Забур 36 - Пак Калам

Гьахъ-михьиданни небгетдин кьисмет

1 Давудан дуьа.

¹ Давудан дуьа. Аку гьа, хъел къвемир пис ксарикай, Пехил жемир къанунсузбурал;

² Бес абур, векь хьиз, кьурадани фад, къацу хъач хьиз, шуьткьуьда абур?

³ Вафа хуьз Реббидиз, умуд кутур Адак, хъсанвал ая, уьмуьр твах уьлкведа.

⁴ Реббидал шад хьухь, ви рикӀин мурадар Ада кьилиз акъудда.

⁵ Гвачиз гъараз, жуван рехъ ихтибар ая Реббидал, Адак умуд кутур, Ада ам кьилиз акъудда,

⁶ къалурда ви гьахъ-михьивал, экв хьиз, ви адалатвал, нисинин рагъ хьиз.

⁷ Динжвал хуьх Реббидин вилик, умуд кутур Адак. Небгетрин крара агалкьунар жезвайла, абуру чпин амалдар къастар кьилиз акъудзавайла, хъел къвемир.

⁸ Ерли хъел ийиз тахьурай, гадра гъазаб, наразивал ийимир – бедбахтвилихъ гъида ада.

⁹ Писвалзавайбурун дувул хкатда. Реббидик умуд кутазвайбуруз уьлкве гьатда.

¹⁰ Жаду небгетар амукьдач, са тӀимил вахт алатайла, къекъвез жеда абурухъ, амма абур жагъидач.

¹¹ Кесибриз уьлкве гьатда, аваданвиликай лезет хкудда.

¹² Зиндикь небгетди гьахъ-михьидаз фенд акъудзава, адаз акси яз регъвезва сарар,

¹³ амма адал хъуьрезва Агъа, куьз лагьайтӀа чизва, адан жазадин югъ алукьда.

¹⁴ КьецӀиларзава небгетри турар, абуру чӀемерукар акъажзава, ягъун патал кесибарни саилар, тергун патал дуьз рекьяйтӀуз физвайбур.

¹⁵ Амма турар абурун рикӀериз сух жеда чпин, абурун чӀемерукар кьатӀ жеда.

¹⁶ Лап тӀимилди хъсан я гьахъ-михьидав гвай небгетрив гвай гзаф девлетдилай.

¹⁷ Абурув гвай гьукумни къахчуда. Мягькемарда гьахъ-михьибур Реббиди.

¹⁸ Малум я Реббидиз йикъар леке квачирбурун, абурун ирс даим яз амукьда.

¹⁹ Бедбахт чӀавуз регъуь жедач абуруз, каш авай йикъара тух жеда абур.

²⁰ Небгетарни терг жеда, Реббидин душманар квахьда, вагьши цуьквер хьиз, гум хьиз, чкӀида.

²¹ Пис небгетди, бурж къачуна, вахгузвач, гьахъ-михьида жумартдаказ гузва куьмек.

²² Реббидалди бахтавар тирбуруз уьлкве гьатда, Ада лянет авурбур терг жеда.

²³ Реббиди мягькемарзава инсандин камар, Адан рекьяй физвайла ам.

²⁴ Алукьдач ам, хьайитӀани вич татаб: Реббиди адан гъил кьада.

²⁵ Са чӀавуз зун жегьил тир, гила кьуьзуь хьанва зун, амма заз акунач гадарнаваз гьахъ-михьиди, адан аялрини фу тӀалабиз акунач.

²⁶ Гьамиша ам жумарт я, буржуна вугузва хуш аваз, жеда адан аяларни бахтавар.

²⁷ Тухун паталди уьмуьр датӀана, яргъаз хьухь писвиликай, хъсанвал ая.

²⁸ Реббидиз гьахъ дуван кӀанда, Вичиз вафа хуьзвайбур гадардач Ада. Уьмуьр абурун жеда датӀана саламатвиле, небгетрин тухумдин хкатда дувул.

²⁹ Гьахъ-михьибуруз уьлкве гьатда, ана абур даим амукьда чан алаз.

³⁰ Фасагьатдиз алахьзава камал гьахъ-михьидан сивелай, адан меци лугьузва гьахъ.

³¹ Къанун Аллагьдин рикӀе ава адан, татаб жедач кӀвачер адан.

³² Хуьзва вилив небгетри гьахъ-михьиди чинеба, алахъзава рекьиз ам.

³³ Амма абурун гъиле твадач ам Реббиди, дувандалди тахсирдик кутаз тадач ам.

³⁴ Хьухь хуьз рехъ Реббидин, умуд кутур Адак. Ада вун хкажда, уьлкве гьатда ваз, небгетрин дувул хкатунни аквада.

³⁵ ЦӀай-хъел квай небгет акуна заз, хкаж жезвай зурба тар хьиз.

³⁶ Амма фена алатна ам, амукьнач ам; къекъвена зун адахъ, амма жагъанач.

³⁷ Ша, вил алаз хьухь рехне квачирдал, килиг ая гьахъ-михьидаз, куьз лагьайтӀа кӀандайбуруз ислягьвал гележег ава.

³⁸ Амма квахьда вири гунагькарар, терг жеда небгетрин къверичӀав.

³⁹ Я Реббидилай гьахъбуруз куьмек. Бедбахт чӀавуз Ам абурун далда я.

⁴⁰ Реббиди абуруз куьмекзава, хиласзава, Ада абур азадзава небгетрикай, хиласзава, гьикӀ лагьайтӀа, абуру далда кьазва Адакай.