१ कोरीन्थी 1 - ल्होमी1 को़न्ज्योक्की थुल यो़प्पल ख्रीष्ट् येशुगी ठीक्नलल भो़बे ङ पावल् धङ् हज्यरङ्गी पी़न्ज्या सोस्थेनेस्की हीगी यीगी हीगो ढीन तोङ्गो़त्। 2 हीगो कोरीन्थ् सार्न यो़क्केन् ख्रीष्ट् येशुदङ् मत् ढेबल धक्पर् हीम्बल सो़न को़न्ज्योक्की मी चङ्म युङल भो़बे खोङ्गी छ्यो़ छोल धङ् हज्यरङ्गी चोव ज्यीन्दक्की छेन् डेन् ज्यक्केन् घयेत् ॱसने घन यो़त्न अक्, हज्यरङ् चोव ज्यीन्दक् च्यीक्की मी घयेत्ल ढीब हीन्। 3 खीत्रङ् घयेत्ल हज्यरङ्गी यप् को़न्ज्योक् धङ् चोव ज्यीन्दक् येशु ख्रीष्ट् च्यानी थुज्यी धङ् ॱसीम् दीव युङ्ज्ये यो़प्प तोङ्। 4 ख्रीष्ट् येशुगी लम्नी खीत्रङ्ल को़न्ज्योक्की थुज्यी ॱनङ्न यो़क्केन् झ्यीनी, ङे छीगङ् खीत्रङ् घयेक्की ढीक्ल को़न्ज्योक्ल थु छ्यी पु पुब झ्यीक्को़त्। 5 ख्रीष्ट् येशुदङ् मत् ढेबल यो़क्केन् खीत्रङ् घयेत्ल नोर्तङ् छ्येत्मीत् छङ्म थम्ज्येत् थोप्नी, तम् खेसी ॱस्यो़त् ॱस्यीगेन् धङ् धो़न् कुरीक् ॱह घोगेल्ल झ्युङ्दुक्। 6 ख्रीष्ट्की ढीक्की केच्च्य ङीक्की खीत्रङ्ल ॱस्यो़प्पे यङ्ल को़न्ज्योक्की खीत्रङ्ल हुगो ॱङो़न्ने हीम्ब ॱह घोदु ची़प्प बेत्। 7 हुगो झ्यीनी चोव ज्यीन्दक् येशु ख्रीष्ट् इगीनी मल्ल कुरीक्की थोङ्सल झ्यो़म्बल खीत्रङ् गुक्कीन् दो़क्केन् बेत्। एल्लादु खीत्रङ्ल थुज्यीगी कबप् छङ्म थोप्न यो़क्केन् झ्यीनी, ह घन्डे कबप्की गो़ज्येक्की तोक्प आक् मीत् युङ्गेन् बेत्। 8 हज्यरङ्गी चोव ज्यीन्दक् येशु ख्रीष्ट्की ङीङ्गी यङ्ल ङीबे च्यो़न् मीप्प थो़न् छुबल खोङ्गी खीत्रङ् घयेत् स्युक् थमे धी़ थुक्ल तेम्बोक्म दो़त् छुगेल्ल सोगेन् बेत्। 9 खोङ्गी ॱरेबु हज्यरङ्गी चोव ज्यीन्दक् येशु ख्रीष्ट्तङ् खीत्रङ् कङ्ज्यीक्प युङ्ज्येल भो़क्केन् को़न्ज्योक् ज्युरुव मीप्प, तेम्बर् यो़क्केन् बेत्। छ्यो़ छो थोर्च्ये मीत् युङ्गेन् १०-१७ 10 पी़न्ज्यासो, चोव ज्यीन्दक् येशु ख्रीष्ट्की छेन्नी खीत्रङ्ल ङ ॱलोप्स हीगो ज्यक्केनो। खीत्रङ् नङ्दु रङ् रङ् ॱसोस्सो मत् भीय, छ्यम्न ढो़गो च्यीक्ल डीक्न जन्दीक्म झ्यीन दो़च्च्यीत्। 11 ङे पी़न्ज्यासो, खीत्रङ् उन थक्मु ज्यक्री चीगुक् सीर ङल कलोएगी मीजङ् च्यीक्की ॱस्येच्च्युङ्। 