१ कोरीन्थी 10 - ल्होमीधङ्बी़ इस्राएलीगी ॱमीदे १-१३ 1 पी़न्ज्यासो, धङ्बु ङीक्की पुबु ॱमुमु घयेत्ल मोशागी ङोल घङ् झ्युङे केच्च्य घयेत् ढेम्ब ॱसो़ब झ्यीज्यीत्। हुब घयेक्की लम्बा दील ॱमुबे का लोङ्न ठीक्प बेत्। हुब कुरीक् छ्यु ज्यम्जो छ्यीम्मी़ घुङ्नी फल्ल को़न्ज्योक्की तो़म्बे लम्ल डो छुब बेत्। 2 ॱनी हीगो हुब कुरीक् मोशागी ॱवङ्गी होक्ल दो़च्च्ये यो़प्पल बप्तीस्ल स्युब डस्सील डोगेन् बेत्। 3 हुब कुरीक्की सगेङ्गी यीक् छ्यीम्मी़ से दी इक् च्यीक्प सेब बेत्। 4 ॱनी हुब कुरीक्की थुङ्गेङ्गी यीक् छ्यीम्मी़ छ्यु दी इक् च्यीक्प थुङ बेत्। हुगी छ्यु हुगो रोरङ्सोदङ् दल डोगेन् यीक् छ्यीम्मी़ ढक्नी थो़म्बे छ्यु बेत्। ॱनी हुगी ढक् दी क हस्सो़त् ख्रीष्ट् बेत्। 5 ॱनी हीन्न अक्, हुब गज्येल्ल को़न्ज्योक् थु मत् गुवल हुब घयेत् पक्क झ्यङ्दङ्दु गीरे यङ्ल ॱस्यीनी, रो घयेत् घल अक् झर्नर बेत्। 6 हुबे मीजील झ्युङे लेमु घयेत् हुगो दङ् हरीङ् हज्यरङ्ल अक् ॱमीदेल डोगेन् बेत्। हुबे झ्यीब डस्सी हज्यरङ् अङ् ॱसीम्बे धेच्च्यो ङेम्बे ॱवङ्ल तोङ्ज्ये मीत् युङ्गेन् बेत्। 7 हुब यरीगी झ्यीब डस्सी ॱल्ह धङ् कुल छ्यक् छ्यो़प्प ॱमत् पुज्यीत्। ॱसुङ्रप्ल हुबे ढीक्ल थो़ङ्गेन् बेत्। मी घयेत् देत्न से थुङ् झ्यीनी, हुनी यङ् लोङ्न ॱमुस्स्यङ् थुक्न दयम् झ्यीब बेत्। (थो़म्ब ३२:६) 8 तीङ्ला आक् हुब यरीगी दयम् झ्यीनी, ङीन् च्यीक्ल मीरङ् तोङ्डक् ङीस्स्यु चक्सुम् ॱस्यीनर बेत्। हुगो झ्यीनी हुब डस्सी हज्यरङ् छ्ये मत् ज्युदोङ्ज्यीत्। 9 हुब यरी यरीगी चोव ज्यीन्दक्ल ङङ्रीन् तज्येल छो़त् तेनी, डी़ घयेक्की तोन, हुब घयेत् ॱस्यीनर बेत्। हुगो झ्यीनी हुबे झ्यीब डस्सी हज्यरङ् मत् झ्यीदोङ्ज्यीत्। 10 हुब यरी यरीगी को़न्ज्योक्ल ख तङ्नी, तेङ् यी़नी मल्ल ॱसो़क्केङ्गी भङ्ज्येम्ब च्यीक् युङ्न हुब ॱसेत् तङ बेत्। हुगो झ्यीनी हुबे झ्यीब डस्सी हज्यरङ् मत् झ्यीदोङ्ज्यीत्। 11 हुन्दुक् झ्यीन हुबे मीजील झ्युङे लेमु घयेत् हुगो स्युक् थमे धी़ दङ् हरीङ् हज्यरङ्गी हुबे ॱमीदेल तेन, ॱलोप्च्य तो़न्ज्य युङे ढीक्ल ॱसुङ्रप्ल ढीन यो़क्केन् बेत्। 