१ कोरीन्थी 13 - ल्होमी1 ङे कोलीमीगी केच्च्योक्ल लब हीन्, यङ् तेङ् यी़गी भङ्ज्येम्बे केच्च्योक्लरङ् लब हीन्न अक्, ङल झ्यम्ब मीत्न ॱनी, हुगो च्युक्मे यप्च्यल बेन्न, तीङ् सीरे केत् धङ् बुक्च्या छीयङ् छीयङ्ल दुङे केत् डस्सीरङ् बेत्। 2 ङल कलुङ् ॱस्यो़त् छुबे कबप्रङ् यो़त्, यङ् ॱङीङ्बी़ धो़न् घयेत् ॱस्यो़च्च्येरङ् यो़त्, यङ् छङ्म थम्ज्येत् ॱस्यीगेर्रङ् हीन्, यङ् लदोक्रङ् डुन पुर् छुगेङ्गी छ्य स्योक् छुगेन् यो़त्न अक्, ङल झ्यम्ब दी मीत्न ॱनी, ङ घन्ड अक् मेम्बेत्। 3 ङल यो़प्पे नोर् घयेत् कुरीक् टङ्बुल गो़न बीम्बरङ् हीन्, यङ् ङे ङरङ्गी सी़ हीगो ॱहेक्च्येल च्येबरङ् हीन्न अक्, ङल झ्यम्ब मीत्न ॱनी, ङल घन्डे फेन्दो दी युङ्गेन्? 4 झ्यम्बल ङङ्रीन् युङ्गेन् बेत्। झ्यम्बल गय युङ्गेन् बेत्। झ्यम्बल ठदोक् मीत् युङ्गेन् बेत्। झ्यम्बल ज्यीम्गेत् मीत् युङ्गेन् बेत्। झ्यम्बल ङोम्ज्येत् मीत् युङ्गेन् बेत्। 5 झ्यम्बल मत् ओ़बे ढङ् मीत् युङ्गेन् बेत्। रोरङ् रङ्मो़ मीत् झ्यीक्केन् बेत्। फोदोरोक् मीत् लङ्गेन् बेत्। इबीक् मीत् स्योक्केन् बेत्। 6 ढङ्ज्ये मीप्पे ढङ्ल गव मीत् झ्यीप्प, दीम्बे ढङ्ल गव झ्यीक्केन् बेत्। 7 गदुक् घन्ड झ्युङ्न अक्, सो़प्प खुर्केन् बेत्। गदुक् घन्ड झ्युङ्न अक्, छ्य स्योक्केन् बेत्। गदुक् घन्ड झ्युङ्न अक्, रीगो झ्यीक्केन् बेत्। गदुक् घन्ड झ्युङ्न अक्, थेक्प रीम्ब झ्यीक्केन् बेत्। 8 झ्यम्ब हुगो नम् नम्ल अक् मीत् येगेन् बेत्। ॱयोङ्मा कलुङ् ॱस्यो़क्केङ्गी लेमु हुगो ये डोगेन् बेत्। केच्च्योक् ॱमीत् च्यीक्पल तम् ॱस्यो़क्केङ्गी लेमु हुगो ओक् ये डोगेन् बेत्। ॱस्यीब च्येङ्गी तम् लप् छुगेङ्गी लेमु हुगो ओक् ये डोगेन् बेत्। 9 घन्ड हीन् सीन्न ॱस्यीब च्येङ्गी तम् हुगो हुन्दो हज्यरङ्गी छङ्डीक् ॱमीत् ॱस्यीगेन् बेत्। कलुङ्गी केच्च्य हुगो ओक् हज्यरङ्गी छङ्डीक् ॱमीत् ॱस्यीगेन् बेत्। 10 छङ्डीक् मत् युङ घङ् यो़प्प घयेत् दी फी़न्सुम् छङ युङे ॱङेस्स्यो हुगो जेङ् ये डोगेन् बेत्। 11 ङ भीज यो़प्पे कप्ल ङे भीजे तम् लबेन्। भीजे ॱनोक्सम् खुरेन्। ॱसम्ल तोङ्लु दी इक् भीजे ॱसम्ल डस्सीरङ् तङेन्। ॱनी नेस्सो यल्ल ॱलीत्नी, भीजे लुसे लेमु दी फङ्न स्यक्पेन्। 12 ॱनी हुन्दो हज्यरङ्गी ॱसेज्ये मीप्पे मीलोङ्ल तेब डस्सी थोङ्गेन् बेत्। ॱनी तीङ्ला ॱसेबोक्म म दीरङ् खप्तुक्ल ॱङो़सुम्ब थोङ्गेन् बेत्। ॱनी हुन्दो ङे ॱस्यी ओ़बे तम् छङ्म ॱमीत् ॱस्यीब यो़त्। ङे धो़ङ्गी ढीक्ल को़न्ज्योक्ल कुरीक् ॱस्यो़च्च्ये झ्युङ डस्सी तीङ्ला ङे एक् हुगो छङ्म ॱह घोन ॱस्यो़च्च्ये युङ्गेन् बेत्। 13 ॱनी छ्य स्यक्प, रीगो धङ् झ्यम्ब हीब ॱसुम् हुन्दो यो़क्केन् बेत्। ॱनी हरुङ् हीगी छीक्नी छ्यीस्स्योल झ्यम्ब हुगो ॱनेगेन् बेत्। |
© 1995 Wycliffe Bible Translators, Inc. and Nepal Bible Society
Wycliffe Bible Translators, Inc.