Забур 9 - Пак Калам

Аллагьди небгетар телеф авун, умунбур хилас авун

¹ Манидаррин чӀехидаз. «Хцин кьиникь» манидин макьам ягъиз. Давудан мани.

² Заз вири рикӀелди Реббидиз шукур ийиз кӀанзава, за суьгьбетда Адан вири аламатрикай.

³ За шадвалда, хвешивилер ийида Ви хатурдай, за манийра тариф ийида тӀварцӀин Ви, виридалай Виневайди.

⁴ Зи душманар катна кьулухъ, татаб хьана абур вилик Ви ва телеф хьана.

⁵ Вуна зи пад кьуна гьахъ гьуьжетда, авун патал гьахъ дуван Вун тахтуна ацукьна.

⁶ Вуна халкьариз ахмур авуна. Небгетар телефна, абурун тӀварар даим яз тахьай мисал авуна.

⁷ Даим яз кьиникь гана душмандиз, адан шегьерар чукӀурна Вуна, квахьна адахъ галаз санал ам рикӀел гъидай гьар са лишанни.

⁸ Амма Ребби амукьда датӀана, гьахъ дуван патал Ада Вичин тахт хкажнава.

⁹ Ада гьахъ гваз ийида дуьньядин дуван, адалат гваз агъавалда халкьарал.

¹⁰ Ребби я катдай чка зулуматдик квайбуруз, мягькем къеле я къал-къил авай береда.

¹¹ Кутада Вак умудар чирбуру Ви тӀвар, куьз лагьайтӀа Вуна, Ребби, гадардач Вахъ къекъвезвайбур.

¹² Манийралди тариф ая Реббидин, Сигьандал уьмуьр тухузвай, хабар це Адан крарикай халкьариз!

¹³ Ивидин эвездай гуналди жаза, Ада рикӀел хуьзва куьмек галачирбур, абурун цӀугъ алудзавач рикӀелай.

¹⁴ Я Ребби, килиг зун гьикӀ дарда тунватӀа душманри, регьим ая, яргъа ая зун ажалдин вараривай,

¹⁵ за Ви вири тарифар авун паталди Сигьандин варарив, шадвал ийиз Вуна хилас авунал.

¹⁶ Чпи эгъвей фуруз халкьар аватна, чпи чинеба хвейи чилина кӀвачер гьатна абурун.

¹⁷ Ачухдаказ малум хьана Ребби тирди Адалат гвай дуванбег: небгетар чпи авур крарин желеда гьатна. Макьамдин ара

¹⁸ Агъа дуьньядиз небгетар аватда – Аллагь рикӀелай алуднавай вири халкьар.

¹⁹ Амма саил даим яз фидач рикӀелай, азаб гудайдан умудар даим яз рекьидач.

²⁰ Я Ребби, къарагъ! Инсан акьван винизмир! Халкьарин дуван Ви вилик авурай.

²¹ Я Ребби, абуруз хаф ягъа чир хьуй абуруз чеб тек са инсанар тирди. Макьамдин ара

²² Вуч паталди, я Ребби, акъвазнава яргъа Вун, чуьнуьхзава Жув хажалатдин вахтунда?

²³ Небгетри, лавгъавилив ацӀанваз, язух кесибар кутунва хурук, – ахьтинди вич гьатрай вичин хьтин уюнра.

²⁴ Небгетри чпин къудурвилерал кьуру дамах ийизва, регьятдаказ къазанжидихъ къанихбуру лянет гъизва, экъуьгъзава Реббидиз.

²⁵ Чпив гъукь гвай небгетар къекъвезвач Адахъ, фикиррани чка авач Аллагьдиз.

²⁶ Агалкьунар авайбур я датӀана абурун крар. Абурув гъукь гва, амма Ви дуванар абурукай яргъа я, абур чпин килигзава душманриз кваз такьадай тегьерда,

²⁷ лугьузва чпиз абуру: «Чна ян гудач! Са чӀавузни чи кьилел бедбахтвал къведач».

²⁸ Абурун сивер ацӀанва къаргъишрайни, гьиллейрайни, тапаррай, абурун мецерин кӀанерик ква алцурвал, небгетвилер.

²⁹ Абуру хуьрерин патав эцигзава желеяр; къурбанддал чинеба вилер алаз, тахсир квачирбур хелвет чкайра ягъиз рекьизва;

³⁰ Магъарада асланди хьиз, абуру вилив хуьзва, желеда кьун паталди зайифбур; желб ийиз кьазва чпин чилина.

³¹ Гуж авайди чинеба къат жезва, алгъизва, зайифди гьатзава къармахра, ярх жезва.

³² Абуру чпи чпиз лугьузва: «Аллагьдин алатнава рикӀелай, Ада чин гузвач, аквадач Адаз садрани».

³³ Я Ребби, къарагъ! Хкажа Ви гъил, я Аллагь! Зайифбур алуд мийир рикӀелай!

³⁴ Вучиз Вуна небгетрив хкуьриз тазва намусдик Ви? Куьз абурув фикириз тазва: «Чавай Ада хабар кьадач», – лагьана?

³⁵ Аквазва Ваз хажалатар, тӀарвилер, гьазур я Вун Жуван гъилив эвез хгуз абурун. Азаб чӀугвазвайбуру чеб ийида Вал ихтибар, Вун етимрин я куьмекдар.

³⁶ Азиятар гузвайданни небгетдин гъилер хух, жаваб гуз це гьардав вичин тахсирдин, мад адак тахсир кутаз тежервал.

³⁷ Ребби Пачагь я асирра, датӀана, Адан уьлкведа маса халкьар тахьай мисал жеда.

³⁸ Я Ребби, Вуна язухбурун мурадрихъ яб акалзава, абурук руьгь кутазва, абурун ван жезва.

³⁹ Хуьда Вуна етим ва дарда авайди, абурук мад инсанди кичӀевал кутун тавун паталди.