12 खीत्रङ् उन यरीगी ङ ॱनी पावल् ङो़गी हीन् सीगुक्, यङ् यरीगी ङ ॱनी अपोल्लोस् ङो़गी हीन् सीगुक्, यरीगी यङ् ङ ॱनी पत्रुस् ङो़गी हीन् सीगुक्, ॱनी यङ् यरीगी ङ ॱनी ख्रीष्ट् ङो़गी हीन् सीगुक् सीर ङे ॱह घोज्युङ्। 13 ख्रीष्ट् गो गज्येल्ल गो़न यो़क्केन् बेक्क ॱनी? खीत्रङ्गी धो़ल्ल कुरुस्तु ढोङ्गेन् दी पावल् बेक्क ॱनी? खीत् बप्तीस् दील पावल्की मीङ्नी ॱलुक्च्युङ ॱनी? 14 ङे म दीरङ् हुदु क्रीस्पस् धङ् गायस् मेन्द, ॱयोङ्मा ॱसु उक् बप्तीस्ल ॱमत् ॱलुक्। हीगी ढीक्ल को़न्ज्योक्ल थु छ्यी छ्यी। 15 हुगो झ्यीनी खीत्रङ् ॱसी़ इक् ङ पावल्की मीङ्नी बप्तीस्ल स्युबेन् सीन्न सीर् ॱमीत् छुगेन् बेत्। 16 ङे दीम्बरङ् हुदु इस्तीफनास्की खीम्गी मीजङ् घयेत् एत् बप्तीस्ल ॱलुक्पेन्। ॱनी ॱयोङ्मा ॱलुक्पे ढेन्सो़ ङल मीन्दुक्। 17 ॱनी ख्रीष्ट्की ङ म दी मी घयेत् बप्तीस्ल ॱलुक्तु तङ मेम्ब, केच्च्य ॱनेम्बु ॱस्यो़त्तु तङ्ज्युङ्। हीगो ङे रीक्च्यी़ खे ढाबे तम् ॱस्यो़क्केन् मेन्। स्येन् ख्रीष्ट्की कुरुस् हुगो घो ॱमीत् छ्यो़त्ल डोगेन् बेत्। ख्रीष्ट् को़न्ज्योक्की ॱनङे झ्यी़रीक् १८-३१ 18 कुरुस्की ढीक्की केच्च्य हीगो खरप्ल डोगेन् घयेक्की धो़म्मीक्की केच्च्य हीम्ब ॱसम्गेन् बेत्। हज्यरङ् थर्वे लम्ल डोगेन् घयेत्ल हीगो को़न्ज्योक्की ॱनङे ॱस्यीक्ल डोगेन् बेत्। 19 हीगी ढीक्ल ॱसुङ्रप्ल को़न्ज्योक्की ॱसुङ थो़ङ्गेन् बेत्। रीक्च्यी़ खेबा च्येम्म घयेक्की झ्यी़रीक् रीक्प दी ङ मीत्तल तोङ्गेन्। ॱस्यीरप् रीक्प च्येम्म घयेक्की ॱस्यीरप् दी ङ घो ॱमीत् छ्यो़त्ल सोगेन्। (यशैया २९:१४) 20 ह रीक्च्यी़ खेबा घयेत् घन ॱनी? छ्यो़डीम्गी चयेलम घयेत् घन ॱनी? धीङ्सङ् केच्च्य थुक्री चीगेन् खेबा च्येम्म घयेत् घन ॱनी? जम्बुलीङ् हीगी झ्यी़रीक् हीगो को़न्ज्योक्की घो ॱमीत् छ्यो़त्ल सो़ तङ बेत्। 21 जम्बुलीङ्गी मी घयेक्की रोरङ्सो़ रीक्च्यी़गी को़न्ज्योक् ङु ॱमत् ॱस्यीब बेत्। ॱनी धो़म्मीक्की केच्च्य हीन्दोक्प हीगो ॱस्येप्पल छ्य स्योक्केन् घयेत्रङ् खोङ्गी छी थर्वल तो़ङ्गेन् बेत्। हीगो को़न्ज्योक् थु गुव धङ् खोङ्गी झ्यी़रीक्की ले बेत्। 