Забур 47 - Пак Калам

Сигьан – Аллагьдин шегьер я

¹ Къарагьан миресрин мани.

² ЧӀехи я Ребби чи Аллагьдин шегьерда, Адан пак Дагъдал лайих я Ам гьар жуьредин тарифдиз.

³ Кьакьан я ам, иер я – вири чилин хвешивал тир Сигьан дагъ, шегьер чӀехи Пачагьдин, гуьрчег я ам кеферпатан къерехра.

⁴ Къелейра адан Аллагь сейли я далда хьиз.

⁵ КӀватӀ хьана пачагьар, санал фена дяведиз,

⁶ амма къах хьана, Ярусалим акурла, велвела акатна, катна кьулухъ.

⁷ Ана зурзун акатна абурук, азият хьана аял хазвай папаз кьван.

⁸ Вуна абур барбатӀна, рагъ экъечӀдай патан гару кукӀвардайвал гьуьлераллай гимияр Таршишдин.

⁹ Чаз вуч ван хьанатӀа, гьам акунни авуна Къуватрин Реббидин шегьерда, шегьерда чи Аллагьдин; Аллагьди хуьзва ам чукӀур тавуна, даим яз. Макьамдин ара

¹⁰ Аллагь! Чна Ви Ибадатханада Ви регьимдикай фикир авуна.

¹¹ Аллагь, гьикӀ Ви тӀвар чилин пипӀерив агакьзаватӀа, гьакӀ агакьзава тарифни Ви. АцӀанва Ви эрчӀи гъил гьахъунив.

¹² Сигьан дагъдал шадвал ийизва, хвешивалзава Ягьудатдин хуьрери Ви гьахъ дувандал.

¹³ Чарх ягъ Сигьан дагъдал, элкъуьгъ адал, гьисаба адан минараяр,

¹⁴ фикир це адан кӀелейриз, килиг адан имаратдиз, къведай несилдиз авун патал ихтилат.

¹⁵ Куьз лагьайтӀа и Аллагь чи Аллагь я датӀана; Адакай чаз регьбер жеда асирра.