Забур 88 - Пак Калам

Аллагьдинни Давудан икьрар

¹ Эзрагьи Этанан шиир.

² За датӀана регьимдикай Реббидин мани лугьуда! Жуван мецив за вири несилриз Вахъ далу акализ хьуникай хабарар гуда.

³ Куьз лагьайтӀа за лугьузва: «Ви регьимди даим яз бине кутунва, Вахъ далу акализ хьун цавар хьиз мягькем я».

⁴ Вуна лугьузвай: «КутӀунна За икьрар Жува хкягъ авурбурухъ галаз санал, Зи лукӀ Давудахъ галаз. За Давудаз кьин кьуна:

⁵ даим яз ви тухум мягькемда, несилдилай несилдалди жеда ви тахтни». Макьамдин ара

⁶ Тарифзава цавари аламатрин Ви, пакбурун кӀватӀалда, Ребби, тариф ийизва Вахъ далу акализ хьунин.

⁷ Цаварал вуж гекъиг жеда Реббидихъ галаз? Цаварал алайбурукай вуж Реббидиз ухшар жеда?

⁸ Аллагьди кичӀ кутазва пакбурун кӀватӀалдик, къваларив гвайбур паталдини Ам къургъ гвайди я.

⁹ Я Ребби, къуватрин Аллагь, Къуватдай Вав агакьда вуж? Вахъ къуват ава, Ви вафади вун элкъуьрна кьунва.

¹⁰ Вуна гьуьлуьн гъазабдал агъавалзава: къарагъайла лепеяр, Вуна абур муьтӀуьгъзава.

¹¹ Гъалиб хьана Вун Рагьабал, Вуна Жуван душманар мягькем гъилив чукӀурна.

¹² Цавар вибур я, чилни Види я, Вуна алем ва анавай кьван вири арадал гъана.

¹³ Кеферни кьибле Вуна халкь авуна; Табар дагъдини Гьерман дагъди шадвалзава Ви тӀварцӀел.

¹⁴ Ви гъил мягькемди, къуват квайди я, Ви эрчӀи гъил хкажнава.

¹⁵ Адалатни гьахъ дуван Ви тахтунин бине я, регьимни гьакъикъат ква Ви вилик.

¹⁶ Ви тариф авунин шад гьарай чизвай халкь бахтавар я, Ви чинин нурдик къекъведа абур, я Ребби.

¹⁷ Ви тӀварцӀин хатурдай яргъи югъди шад жеда абур, аваз Ви гьахъвиле хкаж жеда,

¹⁸ гьикӀ лагьайтӀа Вун абурун къуватрин баркалла я, чи къудрат Ви ихтиярдалди я.

¹⁹ Ребби чи арха я, Исраилдин Пакди Пачагь я чи.

²⁰ Са мус ятӀани Ви керематда Ваз вафа хуьзвайбуруз Вуна лагьанай: «За аскердиз куьмек гана, халкьдикай хкягъайди хкажна.

²¹ Заз жагъана Зи лукӀ Давуд, За адавай гуьцӀна пак чӀем.

²² Гьадахъ галаз жеда Зи гъил, гуда адаз къуватар За.

²³ Душманривай кӀаник кутаз жедач ам, небгетдини дарда твадач ам.

²⁴ Адан вилик адан душманар барбатӀда За, ам такӀанбур ярхарда.

²⁵ Вафани регьим Зи адахъ галаз жеда, Зи тӀварцӀелай адан къуват артух жеда.

²⁶ Адан чапла гъил За гьуьлел эцигна, адан эрчӀи гъил вацӀарал эцигна.

²⁷ Заз эверда: „Вун Буба я зи, Аллагь я зи, мягькем раг зи хиласвилин“.

²⁸ Адакай сифтегьанди ийида, чилин пачагьрилай вине авайди.

²⁹ Жуван регьим ам паталди хуьда даим яз, Зи икьрарни адахъ галаз жеда кӀевиди.

³⁰ Адан тухум даим жеда, цавун йикъар хьиз жеда адан тахт.

³¹ Адан эвледри алудайтӀа рикӀелай Къанун Зи, Зи тагькимрал амал ийиз тахьайтӀа,

³² За къалурай къайдаяр чӀурайтӀа, Зи эмирар хуьз тахьайтӀа,

³³ гьа чӀавуз жаза гуда лашунив абурун небгетвилерай, ягъунар кьада абурун гунагьрай.

³⁴ Ам Жуван регьимдикай магьрумдач михьиз, Захъ далу акализ хьуникай хкуддач ам.

³⁵ Жуван икьрар За чӀурдач, За гайи гафни чӀур ийидач.

³⁶ Садра За кьин кьунай Жуван паквилел, Давудаз таб ийизвач за а кьинелди.

³⁷ Адан тухум даим яз жеда, жеда адан тахт, Зи вилик рагъ хьиз.

³⁸ Ам, варз хьиз, гьакъикъи шагьид хьиз, даим яз цаварал тестикьна жеда». Макьамдин ара

³⁹ Амма гила Вуна инкарна, кьулухъди эцяна, хъел атана Жуван гуьцӀуьрдикай.

⁴⁰ Вуна Жуван лукӀрахъ галаз кутӀунай икьрар инкарна, адан таж гадарна чилел,

⁴¹ адан цлар хана кукӀварна, адан къелеяр вири харапӀайриз элкъуьрна.

⁴² Патавай физвай вирибуру чуьнуьхзавай адавай, ам вичин къуншийри хъуьруьнриз вегьенва.

⁴³ Вуна адан мидяйрин эрчӀи гъил хкажнава. Шадарнава адан вири душманар,

⁴⁴ Вуна адан турунин кӀвенкӀв патахъна, куьмекнач адаз дяведа.

⁴⁵ Хъендик кутуна адан цӀарцӀар, адан тахтни чилел ярх авуна.

⁴⁶ Вуна адан жегьилвилин йикъар тӀимил авуна, кутуна ам айибдик. Макьамдин ара

⁴⁷ Гьикьван яргъалди, Ребби, чуьнуьх хьана жеда Вун, хъел, цӀай хьиз, куз жедани?

⁴⁸ РикӀел хкваш гьикӀ зи уьмуьр фад алатна физватӀа. Тек са легьзе паталди На инсанар халкьнавани?

⁴⁹ Уьмуьр тухвай гьи касдиз акунач кьиникь? Ада хилас авунани вич агъа дуьньядин гъиликай? Макьамдин ара

⁵⁰ Гьинава, Агъа, виликан регьим Ви? Давудаз кьин кьунай Вуна Вахъ далу акализ жедайвал.

⁵¹ РикӀел хуьх, Агъа, ахмур Жуван лукӀарин, тир чеб гзаф халкьарикай, – гьам за жуван къене хуьзва,

⁵² гьикӀ Ви душманар пис рахазватӀа, я Ребби, гьикӀ ийизватӀа абуру русвагь гелер Ви гуьцӀуьрдин.

⁵³ Шукур хьуй Ваз, я Ребби, даим яз! Амин! Амин!