Забур 54 - Пак Калам

Дустунин маса гун

¹ Манидаррин чӀехидаз. Симер алай алатар патал. Давудан шиир.

² Аллагь! Ван хьухь зи дуьадин, зи минетдикай чуьнуьх жемир,

³ ван хьухь, жаваб це! Фикирри атӀузва аман зи, теспача хьанва зун

⁴ душманрин ванцикай, небгетри дарвиле туникай. Абуру зал бедбахтвал гъана, хъиле гьатна, душманвал ийизва захъ галаз.

⁵ АтӀанва зи рикӀин аман; Вегьенва зал ажалдин къургъари.

⁶ КичӀевили, зурзуни зун дарвиле тунва, къурхуди кьунва зун.

⁷ За лагьана: «Сада заз лифрен лувар ганайтӀа! Фидай зун лув гана, жагъидай динжвал;

⁸ ингье яргъаз катдай зун, кьурумда уьмуьр тухудай. Макьамдин ара

⁹ За тади къачудай жагъуриз са катдай чка тӀурфандикай, чӀимелдикай яргъара».

¹⁰ Ая абур теспача, я Агъа, чара ая абурун чӀалар, вучиз лагьайтӀа, заз аквазвайвал, гьабурувай я шегьердавай зулуматни къалмакъал.

¹¹ Йифиз-юкъуз къекъвезва абур вири патарихъай цлар тирвал шегьердин, ам ацӀанва пис крарив, бедбахтвилив.

¹² Завал ава адан къене, хиянатни зулумат куьчейрай хъфизвач адан.

¹³ ХкуьрнайтӀа душманди зи намусдик, эхдай за. Душманди зи вилик кьуру дамах авунайтӀа, жедай завай далда кьаз.

¹⁴ Амма ам вун я эхир, заз барабарди, зи дуст, зи кӀеви дуст.

¹⁵ Вахъ галаз чна рикӀин суьгьбет авунай, чӀехи кӀеретӀдихъ галаз Аллагьдин КӀвализни фенай.

¹⁶ Атурай ажал зи душманрин; абур чан аламаз аватрай агъа дуьньядиз – чпин кӀвалера, рикӀера авай писвилиз килигна.

¹⁷ За лагьайтӀа, минетда Аллагьдиз; Реббиди заз куьмекда.

¹⁸ Няниз, экуьн береда ва нисиниз за шикаят ийизва, гьарайзава, Адаз зи ван къведа.

¹⁹ Зун сагъ-саламат яз хуьда душманрикай, гьикьван абур гзаф хьайитӀани.

²⁰ Даим яз ацукьнавай тахтуна Аллагьдиз зи ван жеда, абур Ада русвагьда, куьз лагьайтӀа абуруз дегиш жез кӀанзавач, Аллагьдикай кичӀе туш. Макьамдин ара

²¹ Зи дустуни дустарал гъил хкажна, ада чӀурна хьайи икьрар.

²² Адан рахун чӀемедилай хъуьтуьл я, амма рикӀе дяве ава, адан гафар зейтундин чӀеминилай назик я, амма абур къакъарай акъуднавай гапур я.

²³ Ихтибар ая жуван пар Реббидал, мягькемарда Ада вун, са чӀавузни тадач Ада къуватдай физ гьахъ-михьидав.

²⁴ Вуна, Аллагь, вегьида абур сурун фуруз; ивикъичдизни тапархъандиз чпиз ганвай йикъарин са пай кьванни аквадач. За, лагьайтӀа, Вак умуд кутазва.