Забур 91 - Пак Калам

Аллагьдиз шукур авуни шадвал гъун

¹ Киш йикъан сувар къейд авунин мани.

² Им шадвал я – шукур авун Реббидиз, тариф авун тӀварцӀин Ви, Виридалай виневайди,

³ экуьнахъ Ви регьимдикай ван алаз лугьун, нянихъни Вахъ далу акализ хьуникай лугьун,

⁴ цӀуд сим алай алат ягъиз ва аваз гвай кинур ягъиз.

⁵ Вучиз лагьайтӀа, я Ребби, краралди Вуна Жуван шад авуна зун, Ви гъилерин крарал за шадвилелди ийизва чӀехи хвешивал.

⁶ Ребби, вуч зурба я крар Ви, вуч дерин я фикирар Ви!

⁷ Ахмакьдаз чизвач, акьазвач авамни абурун гъавурда.

⁸ Векь хьиз, экъечӀнавайтӀани небгетар, жезватӀани авадан небгетар, абур квахьда даим яз.

⁹ Хкажнава Вун, Ребби, даим яз.

¹⁰ Ингье, рекьида Ви душманар, Ребби, ингье, гила мад рекьида, небгетар вирибур чукӀурда.

¹¹ Вуна заз къуват гана чӀурун жунгавдиз авай кьван, таза чӀем гуьцӀна завай зейтундин, Живанди авуна.

¹² Зи вилериз акуна магълубвал зи душманрин, зи япариз ван хьана абур ярх жедайвал, заз акси яз къарагъайбур.

¹³ Гьахъ-михьида цуьк ахъайзава, хурмадин тарци хьиз, хкаж жезва, муьтквер хьиз Либандин.

¹⁴ Реббидин КӀвале цанвайбуру чи Аллагьдин гъенера цуьк ахъайда.

¹⁵ Кьуьзуь чӀавузни жеда абур миже кваз, таза яз, майва гъиз,

¹⁶ Я Ребби, Зи Хиласвилин къеле, дуьз тирдакай хабар гун паталди.