Забур 24 - Пак Калам

Гъил къахчунин дуьа

1 Давудан дуьа.

¹ Давудан дуьа. Аллагь зи, за дуьада рикӀ Ви патав хкажзава.

² Беябур тахьурай зун, зи Аллагь, за Вак кутазва умуд, гъалибвилин шадвал тахьуй душманриз зи.

³ Вак умуд квайбурукай садазни регъуь жедач са чӀавузни, айибдик акатрай себеб авачиз масадбуруз хиянатвал ийирбур.

⁴ Герен-герен, я Ребби, заз къалур ая рекьер Ви, чир ая заз хулер Ви.

⁵ Гьакъикъат Ви ая На заз насигьат, чир ая заз, куьз лагьайтӀа Аллагь язва Вун заз куьмекдай, датӀана Вак ква зи умуд.

⁶ Дад, я Ребби, рикӀел хкваш, Жуван регьим, муьгьуьббат, куьз лагьайтӀа ава абур сифтедилай.

⁷ Жегьил чӀаван зи гунагьар, зи гъалатӀарни хкимир рикӀел. Жуван гьакъикъи муьгьуьббатдивди зун рикӀел хкваш, куьз лагьайтӀа Вун хъсанди я, я Ребби.

⁸ Зи Ребби я хъсанди, гьахъдини я Ам, гьакӀ тирвиляй гунагькарар твазва дуьз рекье.

⁹ ИкӀ Ада муьтӀуьгъбур гьахъ авайнихъ рекье твазва, Вичин рекьер чирзава абуруз.

¹⁰ Муьгьуьббат я вири рекьер Реббидин, гьакъикъат я хуьзвайбуруз Адан пак тир Икьрарни, шагьидвилерни.

¹¹ На гъил къахчу зи гунагьрилай, гзаф ятӀани, Ви тӀварцӀин хатурдай, я Ребби.

¹² Реббидикай кичӀедай инсан вуж я? Реббиди къалурда адаз гьи рехъ хкядатӀа.

¹³ Саламатвиле ада уьмуьр тухуда, чил амукьда адан эвледриз.

¹⁴ Тирбуруз кичӀе Реббидихъай талукь я Адан меслят, Ада абуруз Вичин Икьрар ахъайзава.

¹⁵ ТатӀуз ара зи вилер элкъвенва Реббидихъ, куьз лагьайтӀа акъудзава Ада зи кӀвачер чилинай.

¹⁶ Умундиз килиг заз, регьим гваз, куьз лагьайтӀа текни я зун, азабдикни ква.

¹⁷ Уьмуьрда артух хьанва хажалатар рикӀин зи, баладикай хилас жез куьмек це.

¹⁸ Фелек килиг зи азабриз, зи азиятриз, гъил къахчу зи вири гунагьрилайни.

¹⁹ Хиянаткар душманар, заз гьикьван гзаф аватӀа, килиг, гьихьтин къати нифретдалди абуруз зун такӀан я!

²⁰ Хьухь заз куьмек, хуьх зи уьмуьр, хкуда зун айибдикай, куьз лагьайтӀа далда хьанва заз Вакай.

²¹ ЧӀуру са лишанни зак тахьуни ва дуьзвили хуьрай зун, куьз лагьайтӀа за Вак умуд кутазва.

²² Я Аллагь, хилас ая Исраил вири бедбахтвилерикай!