Забур 32 - Пак Калам

Халикьдин тариф авун

¹ Гьараяр ая, гьахъ-михьибур, Реббидал, шад яз. Адан тарифун дуьз рикӀер авайбуруз кутугнава.

² Кинур ягъиз шукур ая Реббидиз, Адаз цӀуд сим алай арфа ягъ.

³ Адаз цӀийи мани лагь, магьирдаказ ягъ макьам, шадвиляй ван хкажна.

⁴ ГьикӀ лагьайтӀа Реббидин гаф дуьзди я, Адан вири кӀвалахар гьакъикъибур я.

⁵ Реббидиз кӀанда гьахъ-михьивал ва адалат, чил ацӀанва муьгьуьббатдив Адан гьакъикъи.

⁶ Реббидин гафуни халкьнава цавар, Адан нефесди – халкьнава гъетерин кьушун.

⁷ Гьуьлуьн ятар кӀватӀда Ада, къапара хьиз, хуьда дерин-дерин чкайра.

⁸ КичӀе хьурай Реббидикай вири чилиз, Адан вилик зурзаз хьурай каинатда чан алай кьван вирибур.

⁹ Куьз лагьайтӀа хьана Ада лагьайвал, Ада эмирна – гьам пайда хьана.

¹⁰ Маса халкьарин ниятар чукӀурзава Реббиди, тергзава Ада эллерин къастар.

¹¹ Амма ниятар Реббидин амукьда датӀана, Адан рикӀин къастар фида несилрилай несилрал.

¹² Гьи халкь патал Ребби Аллагь язватӀа, гьам бахтавар я; Ада Вичин ирс яз хкягъ авунвай халкь бахтавар я.

¹³ Цаварилай ава Ребби килигиз, вири килфет инсанрин аквазва Адаз.

¹⁴ Килигзава тахтунилай Ам Вичин вирибуруз, чилел алай кьванбуруз.

¹⁵ Ам я халкь авурди вири рикӀер абурун, – абуру ийизвай вири крариз Ам дикъетдив килигзава.

¹⁶ Куьмек жедач пачагьдиз чӀехи кьушундикай, зурба къуватди хуьдач пагьливан.

¹⁷ Хилас хьун паталди балкӀандикни кутаз жедач умудар, хиласдач ада вичин къуватдив.

¹⁸ Ингье Ребби килигзава кичӀедайбуруз Вичихъай, кутунвайбуруз умуд Адан регьимдик,

¹⁹ хиласда лугьуз Ада чеб ажалдикай, фу гуда лугьуз чпиз кашан вахтунда.

²⁰ Кутазва чна Реббидик умуд, Ам чаз куьмек, къалхан я.

²¹ Адалди чи рикӀер шад я, куьз лагьайтӀа чна умуд кутазва Адан пак ТӀварцӀик.

²² Ребби, Ви муьгьуьббат чахъ галаз хьурай, куьз лагьайтӀа чна Вак умуд кутазва.