12 हुगो झ्यीनी मी ॱसी़ ङ ॱनी थीरीय दो़क्केन् हीन् ॱनो़ब ॱसम्गो़दङ् हुगो च्यङ्जो़त् झ्यीन दो़च्च्यीत्। स्येन् रङ् अङ् छ्यी़ छुगेन् बेगो। 13 दीक्पल च्युगेङ्गी छो़त्लीन् खीत्रङ्ल घन्दुक् झ्यीब युङ्गो़दङ् हुगो मी घयेत्ल युङे छो़त्लीन्जो़त् मेन्द, मीत् युङ्गेन् बेत्। को़न्ज्योक् ज्युरुव मीप्प तेम्बर् यो़क्केन् बेत्। खोङ्गी खीत्रङ्ल गुर् ॱमीत् थेक्केङ्गी छो़त्लीन् ॱमीत् तोङ्गेन् बेत्। छो़त्लीन् युङ्न ॱनी, खोङ्गी गुर् थेक्पे ॱलोप्स्यीक् ॱनङ्न यङ् हुनी थर्तु ची़क्केन् बेत्। ॱल्ह धङ् कु घयेत्नी ढेन दो़त् गोगेन् १४-३३ 14 ङे झ्यम्बे दगुसो, ॱल्ह धङ् कुल छ्यक् छ्यो़प्प पुगेङ्गी लेनी भीन दो़च्च्यीत्। 15 खीत्रङ् ॱस्यीरप् रीक्प च्येम्म घयेत्ल ङ हीगो सीक्केन्। ङे तम् ॱस्येप्प घयेत्ल नम् च्येत्न खीत्रङ्गी ॱह घोव झ्यीज्यीत्। 16 हज्यरङ्गी थु छ्यी पुन झ्यील्लप् च्येम्मे फोप्पनी थुङ्न ॱनी, ख्रीष्ट्की ठक्तङ् मत् ढेब युङ्गेन् बेत्। झ्यील्लप्की ढोप्ची हज्यरङ्गी च्यक्न सेन ॱनी, ख्रीष्ट्की कुस्सी़दङ् मत् ढेब युङ्गेन् बेत्। 17 ढोप्ची हुगो च्यीगी च्यीक् हीम्ब डस्सी हज्यरङ् अङ् गज्येन् यो़त्न अक्, सी़ च्यीक् डस्सी बेत्। घन्ड हीन् सीन्न हज्यरङ् कुरीक्की ढोप्ची च्यीगी च्यीक्नी च्यक्न गो़न सगेन् बेत्। 18 इस्राएली घयेक्की लुसल तो़ज्यीत्। छ्यो़प्प पुबे ॱस्य सगेन् छ्यो़प्पो़न् घयेत् दी छ्यो़प्प स्यागी स्यीगेन् दीदङ् मत् ढेब युङ्गेन् बेत्। 19 ङे सीक्केन् हीगी धो़न् हीगो घन्ड बेक्क ॱनी? ॱल्ह धङ् कु हुगो दीम्बरङ् बेत् सीक्केन् बक् ॱनो़ज्युङ? ॱनी हुल छ्यो़प्पल पुबे ॱस्य हुगो चा छ्यीस्सी बेत् सीक्केन् बक् ॱनो़ज्युङ? 20 मेम्बेत् हीगो। को़न्ज्योक् ॱस्यो़च्च्ये मीप्पे छ्यी मी घयेक्की छ्यो़प्प पुगेन् हुगो को़न्ज्योक्ल मेम्ब, ॱनो़प्प अयेक्प घयेत्ल पुगेन् बेत्। ॱनी खीत्रङ् ॱनो़प्प अयेक्प हुगोदङ् दल रीज्ये मीप्पे ढीक्ल हीगो सीक्को़त्। 21 चोव ज्यीन्दक्की फोप्पनी इक् थुङ्गेन्, ॱनो़प्प अयेक्प घयेक्की फोप्पनी इक् थुङ्गेन् हुन्दुक् झ्यीब युङ् ॱमीत् ॱस्यीगेन् बेत्। चोव ज्यीन्दक्की झ्यील्लप्की ढोप्ची सये यङ्ल हुगो ओक् सगेन्, यङ् ॱनो़प्प अयेक्प घयेत्ल छ्यो़प्पल पुबे सम अक् सगेन् हुन्दुक् झ्यीब युङ् ॱमीत् ॱस्यीगेन् बेत्। 