Забур 59 - Пак Калам

Четин чӀавуз ийидай дуьа

1-2 Манидаррин чӀехидаз. «Цин цуькведи шагьидвалзава» манидин макьам ягъиз. Давудан шиир. Давуда Арам-Нагьарайимдин кефердин рагъэкъечӀдай пата Суьриядихъ галаз ва Цувадин пачагьдихъ галаз дяве ийизвайла, ва Йуафа, хтана, Кьелен дереда цӀикьвед агъзур эдами барбатӀай чӀавуз.

^1-2 Манидаррин чӀехидаз. «Цин цуькведи шагьидвалзава» манидин макьам ягъиз. Давудан шиир. Давуда Арам-Нагьарайимдин кефердин рагъэкъечӀдай пата Суьриядихъ галаз ва Цувадин пачагьдихъ галаз дяве ийизвайла, ва Йуафа, хтана, Кьелен дереда цӀикьвед агъзур эдами барбатӀай чӀавуз.

³ Вуна чун гадарна, я Аллагь, барбатӀна чун. Ваз хъел авай – эвелан хьтинбур хъия чун!

⁴ Вуна чил зурзурна, гудна ам; адан хирер сагъ хъия – ам хъуткьун жезва.

⁵ На Жуван халкьдиз ракъурна четин вахтар; гана вуна чаз чехир, ада яна чун.

⁶ Амма Вакай кичӀедайбур паталди Вуна пайдах хкажна, абур адав кӀватӀ хьана, чеб чӀемерукдай ягъиз тежервал. Макьамдин ара

⁷ Хилас хьурай Ви рикӀ алайбур, хуьх чун жуван эрчӀи гъиливди, жаваб це чаз.

⁸ Аллагьди гаф гана Вичин пакханада: «Шадвал ийиз, Шехем шегьер пайда За, Сукат дере алцумда За.

⁹ Зиди я Гилеад, Зиди я Манаше, Ифраим Зи кӀукӀ я ракьун, Ягьудат пачагьвилин лаш я Зи.

¹⁰ Магьаб Зун патал лат я кӀвачер чуьхуьдай. За вегьида Жуван чекме Эдамдал; филиштийрин чилел гъалибвилелди гьарайда кӀевиз».

¹¹ Мягькемнавай шегьердиз зун ни гъидай? Ни гъидай зун Эдамдал кьван?

¹² Ам Вун тушни, я Аллагь, гадарайди чун? Чи кьушунрихъ галаз экъечӀ тийизвайдини Вун тушни?

¹³ Чаз куьмек це женгина душмандихъ галаз, вучиз лагьайтӀа инсанрин куьмек тапанди я.

¹⁴ Аллагьдихъ галаз чун гъалиб жеда дяведа. Ярхда Ада душманар чи.