Забур 21 - Пак Калам

Теспача касдин гьарай

¹ Манидаррин чӀехидаз. «Мирг экуьн ярал» манидин макьам ягъиз. Давудан мани.

² Я Аллагь, я Аллагь, вучиз На зун гадарна? Вучиз, за Ваз эвердайла куьмекдиз, Акъвазнава яргъа Вун?

³ Аллагь зи, за юкъуз минет ийизва – яб гузвач Вуна, минетзава йифиз за – авач заз са секинвал.

⁴ Вун Пакди я, ацукьнавай тахтуна Исраилдин тарифрин!

⁵ Чи бубайри Вак кутазвай умуд, кутазвай умуд, Вунани абур ийизвай хилас.

⁶ Абуру Ваз минетзавай, хиласвал къачузвай чпиз, Вак умуд кутазвай, беябурни жезвачир.

⁷ Зун лагьайтӀа, квак я, инсан туш, русвагь хьанва инсанриз, халкьдизни зун аквадай вилер авач,

⁸ зун аквазвай вирибуру закай ягьанатар ийизва, зи намусдик хкуьрзава, нифретдив галтадзава кьилерни:

⁹ «Ада Реббидик кутунай умуд, Гьада ам хиласрай, ам Адаз хуш ятӀа».

¹⁰ Амма Вуна, зун дидедин акъудайди руфунай, зун дидедин хурухъ галамаз Вуна умуд гана заз.

¹¹ Хайидалай инихъди зун Вав тунва; зун руфуна хьайидалай инихъди Вун зи Аллагь я.

¹² Закай яргъа жемир, вучиз лагьайтӀа мукьвал ала бедбахтвал, авач куьмек гудайди.

¹³ Гзаф жунгав алтӀуш хьанва зал, зун Башандин яцари мягькем элкъуьрна кьунва.

¹⁴ Залди сивер ахъайна, гьарайзава, асланди хьиз, гъуьрч къазунзавай.

¹⁵ Зун, яд хьиз, авахьна, зи кӀарабарни чкӀана вири; зи рикӀикай мум хьана, цӀрана хура;

¹⁶ зи къуватар кьурана, сахси хьиз, сивин къавук ккӀана мез; На зун ажалдин руквада туна.

¹⁷ КицӀери зун юкьва тунва, писбурун кӀеретӀ алтӀуш хьанва зал, тӀвек-тӀвекнава зи гъилерни кӀвачер.

¹⁸ Жуван вири кӀарабар жеда завай гьисабиз, а ксар заз килигзава, шадвалзава зи гьалдал.

¹⁹ Абуру зи парталар пайна чпин арада, зи парталрин паталай чип вегьенай абуру.

²⁰ Амма Вун, я Ребби, жемир закай яргъаз, зи къуват, заз куьмек гуз ая гьерекат.

²¹ Туруникай хилас ая зун, зи уьмуьр хуьх кицӀерикай.

²² Асландин сивикай хиласа зун, чӀурун жунгаврин крчарикайни. Са чара аку!

²³ Ви тӀварцӀикай хабарда за зи стхайриз, кӀватӀалдани тарифда Ви.

²⁴ Тариф ая Реббидин, кичӀезвайбур Адакай! Машгьур ая Адан тӀвар, эй Якьубан эвледар вири! Гьуьрмета Адаз, Исраилан эвледар вири,

²⁵ вучиз лагьайтӀа инкарнач Ада, я кваз такьур кар хьанач азаб чӀугвазвайдан хажалат. Ада Вичин чин чуьнуьхнач адакай, куьмек тӀалаб ийизвай гьарайдиз яб гана.

²⁶ ЧӀехи кӀватӀалда тарифда за Ви, вилик Вакай кичӀебурун акъудда жуван вядер кьилиз за.

²⁷ Кесибри фу нез жеда ва тух жеда, Реббиди жагъур ийизвайбуру тарифда Адан. Куь рикӀери уьмуьр тухуй асирра!

²⁸ Чилин вири уьлквейри рикӀел гъида Ребби, элкъведа Адахъ, Адан вилик икрамда яд чилерин вири халкьари,

²⁹ вучиз лагьайтӀа пачагьлугъ ава Реббидихъ, Ада халкьарал агъавалзава.

³⁰ Чилин девлетар авай вирида Адан вилик икрамда, руквадик руг хъижедай кьван вирибуру, уьмуьр кьуна акъвазардай гьукум чпив гвачирбуру икрамда Адаз.

³¹ Эвледри Адаз къуллугъ ийида, къведай несилриз суьгьбет ийида Агъадикай.

³² Хабар гуда хадайбуруз гуьгъуьнай, ихтилатда Адан гьахъ-михьивиликай ва Ада вуч авунатӀа, гьадакай.