Забур 61 - Пак Калам

Аллагьди гудай далдадиз ихтибар авун

¹ Манидаррин чӀехидаз. Ядутун патал. Давудан мани.

² Анжах са Аллагьдивай заз секинвал жагъизва, Гьадав гва зи куьмек.

³ Са Гьам я зи раг, зи куьмек я, зи къеле я Ам – кӀевиз ян гудач за.

⁴ Гьикьван куьне гьужумарда гьа са касдал, вирида санал чукӀурда ам, алгъанвай цал хьиз, галтад жезвай жугъун хьиз?

⁵ Анжах гьикӀ ам гьуьрмет авай чкадилай алуддатӀа, ийизва фикир, шадвалзава тапунал. Хийир-дуьа ийизва сивелди, амма рикӀяй лянетзава. Макьамдин ара

⁶ Тек са Аллагьдик секин хьухь, зи рикӀ, Гьадав гва зи умуд.

⁷ Анжах Гьам я зи раг, зи куьмек, зи къеле я Ам, татаб жедач зун.

⁸ Аллагьдив зи куьмек, Зи баркалла гва. Аллагь зи къуватдин раг, зи далда я.

⁹ Адак умуд кутур, халкь, гьар са вахтунда; Адан вилик жуван рикӀ ичӀира, вучиз лагьайтӀа Аллагь я чаз катдай чка. Макьамдин ара

¹⁰ Кьиникь галайбур анжах челек-фелек я, инсанар анжах таб я са; эциг терездал – абурун хел хкаж жеда, вири санал нефесдилай кьезил я.

¹¹ Тарашнавайдак кутамир умуд, чуьнуьхнавайдал дамахмир кьуру. Мад артух хьуй девлет, амма агудмир рикӀер адав.

¹² Аллагьди садра лагьана, кьведра я заз икӀ ван хьайиди: Аллагьдив къуват гва,

¹³ Вав, Агъа, регьим гва. Вуна гьардаз гузва эвез авур крарин.