Забур 25 - Пак Калам

Рехъ къалурунай Аллагьдиз дуьа

1 Давудан дуьа.

¹ Давудан дуьа. Я Ребби, зун гьахъ ая, – за рехне квачир уьмуьр тухванай. Реббидик за умуд кутунай, татаб жедач зун.

² Кьил акъуд зай, я Ребби, синагъ ая зун, чир ая зи рикӀни акьул.

³ Ви муьгьуьббат датӀана зи вилик ква, Ви гьакъикъатдик кваз физва зун.

⁴ Тапан инсанрихъ галаз ацукьзавач зун, фендигаррихъ галазни рекье фидач зун,

⁵ такӀан я заз небгетрин кӀватӀални, гунагькаррихъ галазни зун ацукьдач.

⁶ Михьивилин лишан яз чуьхуьда за жуван гъилер, къурбангандал элкъведа Ви, я Ребби,

⁷ Ваз шукурдин мани лугьуз ва ван алаз рахаз Ви вири аламатрикай.

⁸ Ребби, заз кӀан хьана Вун авай КӀвал, Ви баркалла авай чка.

⁹ Гунагькаррихъ галаз телеф мийир зунни, терг ийимир зи уьмуьр ивидихъ къаних тирбурухъ галаз,

¹⁰ чӀуру крар гъиле авай, эрчӀи гъилер ришветривди ацӀанвай.

¹¹ Амма уьмуьр тухузва за рехнеяр квачиз, азад ая зун, регьим ая.

¹² Дуьм-дуьз чилел акъвазнава кӀвачер зи, халкь кӀватӀ хьанвай чкада за Реббидин тарифзава.