Забур 82 - Пак Калам

Душманрин аксина Аллагьдивай куьмек тӀалабун

¹ Асафан мани.

² Я Аллагь, кис жемир тӀун, чуькь тавуна акъвазмир! Секинвиле жемир тӀун, я Аллагь!

³ Килиг Ви душманри къалзава, Вун такӀанбуру кьил хкажнава.

⁴ Ви халкьдиз акси яз фенд туькӀуьрнава, гаф-чӀал сад авуна, акси яз Вуна хуьзвайбуруз.

⁵ Лагьанай: «Ша, тергин абур халкьарин арада, Исраилдин тӀвар мад рикӀел хкун тавун паталди».

⁶ Сад хьанвай тешкилат рикӀер сад яз кьабулна, Ваз акси яз гаф-чӀал сад авуна.

⁷ Эдамдин хуьрер, исмаилияр, Магьабни Гьагридин тухум,

⁸ Гебал, Аман вилаятар, Амалехъан тухумни, филиштияр, Тирдин эгьлияр галаз,

⁹ гьатта Ашурни абурухъ галаз сад хьана, Лутан эвледрин къуватар артухна. Макьамдин ара

^10-11 Я Аллагь, абурузни гьам ая, вуч авунатӀа чил патал кьуквадиз элкъуьруналди Эн-Дар хуьруьв терг авур Мидияндиз, Сисерадиз, Къишан вацӀал Ябиндиз.

^12-13 «Ша гъилик кутан Аллагьдин чил – Исраил», – лугьуз хьайи абурун регьберриз Аребазни Зеебаз авурди ая, абурун гьакимриз Зебагьазни Цалмуназ авурди ая.

¹⁴ Зи Аллагь! Хьурай абур жинжи-гарун хура руг хьиз, гару тухузвай нагъвар хьиз хьурай.

¹⁵ ЦӀу там туькьуьн ийидайвал, алугардайвал ялавди дагълар,

¹⁶ гьа саягъда хурук кутур абур Жуван тӀурфанривди, жуван жинжи-гарувди велвела тур абурун арада,

¹⁷ абурун чинрал гьалч ая айиб, абуру Ви тӀварцӀиз эверун паталди, Ребби!

¹⁸ Регъуь хьурай, велвела кваз хьурай даим, ягь квадарна терг хьурай,

¹⁹ чир хьурай тирди Вун Ребби тӀвар алайди, анжах са Вун я виридалай Виневайди и чилел!