॱस्यीक् दी छ्यो़डीम्गी लम्नी ॱङीक्केन् बेत्। 57 ॱनी हीन्ज्यङ्, हज्यरङ्गी चोव ज्यीन्दक् येशु ख्रीष्ट्की लम्नी हज्यरङ् घयेत् को़न्ज्योक्की ज्यला थो़न्दु ची़क्केन् बेत्। हीगी ढीक्ल को़न्ज्योक्ल थु छ्यी छ्यी। 58 हीगो झ्यीनी ङे झ्यम्बे पी़न्ज्यासो खीत्रङ् थीरीय योक् योक् ठी़त् ठी़त् मीप्प दो़च्च्यीत्। खीत्रङ्गी कले च्येप्पे चोव ज्यीन्दक्की ले दी घो ॱमीत् छ्यो़त्ल मीत् डोगेन् बेत्। हीगो ॱस्यो़च्च्ये झ्यीनी खीत्रङ्गी टेत् च्येत्न छीगङ् चोव ज्यीन्दक्की ले झ्यीक्कीन् झ्यीज्यीत्। |
© 1995 Wycliffe Bible Translators, Inc. and Nepal Bible Society
Wycliffe Bible Translators, Inc.