Забур 30 - Пак Калам

Аллагьдин гъиликай далда кьун

¹ Манидаррин чӀехидаз. Давудан мани.

² Я Ребби, за жагъурзава Вакай далда, заз садрани регъуь жервал ийимир! Хас тирвал Ви гьахъвилиз азад ая зун!

³ Яб акала захъ, тади къачу хиласиз зун. Хьухь зун патал катдай чка, къеле хьухь, ана чуьнуьх жервал завай!

⁴ Вун зи къеле, зи раг я, Жуван тӀварцӀин хатурдай зун твах ва заз рехъ къалура!

⁵ Зал чинеба вегьенвай чилинай зун акъуда, зун паталди кӀеле Вун я хьи.

⁶ За Ви гъиле твазва зи чан, На азадна зун, я Ребби, гьакъикъатдин Аллагь.

⁷ Усал бутриз гьуьрметдайбур заз аквадай вилер авач, за анжах Реббидик кутазва умуд.

⁸ За шадвалзава, хвешивалзава Ви гьакъикъи муьгьуьббатдал, куьз лагьайтӀа Ваз зи дерт-гъам акуна ва чир хьана зи хажалат.

⁹ На тунач зун душмандин гъиле, Вуна зун генг чкадал акъудна.

¹⁰ Заз четинзава, я Ребби! Регьим ая заз, хажалатдик зайиф хьанва вилер зи, зи рикӀни жигер.

¹¹ Хажалатда куьтягь жезва уьмуьр зи, сузада ава йисар зи. Зи къуватар куьтягь хьанва зи гунагьриз килигна, кӀарабар зи кьуранва.

¹² Душманри зи намусдик хкуьрзава, гьакӀ хъуьрезва къуншиярни. Хьанва жуван дустаризни буьуь зун, куьчеда низ акуртӀа зун, катзава.

¹³ Алуднава абуру зун, кьейиди хьиз, рикӀелай, ханвай къаб хьиз ава зун.

¹⁴ Буьгьтендин ван къвезва заз гзафбурувай. Виринрихъай кичӀевал ава, заз акси яз абур икьрар жедайла, акъуддайла фенд зи уьмуьр къакъудун патал.

¹⁵ За лагьайтӀа, я Ребби, Вак кутазва умуд, лугьузва: «Вун Аллагь я зи!»

¹⁶ Ви гъилева йикъар зи, азада зун душманрикай ва зи геле къекъвезвайбурукай.

¹⁷ Ви чини нур гуз хьурай лукӀрал Ви, Ви регьимдиз хас тирвал куьмек це заз.

¹⁸ Ваз эверна лугьуз, заз регъуь тахьуй, я Ребби. Небгетриз регъуь хьурай, лал хьана, аватрай агъа дуьньядиз.

¹⁹ Абурун таб гвай сивер липӀ хьурай, гьахъ-михьибурукай терсвилелди, лавгъавал гваз, такӀанвилелди рахазвай.

²⁰ Вуч зурба я няметар Ви, Вакай кичӀе тирбур патал На хуьзвай! Аквадайвал инсанрин веледриз Вуна абур багъишзава Вакай далда кьаз кӀанзавайбуруз.

²¹ Фендерикай инсанрин Вуна абур чуьнуьхзава пердедик ви мукьвавилин. Вуна абур Жуван КӀвале хуьзва къал гвай мецерикай.

²² Шукур хьуй Ваз, я Ребби, аламатдин регьим заз къалурай Зун авай чӀавуз элкъуьрна кьунвай шегьерда.

²³ Велвелада за жуван ийизвай фикир: «Яраб зун вавай къакъуднава жал?» Амма ван хьана зи дад-бидаддин Ваз, за ваз минет авурла.

²⁴ Вафа гвай халкь, кӀан хьухь Ребби! Вафа гвайбур хуьда Ада, амма гъукь гвайбурув агакьарда ацӀай эвез.

²⁵ Мягькем хьухь, уьтквем ая рикӀер куь, Вирибур, Реббидик кутазвай умуд!