१ कोरीन्थी 11 - ल्होमी1 ख्रीष्ट्की ॱमीदेल ङे तेन झ्यीब डस्सी खीत्रङ्गी ङे ॱमीदेल तेन झ्यीज्यीत्। छ्यो़ छोदु ॱसुव तोबे यङ्ल ओ़बे लेमु २-१६ 2 खीत्रङ् घयेक्की ङ ढेन्न ङे खीत्रङ्ल ॱलबे केच्च्य घयेत् दील थीरीय नेन्न देप्पल ङे खीत्रङ् तो़क्केन् हीनो। 3 ॱनी हीन्न अक्, म दी हीगो ॱह घोव झ्यीज्यीत्। मी ॱसोस्सो रीदङ् रीगी गोल ख्रीष्ट् यो़क्केन् बेत्। भुमी़ गोल रोरङ्गी छ्योबु युङ्गेन् बेत्। ॱनी ख्रीष्ट्की गोल को़न्ज्योक् यो़क्केन् बेत्। 4 छ्योगो ॱसी़ स्यमुङ् घो़न्न ॱसुव तोप्कुक्क, कलुङ् ॱस्यो़क्कुक्क हुगी रोरङ्गी गोल ॱम पोप्केन् हीम्बल डोगेन् बेत्। 5 ॱनी भुमु ॱसी़ गोनक् देत्न ॱसुव तोप्कुक्क, कलुङ् ॱस्यो़क्कुक्क हुगी रोरङ्गी गोल ॱम पोप्केन् हीम्बल डोगेन् बेत्। हुगो गो ओरेक् ढेबदङ् छ्येत्मीत् ङु छये ले बेत्। 6 ॱनी भुमी़ रोरङ्गी गोल घो़ ॱमीत् कोप्को़त्न ॱनी, हुगी ट दी इक् ढे तङ्न आक् डीक्केन् बेत्। ॱनी ट ढेबल धङ् ओरेक् ढेबल ङु छस्सी युङ्गो़त्न ॱनी, हुगी रोरङ्गी गोल घो़ कोप् गोगेन् बेत्। 7 अबी छ्योगो घयेत् को़न्ज्योक्ल तो़प्प युङे ढीक्ल को़न्ज्योक्तङ् डव च्येम्म यो़क्केन् बेत्। हुगो झ्यीनी छ्योगो़ गोल घो़ कोप् मीत् गो़गेन् बेत्। ॱनी भुमु यङ् हुगो डस्सी मेम्बेत्। भुमु घयेत् छ्योगोल तो़प्प युङे ढीक्ल यो़क्केन् बेत्। 8 धङ्बु को़न्ज्योक्की भुमु च्यानी छ्योगो छ्यादु ची़प्प मेम्ब, छ्योगो च्यानी क भुमु छ्यादु ची़प्प बेत्। 9 भुमी़ ढीक्ल छ्योगो मेम्ब, छ्योगो़ ढीक्ल क भुमु को़न्ज्योक्की छ्यादु ची़प्प बेत्। 10 हुगो झ्यीनी तेङ् यी़गी भङ्ज्येम्ब घयेक्की थोङ्ज्येगी ढीक्ल भुमु रोरङ्गी छ्योबी़ ॱवङ्गी होक्तु दो़प्पल रोरङ्गी गोल घो़ कोप् गोगेन् बेत्। 11 हीन्न अक्, म दी चोव ज्यीन्दक्तङ् मत् ढेब दो़प्पल भुमुल छ्योगो़ खोज्येत् गो़गेन् बेत्। ॱनी हीगो डस्सीरङ् छ्योगोल आक् भुमी़ खोज्येत् गो़गेन् बेत्। 12 घन्ड हीन् सीन्न गोम छ्योगो च्यानी भुमु छ्यादु ची़प्प डस्सी ॱनी हुनी तीङ्ला भुमु च्यानी छ्योगो कीगेन् बेत्। ॱनी म दी छङ्म थम्ज्येत् को़न्ज्योक् च्यानी झ्युङ बेत्। 