Забур 5 - Пак Калам

Экуьнин дуьа

¹ Манидаррин чӀехидаз: кфилар патал. Давудан мани.

² Зи гафарин ван атуй Ваз, я Ребби, шел-хвалдин ван ша зи.

³ Яб це куьмек тӀалабзавай гьарайдиз, эй зи Пачагь, Аллагь зи, куьз лагьайтӀа за Ваз дуьа ийизва!

⁴ Пакамахъ Ваз зи ван къведа, я Ребби, пакамахъ за умуд кваз минетда Ваз.

⁵ Вун небгетбур кӀанзавай Аллагь туш, писбурувай Ви патав кьил хуьз жедач.

⁶ ЯцӀу гафар гвайбуруз чка жедач вилик Ви, пис кӀвалахар ийизвайбур аквадай Ваз вилер авач.

⁷ Тергда Вуна таб ийирбур, инсаф течир фендигарар такӀан я Ваз тежер кьван.

⁸ Амма заз Вуна авур зурба регьимдалди Ви КӀвализ гьахьда зун, икрамда Ви пак Ибадатханадиз, аваз Вахъай кичӀевал.

⁹ Я Ребби, зи душманриз аквадайвал, твах зун кваз Ви гьахъвилик – Вуна зи вилик дуьзди ая Ви рехъ заз.

¹⁰ Куьз лагьайтӀа абурун сивяй акъатзавай, чӀалахъ хьана кӀандач гьич са гафунин, абурун рикӀер зияндивди ацӀанва. Абурун кӀалханар ахъа сур хьиз я. Ялтахвалзава абуру чпин мецелди.

¹¹ Абуруз кар яхъ, я Аллагь! Ярх хьурай чпин чӀуру къастарив кьурвал. Абуру авур гзаф кьадар гунагьрай негь ая абур, вучиз лагьайтӀа Ваз акси яз къарагъна.

¹² Амма вириди шаддаказ гьарайрай Вак умудар кутазвайбуру, шадвалрай эбеди яз! Къалур ая абуруз жуван къаюмвал, шад хьун патал Вун галаз кӀандайбур Ви тӀвар!

¹³ Хийир-дуьа ийизва На гьахъ-михьи касдиз, я Ребби, къалхандив хьиз, хуьзва ам гьар патахъай Вуна Жуван регьимдив.