Забур 90 - Пак Калам

Аллагьдин къаюмвилик хьун

1 Виридалай Виневайдан къаюмвилик уьмуьр тухузвайди.

¹ Виридалай Виневайдан къаюмвилик уьмуьр тухузвайди. Вири Алакьдайдан хъендик ква.

² За лугьуда Реббидиз: «Вун зи далда, къеле я, зун Вичихъ агъанвай Аллагь зи».

³ Азад ийида Ада гъуьрчехъандин чилиникай, ажал гъидай тӀегъуьндикай.

⁴ Ада Вичин цӀакулралди кӀевда вун, Адан луварин далдадик жеда вун. Адан гьакъикъат къалхан ва жугъун я ваз.

⁵ КичӀе жедач я йифен къурхуйрикайни, я юкъуз лув гузвай хьелекайни,

⁶ я мичӀе къекъвезвай тӀегъуьндикайни, я азардикай, чан къачудай нисин береда.

⁷ Агъзур рекьида, ви патав ярх жеда цӀуд агъзур ви эрчӀи къвалавай, амма вав агатдач.

⁸ Аквада жуван вилералди небгетриз хъувур кьисас.

⁹ «Ребби Зи умуд я». Виридалай Виневайди на хкяна далда яз.

¹⁰ Вав писвал агатдач, азарни ви кӀвалив агатдач.

¹¹ Вучиз лагьайтӀа Вичин малаикриз вун хуьн эмирда ви вири рекьера.

¹² Абуру вун гъилераллаз тухуда, ви кӀвачер къванцихъ галкӀун тавун паталди.

¹³ Асландал, гъуьлягъдал кӀвач илисда, кӀур гуда вуна жегьил асландиз ва гъуьлягъдиз.

¹⁴ Реббиди лугьузва: «РикӀивай Зун кӀанзавайвиляй хуьда ам, Зи тӀвар чирвиляй хуьда ам.

¹⁵ Жаваб гуда За адан эвердиз: бедбахтвиле адахъ галаз санал жеда, азадда ам, машгьурда,

¹⁶ тухарда яргъи уьмуьрдалди ам, За къалурда адаз хиласвал».