Забур 89 - Пак Калам

КЬУД ЛАГЬАЙ КТАБ ( 89–105 -кьилер) Аллагь даим я – инсандихъ кьиникь гала

¹ Аллагьдин инсан тир Мусадин дуьа.

² Агъа, Вун чи далда я несилдилай несилдалди!

³ Дагълар арадал къведалди, Вуна чилни алем халкь ийидалди, даимвилелай даимвилелди кьван Аллагь Вун я.

⁴ Инсан вуна руг хьунал хкизва, лугьузва адаз: «Элкъуьгъ руквадиз, инсандин рухваяр».

⁵ Вун патал агъзур йис, накьан югъ хьиз я, акуна-такуна алатай.

⁶ Акьалтнавай ци хьиз абур тухузва, абур ахвар хьиз физва алатна, абур векь хьиз я, экъечӀзавай экуьнахъ. Пакаман кьиляй цуькзава ада, къацу жезва ам, нянихъ шуьткьвена кьуразва ам.

⁷ Чун квахьзава Ви хъилекди, Ви гъазабдик кутазва велвела.

⁸ Чна авур чӀуру крар Жуван вилик эцигна Вуна чи чинебан гунагьарни Жуван чинин нурдин вилик эцигна.

⁹ Ви хъилек кваз алатзава йикъар чи, акьалтӀарзава чна чи йикъар са цӀугъ хьиз.

¹⁰ Чаз жезвай йикъар – пудкъанни цӀуд йис, къуват квайбурун йисарин кьадар кьудкъад йис жезва, виридалай хъсан бере абурун ава зегьметда ва хажалатда, вучиз лагьайтӀа фад алатзава, чнани лув хгуда.

¹¹ Низ чир хьана Ви хъилен къуват? Ви вилик гьикьван чӀехи ятӀа кичӀевал, гьакьван чӀехиди я Ви гъазабни.

¹² Чаз чи йикъар гьисаб ийиз чир ая, кӀватӀун патал чна камал рикӀера.

¹³ Ребби, хъша элкъвена! Гьикьван яргъалди давам хьурай икӀ? Язух ша Ви лукӀарин.

¹⁴ Жуван регьимдив ацӀура чун гьар пакамахъ, ша шад жен чун, шад ийин йикъар чи!

¹⁵ Вуна чун ягъай йикъарай чун шад ая, чал писвал ацалтай йисарай.

¹⁶ Жуван кар къалура лукӀариз Жуван, абурун аялризни Жуван гьуьрмет.

¹⁷ Агъади, чи Аллагьди, чин гуз хьурай чаз! Мягькема чи гъилерин кар, чи гъилерин карни мягькем ая.