Забур 51 - Пак Калам

Аллагьдин дуван ва регьим

¹ Манидаррин чӀехидаз. Давудан шиир.

² Эдами Дуэга Шаулаз: «Давуд Ахимеликан кӀвале ава» лагьай чӀавуз.

³ ЧӀуру кардал вуч дамахар ийизва на, къуват авайди? Аллагьдин регьим даимди я!

⁴ Ви меци зиян ийизва, хци авунвай уьлгуьч хьиз я ам, фендигар.

⁵ Хъсандалай гзаф кӀанда ваз пис кар, таб гзаф кӀан я гьахъ гафунилай. Макьамдин ара

⁶ Тергдай гафар кӀанда ваз, фендигар мез!

⁷ Амма вун тергда даим яз Аллагьди; Ада, кьуна, чукурда вун ви чардахдикай; чан алайбурун чиляй ви дувул акъудда. Макьамдин ара

⁸ Гьахъ-михьибуруз кичӀе жеда, акурла, хъуьреда вал, лугьуда:

⁹ «Ингье инсан, Аллагьдикай вичиз далда такьурди, вичин хазинайрихъ агъуна, масадбур тергиз мягькем хьайиди».

¹⁰ Аллагьдин КӀвале къацудаказ экъечӀнавай зейтун тарциз зун ухшар я, Аллагьдин муьгьуьббатдихъ за иман ийизва мидаим яз.

¹¹ Вуна авурдай за шукурарда датӀана Ваз, Ваз вафа хуьзвайбурун вилик зун вил алаз жеда ТӀварцӀел Ви, куьз лагьайтӀа иер я Ам.