22 चोव ज्यीन्दक्ल सीगुक् लङ्दु ची़च्च्येल हज्यरङ्गी हुन्दुक् झ्यीक्को़त् न ॱनी। खोङ्ले हज्यरङ् ज्यीक्पा बेक्क ॱनी? 23 खीत्रङ् यरीगी घन्ड झ्यीन अक् डीक्केन् बेत् सीगुक्। ॱनी हीन्न अक्, हुगो कुरीक्की फेन् ॱमीत् थोगेन् बेत्। हीगो डस्सी घन्ड झ्यीन अक् डीक्केन् बेत् त सीगुक्। ॱनी हीन्न अक्, म दी हुगो कुरीक्नी ॱलोप्स्यीक् ॱमीत् ॱङीक्केन् बेत्। 24 खीत्रङ् ॱसी़ इक् रङ्गी धो़ल्ल फेन्दो युङे लेमु छ्युवक् मेम्ब, ॱयोङ्गी ढीक्ल अक् त गोगेन् बेत्। 25 ॱस्य चोङ्सनी ॱस्य नोये यङ्ल यो़च्चो़त् मीच्चो़त्ल ङोम्बे ॱस्य हीम्ब न? ॱनो़न तम् मत् ढीय, स्युङ्ज्योङ् नो़न सेन अक् डीक्केन् बेत्। 26 घन्ड हीन् सीन्न जम्बुलीङ् हीगो धङ् हीन घङ् यो़प्प घयेत् हीगो चोव ज्यीन्दक्की कुरीक् बेत्। (ॱसुङ्रप्की गुल्लु २४:१) 27 छ्य मीत् स्योक्केन् छ्यी मी डो़ल्ल भो़बल रङ् फीन्न ॱनी, रङ्गी दोङ्दु घङ् डीक्पे सम घयेत् दी यो़च्चो़त् मीच्चो़त्ल ङोम्ब हीम्ब न? ॱनो़न तम् मत् ढीय, नुक्रङ् सेन अक् डीक्केन् बेत्। 28 ॱनी यङ् मी ॱसी़ रङ्ल हुगो ॱल्ह धङ् कुल पुबे सम बेत् सीगुक्क ॱनी हुगो सीक्केन् दील फेम्ब धङ् ॱसीम्ल ॱनोङ् मीत् युङे ढीक्ल मत् सज्यीत्। 29 हुगी ॱनोङ् हुगो रङ्ल मेम्ब, हुगी ॱसीम्ल युङ्गेन् बेत्। ङे त सेन अक् डीक्केन् बेत् ॱनो़गुक्। ॱनी सङ् ङेन् च्यो़त् ॱमीत् ॱस्यीगेन् हुगी ङल घन्डल थङ्गक् झ्यीक्केन् बेक्क? 30 को़न्ज्योक्ल ङे थु छ्यी पुन सेबे समे ढीक्ल ङल हुगी घन्डल ख तोङ्गेन् बेक्क? 31 हुगो झ्यीनी खीत्रङ्गी घन्डरङ् से, घन्डरङ् थुङ्, ॱयोङ्म घन्डरङ् झ्यीत् गो़ झ्युङ्न अक्, हुगी लम्नी को़न्ज्योक्ल तो़प्प युङे लेमु झ्यीज्यीत्। 32 यहुदीरङ् हीन्, ज्यी़त् ॱयोङ्गी मीरङ् हीन्, को़न्ज्योक्की छ्यो़ छोरङ् हीन्न अक्, हुल च्यो़न् युङे लेमु मत् झ्यीज्यीत्। 33 हुगो डस्सी ङे एक् घन्ड झ्यीत् गो़ झ्युङ्न अक्, मी कुरीक् गुदु ची़त् छुब झ्यीक्को़त्। ङे ङरङ्गी ढीक्ल मेम्ब, ॱयोङ्मा गज्येन् थर्च्ये यो़प्पल हुबल फेम्बे लेमु झ्यीत् छुब झ्यीक्को़त्। |
© 1995 Wycliffe Bible Translators, Inc. and Nepal Bible Society
Wycliffe Bible Translators, Inc.