Забур 85 - Пак Калам

Куьмек кӀанз ийидай дуьа

1 Давудан дуьа.

¹ Давудан дуьа. Ребби! Захъ яб акала, жаваб це, зун кесиб я, саил я.

² Хуьх зи уьмуьр, зун Ваз вафа хуьзвайди тирвиляй, зи Аллагь я Вун, Ви лукӀраз куьмек це, кутазвайди Вак умуд.

³ Агъа, заз регьим ая, яргъи югъди за Ваз минет ийизва.

⁴ Жуван лукӀраз шадвал це, зун рикӀелди, зи Агъа, хкаж жезва патав Ви.

⁵ Агъа, Вун хъсанди я, гъил къахчуз гьазурди я, Ваз минетзавай вирибур патал регьим Ви девлет я.

⁶ Ребби, ван ша зи дуьадин; яб це зи дад-бидаддиз.

⁷ Бедбахтвилин юкъуз за Ваз минетзава, вучиз лагьайтӀа Вуна жаваб гуда заз.

⁸ Авач, Агъа, Вун хьтинди аллагьрин юкьва, Ви хьтин крарни авач.

⁹ Вуна гъайи арадал вири халкьари атана Ваз, Агъа, икрам ийида, Ви тӀварцӀин тариф ийида.

¹⁰ Куьз лагьайтӀа чӀехи я Вун, аламатар ийизва, авай са Аллагь я Вун!

¹¹ Ребби! Заз Ви рехъ чир ая, Ви гьакъикъат гваз къекъвез жеда зун. Михьиз Ваз ганвай рикӀ це заз Вуна, Ви тӀварцӀин вилик кичӀе жедайвал.

¹² Агъа, зи Аллагь, за шукурда Ваз зи вири рикӀелди, Ви тӀварцӀиз алхишда даим яз.

¹³ Куьз лагьайтӀа чӀехиди я захъди авай регьим Ви; агъа дуьньядин деринрикай Вуна хилас авуна зи чан.

¹⁴ Аллагь! Гъукь гвайбур къарагънава зал, зи чан къачуз кӀанзава алчахрин кӀеретӀдиз – Вун рикӀелай алуднавай инсанриз!

¹⁵ Амма, Агъа, Вун регьимни мергьемет авай Аллагь я, сабур авайди, муьгьуьббатдив, вафадив ацӀанвайди.

¹⁶ Элкъуьгъ захъ, регьим ая, Жуван лукӀраз къуват це, Ви къаравушдин хциз куьмек це.

¹⁷ Вун захъ галаз хъсан тирдан керемат-ишара це заз, зун такӀанбуруз акурай, регъуь хьурай, куьз лагьайтӀа Вуна, Ребби, куьмек гана заз, теселли гана.