13 भुमु गोनक् देत्न को़न्ज्योक्ल ॱसुव तप्न ॱनी, हुगो डीक्कुक्कक् ॱनी? खीत्रङ्गीरङ् नम् च्येत्न तो़ज्यीत्। 14 घल अक् कोलीमी लुसे लेमुल छ्योगो ट रीङ्मु ॱसान ॱनी, हुगो ङु छये ले बेत् ॱनो़ब ॱह घो छुगेन् बेत्। 15 भुमुल यङ् ट रीङ्मु ॱसाबल पम्सो युङ्गेन् बेत्। भुमुल ट रीङ्मु हुगो भुमी़ गो तुम्ज्येल को़न्ज्योक्की ॱनङ बेत्। 16 ॱनी हीगो मेम्बेत् सीक्केङ्गी मील ङ हीगो सीक्केन्। भुमु गोनक् देत्न ॱसुव तोबे लुस ङीत् च्यान आक् मीत्। ॱनी को़न्ज्योक्की छ्यो़ छो घयेत्ल अक् मीप्प बेत्। झ्यील्लप् सये ढीक्ल १७-३४ 17 ह हीनी झ्यीब दी खीत्रङ्ल ङ ॱलोप्स ज्यक्पे यङ्ल तो़प्प मीत् झ्यीत्। खीत्रङ् छ्यो़ छोल जोम्बे लेमु हुगो खीत्रङ्ल फेम्ब मेम्ब, ॱनो़क्केल्ल ॱसोङ्दुक्। 18 खीत्रङ्ल म दी ॱएन्स्युक्ल हीगो सीक्केन्। खीत्रङ् जोम्न छ्यो़ छो छुबे यङ्ल खीत्रङ् रङ् रङ् ॱसोस्सो भीन दो़क्कुक् सीर ङे घोज्युङ्। हीगो खुङ्देन् हीङ्गो़प्पेत्। 19 ॱनी हीम्ब त खीत्रङ् मीत् रीब, रङ् रङ् ॱसोस्सो भीगेन् हुगो खीत्रङ्गी छीक्नी ॱसु ॱसु को़न्ज्योक्की ढुङ्दु धक्पा थो़न्न युङ्गुक्क हुगो ॱह घोज्येगी ढीक्ल हुन्दुक् झ्यीब युङ त युङ् गोगेन् बेत्। 20 खीत्रङ् जोम्न सेब धङ् थुङ हुगो खीत्रङ्गी ॱसीम्ल चोव ज्यीन्दक्की झ्यील्लप् सेबेन् ॱनो़गो़ट्टो। हुगो मेम्बेत्। 21 घन्ड हीन् सीन्न खीत्रङ्गी सये से दी रङ् रङ् ॱसोस्सो सरी चीनी च्यीक्तङ् च्यीक्ल ॱमीत् तगेन् बेत्। यरील तोन आक् मीप्प, यरी यङ् सी सी ॱसम्ब थुङ्गेन् बेत्। 22 खीत्ल म दी सस्स धङ् थुङ्से खीम् मीप्प ॱनी? खीत्रङ्गी हुन्दुक् झ्यीन को़न्ज्योक्की छ्यो़ छो घन्ड अक् मेम्ब हीम्बल सो़न, घन्ड अक् मीप्पे मील ङु छदु ची़क्केन् बेत्। हीगी ढीक्ल खीत्रङ्ल ङ घन्ड सीच्च्ये ब अक्? खीत्ल तो़प्प झ्यी योङ् ॱनो़गुक्क? तो़प्प त ॱस्युली मीत् झ्यीत्। 23 चोव ज्यीन्दक्की ङल ॱनङे केच्च्य हीगो ङे खीत्रङ्ल एल्लादु उक् ॱलप्न टेप्पेन्। चोव ज्यीन्दक् येशु डलक्ल तोङे गोङ् दी खोङ्गी ढोप्ची च्यीक् छ्यक्ल ॱनम्न 24 को़न्ज्योक्ल थु छ्यी पुन हुनी खोङ्गी हुगो च्यक्न हीन्दुक् ॱसुङ बेत्। हीगो खीत्रङ् घयेक्की ढीक्ल ॱनङे ङे सी़बु हीनो। हीगो ङ ढेन्सो़ युङे ढीक्ल हीन्दुक् झ्यीन झ्यीज्यीत् सीन्न ॱसुङ बेत्। 