Забур 49 - Пак Калам

Дуьздаказ ибадат авун

1 Асафан мани.

¹ Асафан мани. Аллагьрин Аллагь, я Ребби, лугьузва ва эвер гузва халкьариз чилин рагъ экъечӀдай патахъай рагъ акӀидай патаз кьван.

² Лап гзаф иер Сигьандай къалурзава Аллагьди Вичин экв.

³ Къведа чи Аллагь, кисна акъваздач. Адан вилик цӀай ква туькьуьндай, къати тӀурфан къваларивай гва Адан.

⁴ Цаваризни чилериз Ада кьакьанрай эвер гузва Вичин халкьдин дуван авуниз:

⁵ «КӀватӀа Зи патав Захъ имандал алайбур, экечӀайбур Захъ галаз Икьрардик Къурбанддин патав».

⁶ Адан гьахъвиликай хабар гузва цавари, вучиз лагьайтӀа и дуванбег – Аллагь я. Макьамдин ара

⁷ «Яб це, Зи халкь, Зун рахада. Исраил! За ийида ваз акси яз шагьидвал, Зун – Аллагь, Аллагь я ви:

⁸ За къурбандрай ахмурзавач ваз, ви кунугар датӀана Зи вилик ква.

⁹ Герек авач заз я жунгав ви парахрай, я кьунар ви цуррай,

¹⁰ гьикӀ лагьайтӀа, тама авай ничхирар вири Зибур я, агъзур дагъдавай маларни галаз.

¹¹ Дагъларавай вири къушар, чуьллера вуч аватӀани вири Заз чизва.

¹² ТиртӀа Заз гишин, За ваз лугьудачир, гьикӀ лагьайтӀа, алемни ана авай кьван вири Зиди я.

¹³ За як незвани кьван жунгаврин ва я иви хъвазвани кьван кьунарин?

¹⁴ Къурбанд ая Аллагьдиз шукурар, вядер жуван виридалай Виневайдан вилик кьилиз акъуда.

¹⁵ Гьа чӀавуз заз эвера дар юкъуз, За хилас ийида вун, вунани Зи тарифда».

¹⁶ Амма небгетдиз Аллагьди лагьана: «Вуч лагьана рахада вун къайдайрикай Зи, ихтилатда Икьрардикай Зи?

¹⁷ Ваз зи насигьат аквадай вилер авач, вуна Зи эмирар кваз кьазвач.

¹⁸ Угъри акурла, адахъ галаз сад жезва вун, явабурухъ галаз вуна дуствал ийизва.

¹⁹ Жуван сивив чӀуру гафар лугьуз тазва на, таб хразва меци ви.

²⁰ На датӀана стхадик кутазва тахсир, адал буьгьтен вегьизва.

²¹ Вуна акӀ ийизвай, Зунни киснавай, на кьетӀ авуна Зунни вун хьиз я лугьуз. Амма За акъудда дуьздал вун, ви тахсирар чин чинал лугьуда.

²² И кар кьатӀутӀ, Аллагь рикӀелай алудзавайбур, тахьайтӀа За тергда куьн, жедач квез мад маса хиласкар.

²³ Заз шукур къурбанд ийизвайда гьуьрметзава Заз. Дуьз рекьяй физвайдаз къалурда За хиласвал Аллагьдин».