Забур 77 - Пак Калам

Къуватрин Аллагь

1 Асафан шиир.

¹ Асафан шиир. Яб акала, зи халкь, насигьатдихъ, ван ша зи мецин гафарин.

² Зун рахада дегь замандин мискӀалралди,

³ чаз чидай ва ван хьайи, чи бан-бубайри чаз ахъаяй ихтилатар лугьуда.

⁴ Чнани абур аялрикай чуьнуьхдач; къведай несилдиз суьгьбет ийида баркалладикай Реббидин, Адан къуватдикай, Ада авур кьван аламатрикай.

⁵ Ада Якьубаз шагьидвал туна, Исраилдиз Къанун гана, ам чпин аялрин гъиле тун эмирна чи бан-бубайриз,

⁶ къведай несилриз Къанун чир хьун паталди; гьатта гьеле таханвай аялрини кваз, гьабуруни, чпин вахт алукьайла, вугуда ам чпин аялрив;

⁷ абуру Аллагьдиз ихтибарун паталди, Адан крар рикӀелай алуд тавун паталди, Адан эмирар хуьн паталди,

⁸ абур ухшар тежервал чпин бан-бубайриз – кьилиз ялдай, гъулгъула гвай несилдиз, рикӀ гьакъикъи тушир, Аллагьдиз руьгьдалди вафа техуьр несилдиз.

⁹ Ифраимдин рухваяр, чпин яракь хьелер тир, дяведин юкъуз катна кьулухъди.

¹⁰ Аллагьдихъ галаз икьрар хвенач абуру, кьил къакъудна Къанундал амалуникай.

¹¹ Алудна рикӀелай Адан крарни Ада къалурай аламатар абуруз.

¹² Мисрида абурун бубайрин вилик Ада авунай аламатар, Цагьан шегьердин патарив.

¹³ Ада гьуьл кьве падна, абур анай тухвана, ятар цал хьиз акъвазарна.

¹⁴ Юкъуз абур цифердалди тухвана, йифизни – цӀун экуьналди.

¹⁵ Къван кьве падна кьурумда, абурув дериндавай ятарикай хъваз туна.

¹⁶ Рагай Ада акъудна селлер, авахьна ятар, вацӀар хьиз.

¹⁷ Амма абуру Адаз акси яз гунагьар авун давамарзавай, виридалай Виневайдаз акси яз гъулгъула твазвай кьурумда.

¹⁸ Чпин рикӀера Аллагь синагъ ийизвай, чпин рикӀиз кӀандай тӀуьн це лугьуз.

¹⁹ Аллагьдилай шикаятни авунай: «Аллагьдилай кьурумда тӀуьн гьазуриз алакьдани?

²⁰ Эхь, Ада къван яна, адай ятар авахьна, селлер авахьна. Алакьдани Адалай фуни гуз? Вичин халкьдиз якни гуз алакьдани?»

²¹ Ван хьана Реббидиз, гъазаб акатна: Якьубан цӀай гадар хьана, Исраилдал хъелни куькӀвена.

²² Куьз лагьайтӀа Аллагьдиз ийизвачир абуру ихтибар, Ада гудай куьмекдик кутуначир абуру умудар.

²³ Ада эмирна вине авай цифериз, ахъайна цаварин варар,

²⁴ марф хьиз, къурна абурал мангьу, гана абуруз цавун техил.

²⁵ Малаикрин фу тӀуьна инсанри; Ада абуруз булдалди тӀуьн ракъурна.

²⁶ Ада къарагъарна рагъ экъечӀдай патан гар, Вичин къуватдив гьална кьиблепатан гар.

²⁷ Абурал як, руг хьиз, кӀвахна, гьуьлуьн къум хьиз, кӀвахна къушар;

²⁸ акатайвал гадарна кундал, абурун алачухрин патарив.

²⁹ Абуру тӀуьна, тежер кьван тух хьана, куьз лагьайтӀа кӀан хьайиди абуруз булдаказ гана.

³⁰ Амма абурун нефс ацӀун тавунмаз, тӀуьрди гьеле сиве амаз,

³¹ Аллагьдин хъел абурал аватна, абурукай лап мягькембур телефна, ярхарна Исраилдин рухваяр жегьил.

³² Идазни килиг тавуна, давамзавай абуру гунагьар авун, Адан аламатрин чӀалахъ жезвачир.

³³ Ада абурун уьмуьр ичӀиди авуна, абурун йисар къурхудалди ацӀурна.

³⁴ Ада чеб барбатӀайла, гьа чӀавуз абур Адахъ къекъвез хьана, рикӀ гваз абур Адахъ элкъвез хьана.

³⁵ Аллагь чпин далда тирди рикӀел хкана, виридалай вине авай Аллагь чпин Хиласкар тирди рикӀел хкана.