25 हुगी सम घयेत् दी से छर्नी, हुन्दुक् दीरङ् झ्यीन गोङ्ज्यङ् च्येम्मे फोप्प च्यीक् यङ् छ्यक्ल ॱनम्न खोङ्गी हीगी फोप्पे नङ्गी हीगो कगो़त् धम्स्यक् ॱसम्बे ङे ठक् बेगो। हीगो खीत्रङ्गी नम् थुङ्गो़दङ् ङ ढेन्सो़ युङे ढीक्ल हीन्दुक् झ्यीज्यीत् सीन्न ॱसुङ बेत्। 26 हीगी झ्यील्लप्की ढोप्ची सय हीगो धङ् फोप्प हुनी थुङे लेमु हुगो खीत्रङ्गी नम् झ्यीक्को़दङ् हुगो चोव ज्यीन्दक् फीच्च्य झ्यो़न् झ्यो़न् थुक्ल खोङ् ढोङे केच्च्य तो़ङ्गेन् हीम्बल डोगेन् बेत्। 27 हीगो झ्यीनी मी ॱसी़ झ्यील्लप्की ढोप्ची सगुक्क, ॱसी़ चोव ज्यीन्दक्की फोप्पनी थुङ्गुक्क हुगी हुल ओ़बे लेमु झ्यीन मत् सेन ॱनी, चोव ज्यीन्दक्की कुस्सी़ धङ् ठक्ल ॱमत् ॱसम्ब हीम्बे दीक्प झ्यीबल डोगेन् बेत्। 28 मी रोरङ्गी ॱसीम्ल ॱनोक्सम् तङ्न नम् च्येत्न हुनी क हस्सो़त् ढोप्ची हुनी से, फोप्प हुनी थुङ् झ्यीज्यीत्। 29 घन्ड हीन् सीन्न हुगो सय धङ् थुङे यङ्ल ॱसी़ हुगो चोव ज्यीन्दक्की कुस्सी़ हीम्ब ॱमत् ॱसम्बल सगुक्क हुल को़न्ज्योक्की छ्येप्प फोक्केन् बेत्। 30 हुगो झ्यीनी खीत्रङ्गी उन छी थङ्ज्ये मीप्प धङ् नगेन् गज्येन् यो़क्केन् बेत्। ॱनी गज्येन् ॱस्यीनर बेत्। 31 हज्यरङ् कुरीक्की ॱअल रोरङ्गी ॱसीम्ल ॱनोक्सम् तङ्न नम् च्येत्न झ्यीनी क, हस्सो़त् को़न्ज्योक्की छ्येप्प हुन्दुक् झ्यीब ॱमीत् को़गेन् बेत्। 32 चोव ज्यीन्दक्की हुन्दो हज्यरङ्ल छ्येप्प को़गेन् सीक्केन् हुगो स्युक्ला जम्बुलीङ्गी मी घयेत्तङ् दल ठीम् च्यो़प्पे यङ्ल हज्यरङ्ल छ्येप्प ॱमीत् फोक्च्येगी ढीक्ल छर्की च्यो़च्च्येल झ्यीक्केन् बेत्। 33 ङे पी़न्ज्यासो, हस्सो़त् ॱनी खीत्रङ् जोम्न झ्यील्लप् सये यङ्ल कुरीक् जोम्न युङ् युङ् थुक्ल मत् सय गुज्यीत्। 34 मी ॱसु ढोप्प तोबल आक् फेम्ब सज्ये ॱनो़गुक्क हुगी रोरङ्गी खीम्दु सेन युङ् गोगेन् बेत्। स्येन् खीत्रङ्ल छ्येप्प फोक्केन् बेत्। हीगो डस्सीगी क ॱयोङ्म घयेत् तीङ्ला ङ युङ्नी ॱस्येत् योङ्। |
© 1995 Wycliffe Bible Translators, Inc. and Nepal Bible Society
Wycliffe Bible Translators, Inc.