Забур 73 - Пак Калам

ЧкӀанвай ибадатханадихъ шел

1 Асафан шиир.

¹ Асафан шиир. Я Аллагь, вучиз Вуна чун инкарна даим яз? Вучиз Ви хъел Ви яйлахрин хперал алахьна кузва?

² Дегь заманрилай Вуна хкягъайбур рикӀел хкваш, Ви ирсинин тайифа, Вуна азад хъувурбур рикӀел хкваш, Вун вичел хьайи Сигьан дагъ рикӀел хкваш.

³ Виш йисарилай инихъди авай харапӀайрихъ, пакханадиз душманди гъайи вири чкӀайвилихъ элкъуьр ая камар Ви.

⁴ Душмандин къал-къиж гьатна Ви КӀвалин цлара, Ви чка ацӀана пайдахривди абурун.

⁵ Гуя тамун яцӀа абурун нажахри ийизвай ванер,

⁶ затӀни амачиз чукӀур авуна нехишар алай цлар яргъи тум галай ва сив гирде нажахрив абурун.

⁷ ЦӀув вугана ви пакхана чукӀурна, Ви ТӀварцӀин КӀвал кьацӀурна.

⁸ Фикирна чпин рикӀяй: «Чна абур тергда михьиз», Аллагьдиз икрамдай чкаяр вири кана.

⁹ Ишараяр аквазмач чи вилериз, пайгъамбарар амач мад, идан эхир мус жедатӀа чидай садни амач чи арада.

¹⁰ Я Аллагь, бес гьикьван яргъалди рахшанддин хъвер ийида душманди, мидяди Ви тӀварцӀик даиман хкуьриз жедани?

¹¹ Вучиз Вуна гъил къахчузва кьулухъди, жуван эрчӀи гъил? Ракъура ам абурал, ягъ абур.

¹² Аллагь! Эвел заманрилай Пачагь зи! Вуна гана чилериз куьмек.

¹³ Вуна Жуван къуватдив пай авунва гьуьл, Вуна гьуьлуьн пилийрин кьилер кукӀварна.

¹⁴ Вуна кукӀварна кьилер аждагьандин, тӀуьн паталди вугана ам кьурумдин ничхиррив.

¹⁵ Вуна чиляй акъудна чешмени булах, ацӀай вацӀарай Вуна кьур акъудна.

¹⁶ Вибур я югъни йиф, рагъни варз – кар я Ви гъилерин.

¹⁷ Вуна чилиз часпарар эцигна, халкь авуна гадни кьуьд.

¹⁸ РикӀел хкваш, я Ребби, душмандин рахшанд квай хъуьруьнар ва Ви тӀварцӀик хкуьрзавай ахмакь халкь.

¹⁹ Ви тӀапӀасдин чан ничхиррив вугумир, Ви язухрин уьмуьрар алуд мийир са чӀавузни рикӀелай.

²⁰ Килиг Жуван Икьрардиз, куьз лагьайтӀа ацӀанва чил мичӀивилив, зулуматдив.

²¹ Зулумдик квайди русвагь хьана тахтурай, саилдини, муьгьтеждани Ви тӀварцӀин тариф авурай.

²² Къарагъ, Аллагь, хуьх Жуван кар, рикӀел хкваш ахмакьда Вак яргъи югъди хкуьрнатӀа гьикӀ.

²³ Жуван душманрин гьараяр, Ви мидяйри акъваз тийиз акъудзавай къал алуд мийир рикӀелай.