Забур 71 - Пак Калам

Пачагьдин паталай дуьа

1 Сулейманан мани.

¹ Сулейманан мани. Я Аллагь! Багъиш ая пачагьдиз Жуван гьахъвал, Жуван михьивал багъиша пачагьдин хциз.

² Пачагьди Ви инсанриз гьахъ тирвал гурай, азиятдик квайбуруз – адалат тирвал.

³ Дагълари саламатвал гъурай инсанриз, кӀунтӀари гъурай гьахъ-михьивилин майваяр.

⁴ Хуьрай Ада халкьдикай тир чӀугвазвайбур азият, муьгьтеж тирдан рухваяр куьмек гурай, дарвал гузвайди барбатӀ авурай.

⁵ Адаз кичӀе хьурай Вакай рагъни варз амай кьван, несилрилай несилралди.

⁶ Ам эвичӀрай, векь янавай чуьлдал марф хьиз, стӀалар хьиз, чил дигизвай.

⁷ Адан йикъара гьахъ-михьи касди цуьк ахъайрай, саламатвал куьтягь жедач, квахь тавунмаз варз.

⁸ Гьуьлелай гьуьлел кьван агъавал ийида ада, Эфрат вацӀалай чилин а кьилел кьван.

⁹ Кьурумдин инсанри адан вилик мет чилиз яда, адан душманар чилин руквариз мез гуз жеда.

¹⁰ Таршишдин ва атӀайрин пачагьри харж гъида адаз, Шебадинни Себадин пачагьри савкьватар гъида.

¹¹ Вири пачагьри икрамда адаз; вири халкьари къуллугъда адаз.

¹² Вучиз лагьайтӀа Ада куьмекда минетзавай муьгьтеждаз, басхасдик квайдазни куьмек авачир.

¹³ Регьим ийида кесибдазни зайифдаз, хиласда муьгьтежбурун руьгьерни.

¹⁴ Хилас ийида абур фендигарвал, зулуматар авайла, Адаз абурун багьа жеда ивини.

¹⁵ Сагъ хьуй пачагь, гурай адаз Шебадин къизил, акъваз тийиз дуьа авурай гьакъиндай адан, гьар юкъуз адаз хийир-дуьа гъиз.

¹⁶ Вири чилел ризкьи булдиз хьурай, кӀунтӀарин кьилел гару юзуррай техилар, хьуй адан булвал ухшарди Либандин аваданвилиз, шегьерра гзаф хьурай инсанар, чилел векьер хьиз.

¹⁷ Даим хьурай адан тӀвар, рагъ амай кьван чӀавара, адавай рухсат къачуда чилин вири халкьари, абуру адаз бахтавар лугьуда.

¹⁸ Шукур хьурай Аллагьдиз, Реббидиз, Исраилдин Аллагьдиз, аламатар къалурзавай Сад тирдаз!

¹⁹ ДатӀана шукур хьурай Адан тӀварцӀиз гьайбат гвай, Адан баркалладив вири чил ацӀурай! Амин! Амин!

²⁰ Ишаян хва Давудан дуьаяр куьтягь хьана.