22 यहुदी घयेक्की यीक् छ्यीम्मी़ लेगी ता तो़ल्लेत् सीक्केन् बेत्। ग्रीक्की मी घयेक्की झ्यी़रीक्की केच्च्य ॱयेङ्गेन् बेत्। 23 ॱनी ङीक्की ॱनी ख्रीष्ट् कुरुस्तु ढोङे केच्च्य ॱस्यो़क्को़त्। हीगो यहुदी घयेत्ल ॱनत्त दुगेन् बेत्। ज्यी़त् ॱयोङ् ॱयोङ्गी मी घयेत्ल यङ् धो़म्मीक्की केच्च्यल डोगेन् बेत्। 24 ॱनी को़न्ज्योक्की भो़बे मी दी यहुदीरङ् हीन्, ग्रीक्की मीरङ् हीन्न अक्, हुल कुरुस्तु ढोङे ख्रीष्ट् को़न्ज्योक्की ॱनङे ॱस्यीक् धङ् झ्यी़रीक् हीम्बल युङ्गेन् बेत्। 25 कोलीमीगी झ्यी़रीक्ले को़न्ज्योक्की धो़म्मीक्की केच्च्य हीन्दोक्प हुगो झ्यी़ खेबा युङ्गेन् बेत्। को़न्ज्योक्ल ॱस्यीक् योक्या यो़त्तोक्प हुगो कोलीमीगी ॱस्यीक्ले गज्येङ्गी ज्यीक्पा यो़क्केन् बेत्। 26 पी़न्ज्यासो, खीत्रङ् को़न्ज्योक्की भो़बे कप्ल खीत्रङ्गी मीजी दी घन्दुक् झ्यीब यो़प्प बेक्क हुल तो़। कोलीमीगी तेबल खीत्रङ्गी छीक्न हुगी यङ्ल झ्यी़रीक् च्येम्म, मी छ्यीया धङ् मी ढक्पा गक् मीप्प बेत्। 27 ॱनी हीन्न अक्, हीगी झ्यी़रीक् च्येम्म घयेत्ल ङु छदु ची़च्च्येल को़न्ज्योक्की जम्बुलीङ्दु मी घो ॱमीत् छ्यो़त् हीन्दोक्प घयेत् दम्ब बेत्। ॱनी मी ज्यीक्पा घयेत्ल ङु छदु ची़च्च्येल को़न्ज्योक्की जम्बुलीङ्नी ज्यीक्च्ये मीप्प च्येम्म घयेत् दम्ब बेत्। 28-29 को़न्ज्योक्की ढुङ्दु मी ॱसी़ इक् तम्दो़त् ॱस्यो़त् छुज्ये मीप्पल धङ् ज्यीक्पा घयेत् मीप्पल सोज्येल खोङ्गी जम्बुलीङ्गी ज्यी़त् च्युङा, थोङ् मीप्पे मी धङ् घन्डे दल अक् ॱमीत् ॱसम्गेन् घयेत् दम्ब बेत्। 30 ॱनी खीत्रङ् ख्रीष्ट् येशुदङ् मत् ढेबल स्योक्केन् दी को़न्ज्योक् बेत्। खोङ्गी हज्यरङ्गी झ्यी़रीक्ल ख्रीष्ट् ॱनङ बेत्। ॱनी हज्यरङ् ॱनम्बर् धक्पल तो़ङ्गेन्, धक्पर् हीम्बल सोगेन् धङ् दीक्पनी ॱलुगेन् दी इक् ख्रीष्ट् बेत्। 31 ॱसुङ्रप्ल थो़ङ्गेन् बेत्। मी ॱसी़ तम्दो़त् ॱस्यो़क्कुक्क हुगी चोव ज्यीन्दक्की धो़न्दु ॱस्यो़च्च्यीत् सीर यो़क्केन् बेत्। (यर्मीया ९:२४) |
© 1995 Wycliffe Bible Translators, Inc. and Nepal Bible Society
Wycliffe Bible Translators, Inc.