Забур 48 - Пак Калам

Пулунихъ далу акалун кӀамашвал я

¹ Манидаррин чӀехидаз. Къарагьан миресрин мани.

² Яб це идаз, вири халкьар, яб акала, чилел уьмуьр тухузвай вирибур,

³ адетдинбур, эсил-несил авайбур, девлет авайбур, кесиббур.

⁴ Зи сивяй акъатзава камалдин гафар, зи рикӀин хиялри акьаз тада гъавурда.

⁵ Яб акалда за келимадихъ дерин тир, кинур ягъиз, жуван мискӀал ахъайда:

⁶ куькай кичӀе хьурай заз чӀулав йикъара, зал пис тапархъанар алтӀуш хьанвайла? –

⁷ чпин хазинайрик умуд кутунвайбурукай, чпин чӀехи девлетдалди дамах ийизвайбурукай?

⁸ Ришвет гана садалайни стха къахчуз алакьдач, я тахьайтӀа адан уьмуьрдихъ гьакъи гуз жедач Аллагьдиз:

⁹ уьмуьрдихъ гудай къимет чӀехиди я, ахьтин къимет авайди туш,

¹⁰ ам амукьдани уьмуьр тухуз датӀана? Сур такуна амукьдани?

¹¹ Ваъ, гьар садаз аквазва: камал авайбур рекьизва, рекьизва санал ахмакьни авам, масадбуруз туна чпин девлетар.

¹² Сурарикай абурун кӀвал жеда абуруз асиррилай асирра, несилрилай несилралди уьмуьр тухудай чка жеда чпин гьуьрметдай чилериз чпин тӀварарни гайивиляй абуру.

¹³ Инсан амукьдач гьуьрметда, ам ухшар я телеф жедай гьайвандиз.

¹⁴ Гьахьтинди я кьадар-кьисмет жувак умуд кутазвайдан, гуьгъуьналлаз абурун крар вири дуьз яз гьисабзавайбурун пайни гьа гьам я. Макьамдин ара

¹⁵ Хпер хьиз, абур гьазурнава агъа дуьньядиз, чубанвалда абуруз ажалди. Экуьнахъ абурал агъавалда михьибуру, абурун къуватар цӀрада, сурукай абуруз кӀвал жеда.

¹⁶ Амма зун Аллагьди агъа дуьньядин гьукумдикай хкудда, зун Вичин патав кьабулда Ада. Макьамдин ара

¹⁷ КичӀе жемир, инсандиз девлет жедайла, адан кӀвале берекат бул жедайла.

¹⁸ Рекьидайла, ада затӀни вичихъ галаз тухудач, адан девлет фидач адан гуьгъуьнаваз.

¹⁹ Ада вич уьмуьрда бахт авайди яз гьисабрай – агалкьунар авайбурун тарифарда инсанри, –

²⁰ садрани мад экв тахквадай вичин бубайрин килфетдихъ ам агалтда.

²¹ Гьуьрмет авай, амма камал авачир инсан ухшар я телеф жедай гьайвандиз.