Забур 26 - Пак Калам

Аллагьдал ихтибар авун

1 Давудан дуьа.

¹ Давудан дуьа. Ребби – зи экв, зи куьмек – никай кичӀе хьурай заз? Ребби – зи уьмуьрдин къеле – никай къурху хьурай заз?

² Зал атайла небгетар, зи як тӀуьн патал, зи душманар, мидяяр зи къарагъайла зал, – абур татаб жеда, абур алукьда.

³ Кьушунди зун элкъуьрна кьурай, – зурзадач зи рикӀ; заз акси яз къарагърай дяве, – гьа чӀавузни хуьда за секинвал.

⁴ Тек са тӀалабун ийида за Реббидиз, са гьам за жагъурзава: Реббидин КӀвале завай амукьиз жедайвал хьуй зи уьмуьрдин вири йикъара, къенивилиз Реббидин завай килигиз жедайвал хьурай, Адан Ибадатханада жавабрихъ зун къекъведайвал хьуй.

⁵ Бедбахтвилин юкъуз Ада гуда Вичин патав заз далда, чуьнуьхда зун пердедик Алачухдин Вичин Пак, хкажда зун рагал.

⁶ Гьа чӀавуз зи кьил вине жеда зун элкъуьрна юкьва тунвай душманрилай, Алачухдив Адан Пак къурбандар гуда за, шаддиз гьарайиз, мани лугьуз, макьам яда Реббидиз.

⁷ Ван ша, я Ребби, за эверайла, регьим ая заз, жаваб це.

⁸ Зи рикӀе Ви гафарин ван ава: «Зун жагъуриз алахъа!» Я Ребби, зун къекъведа Вахъ.

⁹ Жуван чин закай ийимир чуьнуьх. Хъиле гьатна, жуван лукӀ кьулухъмир, Вун я куьмек хьайиди заз. Зун кьулухъмир, гадармир зун, я Аллагь, зун Азад ийидайди!

¹⁰ Гадаррай зун бубади, дидеди, амма Реббиди зун ийида кьабул.

¹¹ Я Ребби, заз чира Ви рехъ, твах зун дуьз рекьяй, зи душманар лал хьун патал.

¹² Зун зи душманрин гъиле вугумир, куьз лагьайтӀа заз акси яз рахазва тапан шагьидар ва хъел кваз къачузва нефес.

¹³ Амма зун чӀалахъ я: Реббиди гудай хъсанвал заз чан алайбурун и чилел аквада.

¹⁴ Умуд кутур Реббидик, мягькем хьухь, рикӀни жуван уьтквема, умуд кутур Реббидик!