Забур 80 - Пак Калам

Суварин шадвилин мани

¹ Манидаррин чӀехидаз. Гитит ягъиз. Асафан мани.

² Манияр лагь шадвилелди чи мягькем къеледиз, Аллагьдиз, кӀевидаказ лагь Якьубан Аллагьдиз!

³ Ван авурай авазди! Тафтар ягъа, ширин сесер авай арфадинни кинурдин симерик кягъа!

⁴ ЦӀийи вацран сувариз карч ягъа, чи суварин югъ тир ацӀай вацразни.

⁵ ГьикӀ лагьайтӀа ам Исраил патал къайда жеда, Якьубан Аллагьдин тагькимар жеда.

⁶ И къайда Ада Юсуфан эвледар паталди шагьидвал яз тестикьнай, хъфей чӀавуз ам Мисридин чилелай. А чилел заз чин тийир чӀалан ван атанай:

⁷ «За алудна залан пар къуьнерилай адан, адан гъилер зимбилрикай азадна.

⁸ Бедбахтвиле авайла, эвернай Заз Вуна, За куьмек чакай ваз, тӀурфандин циферай ганай За жаваб ваз, Мерибадин ятарив вун синагънай. Макьамдин ара

⁹ Яб це, Зи халкь, За ваз тагьким ийизва! Я Исраил, вуна Заз яб ганайтӀа!

¹⁰ Тахьурай вахъ маса аллагь, икрам мийир яд чилин аллагьдиз.

¹¹ Им Зун я, Ребби, Аллагь ви, акъудайди вун Мисридин чилерай. Ахъая ви сив, за ам ацӀурда!

¹² Амма Зи халкьдиз ван атанач Зи, муьтӀуьгъ хьанач Исраил Заз,

¹³ гьавиляй За туна абур гьукумда чпин терс рикӀерин, мумкинвал гана фидай чпин рекьерай.

¹⁴ Агь, Зи халкьди Заз яб гуз хьанайтӀа, Исраилни зи рекьерай фенайтӀа!

¹⁵ За абурун душманар фад явашдай, За Жуван гъил абур дарда твазвайбурун аксиниз ракъурдай.

¹⁶ Ребби такӀанбуру абурун вилик лукӀвилелди кьил агъуздай, абурун вахт даим яз давам жедай.

¹⁷ За абурув лап хъсан къуьл нез тадай, абур тух ийидай виртӀедив, акъуднавай раган къеняй».