³⁶ ЯтӀани абуру Адан вилик ялтахвал ийизвай абурун мецери кӀуьгьуьдаказ табзавай Адаз,

³⁷ вучиз лагьайтӀа абурун рикӀер Адан вилик гьахъ тушир, абуру Адан Икьрардиз вафа хуьзвачир.

³⁸ Амма Ада, масадахъ рикӀ кудайди яз, абурун гунагьрилай гъил къахчузвай, ийизвачир абур терг. Ада гзаф гъилера Вичин хъел алудна, туьнт авунач Вичин гъазаб.

³⁹ Адан рикӀел аламай, абур гьакӀан як тирди, абур гар тирди элкъвена техкъвер

⁴⁰ Гьикьван Адав гъулгъула авунай кьурумда, Адан зегьле тухванай кас алачир чилерал!

⁴¹ Мад ва мад абуру Аллагь синагъ ийизвай, Исраилдин Пакди русвагь ийизвай.

⁴² Абурун рикӀел аламачир я гъилер Адан, я югъни чеб Ада душмандикай хиласай,

⁴³ керемат-ишараяр къалурай вахт Мисрида, аламатар – Цагьандин патарив.

⁴⁴ Элкъуьрна абурун вацӀарни булахар ивидиз, абурай хъваз тежедайвал.

⁴⁵ Абур тӀуьн паталди бувунар ракъурна, хъипер ракъурна абур тергун паталди.

⁴⁶ Ада бегьер чӀигъичӀигърив вугана, абурун зегьметар цицӀерив вугана.

⁴⁷ Ада харцив гатаз туна ципицӀар, муркӀадив гатана тутар.

⁴⁸ Абурун малар харцик кутуна, абурун суьруьярни нехирар цӀайлапанрив вугана.

⁴⁹ Вичин хъилен ялав къурна Ада абурал, наразивал, гъазаб ва бедбахтвал, ракъурна абурал жаза гвай малаикрин кӀеретӀ.

⁵⁰ Гьазурна Ада вичин хъилез рехъ, абурун чанар чара авунач ажалдикай; тӀегъуьндин гъиле туна Ада уьмуьр абурун.

⁵¹ Мисрида телефна виридан сифте хьайи ругулар, Хаман кӀвалера аладай сифтегьан ругулар.

⁵² Вичин халкь, хпер хьиз, тухвана Ада, тухвана абур, суьруь хьиз, кьурумдай.

⁵³ Хата галачиз тухвана, кичӀе тушир абуруз, абурун душманар акатна гьуьлуьк.

⁵⁴ Пак чилерал гъана абур, Вичин эрчӀи гъиливди къачур Дагъдал.

⁵⁵ Абурун виликай чукурна халкьар, гьабурун чилер ирс яз пайна абуруз, Исраилдин тайифаяр ацукьарна чардахра.

⁵⁶ Амма абуру гъулгъула тваз, синагъ ийизвай Виридалай вине авай Аллагь, Адан шагьидвилер хуьзвачир.

⁵⁷ Абур рекьяй акъатзавай, хаинвалзавай, чпин бубайри хьиз, кьулухъ элкъвезвай, чӀуру чӀемерук хьиз.

⁵⁸ Ам пашманар ийизвай хкажнавай пак чкайралди, Адан гъайра къизгъинар ийизвай абурун бутралди.

⁵⁹ Аллагьдиз ван хьана, хъел атана, кӀевелай инкар авуна Исраил.

⁶⁰ Шиладавай туна кӀвал – инсанрин юкьва эцигай чардах.

⁶¹ Вичин къуват есирвиле вугана, туна Вичин баркалла душманрин гъиле.

⁶² Вичин халкь туна турунин хура, хъел атана Вичин ирсиникай.

⁶³ ЦӀу кьуна абурун жегьилар, абурун рушари лагьанач некягьдин манияр.

⁶⁴ Абурун хахамар ярх хьана туруник, шехьначир абурун хендедаяр.

⁶⁵ Уях хьана, ахварикай хьиз, Агъа, чехирдикай уях хьайи зурба инсан хьиз.

⁶⁶ Вичин душманар далудихъай телефна, даим яз абурдай вегьена.

⁶⁷ Юсуфан чардах инкарна Ада, Ифраиман тайифа авунач хкягъ.

⁶⁸ Ягьудан тайифа хкяна, Адан рикӀ алай Сигьан дагъ.

⁶⁹ Цав хьиз, кьакьан пакхана эцигна Вичин, Чил хьиз, мягькем авуна даим яз.

⁷⁰ Вичин лукӀ Давуд хкяна, хперин парахрай къачуна.

⁷¹ Нек гузвай хперивай къачуна, гъана ам хуьн патал Вичин халкь, Якьубан, яни Исраилдин халкь, Вичин ирс.

⁷² Хвена абур Давуда михьи рикӀелди, тухвана абур камал гвай гъилив.