Забур 8 - Пак Калам

Аллагьдин чӀехивал ва инсандин гъейрат

¹ Манидаррин чӀехидаз. Гитит ягъиз. Давудан мани.

² Я Ребби, я Агъа чи! Вуч гьайбат гвачни Ви тӀварцӀив вири чилел! Ви баркалла цаварилай кьакьан я.

³ БицӀекрини хурухъ галай аялри ийизвай Ви тарифрикай Вуна къеле авунва Ваз Ви душманрин аксина; гьар са мидя Ви, гьар кьисасчи гаф такъатиз тун патал.

⁴ Зун килигдай береда Ви цавариз, кӀвалахдиз Ви гъилерин, На эцигай гьам вацраз, гьам гъетериз,

⁵ инсан вуж я кьван, икьван Вуна адахъ Ви рикӀ кузвайла? Ажал галайди вуж я кьван, Вуна адан къайгъу чӀугваз?

⁶ Малаикрилай Вуна са жизви агъузна ам, баркалладин, гьуьрметдин таж алукӀна адал.

⁷ На пачагь яз эцигна ам Ви гъилерин крарин, вири адан кӀвачерик На муьтӀуьгъарна:

⁸ вири лапагар, къарамаларни, гьакӀни вагьши гьайванар,

⁹ цаваравай къушарни гьуьлеравай гъетер, гьуьлуьн къене ятарай физвай кьван вирибур.

¹⁰ Я Ребби, я Агъа чи! Вуч гьайбат гвачни Ви тӀварцӀив вири чилел!