Забур 17 - Пак Калам

Аллагьдин куьмекдиз шукур авун

¹ Манидаррин чӀехидаз. Реббидин лукӀ Давуда вич вири душманрикайни Шаулан гъиликай Реббиди азад авурла, Адаз авур дуьа.

² Давуда лагьана: – Заз кӀанда Вун, я Ребби, къуват зи!

³ Ребби раг я зи, мягькем къеле я зи, зун азад ийидайди я, Зи Аллагь я зи дагъдин чарх, Адавай за жуваз далда жагъурзава. Ам зи къалхан я, азаддай къуват я, зун кӀевирдай чкани я.

⁴ Тарифуниз лайих тир Реббидиз за минетзава, Душманрикай хилас жеда зун.

⁵ Алчуд хьанва зал ажалдин зунжурар, зид тир селлери зак кичӀ кутунва.

⁶ Агъа дуьньядин зунжурар аруш хьанва зал, ажалдин чилина гьатнава зун.

⁷ Жуван завалда за Реббидиз эверна; заз куьмек гун паталди за эверна Аллагьдиз жуван; Вичин Ибадатханада Адаз зи ван хьана: зи эвер япув агакьна Адан.

⁸ Чил зурзана, къарсат хьана, юзана дагъларин ценерни, зурзана, куьз лагьайтӀа Реббидиз хъел атанай.

⁹ Адан нерин хилерай гум акъатна хкаж жез, Адан сивяй цӀай акъатна туькьуьмдай, Адакай цӀай квай жуьгьенар кӀвахьзавай.

¹⁰ Ам, цавар алгъурна, агъуз эвичӀна, мичӀ ква Адан кӀвачерик.

¹¹ ХерупӀрал алаз, лув гана Ада, хкаж хьана лувараллаз Ам гарун.

¹² Ада Вичихъ галчукна мичӀ, перде хьиз, цавун чӀулав циферин ятар кӀевна.

¹³ Ада гузвай рапрапдик цӀун жуьгьенар куькӀвена, хар акатна, цӀайлапанар сух жез цавун циферай.

¹⁴ Къукърумарна Реббиди цавара, виридалайни Виневайдан ван акъатна, харцихъ галаз цӀун жуьгьенар какахьна.

¹⁵ Вичин хьелер ахъайна Ада, душманар чукӀурна, цӀайлапандив яна, Ада абур кукӀварна.

¹⁶ Ахъа хьана ятарин чешмеяр, кьецӀил хьана алемдин бинеяр Ви ахмурдикди, я Ребби, нефесдикди Ви.

¹⁷ Цаварай Ада гъил яргъи авуна, къахчуна зун, акъудна зун Ада дерин ятарай.

¹⁸ Ада зун зурба душмандикай хиласна ва зун такӀанбурукай залай гзаф гуж авай.

¹⁹ Зи бедбахт юкъуз абуру зал вегьена, амма Ребби заз даях хьана.

²⁰ Ада зун генг чкадиз акъудна, Ада зун хиласна, куьз лагьайтӀа зун Адаз кӀандай.

²¹ Реббиди зи гьахъвилиз килигна заз пай гана, зи гъилерин михьивилиз килигна заз пай гана, савкьват гана заз,

²² гьикӀ лагьайтӀа, за Реббидин рекьер хуьзвай, элкъуьрначир далу за Аллагьдин вилик.

²³ Адан вири къайдаяр зи вилик ква, за Адан къалурнавай къайдаяр гадарнач.

²⁴ Адан вилик са рехнени квачиз зак, хуьзвай за жув гунагьдикай.

²⁵ Реббиди заз зи дуьзвилиз килигна пай гана, зи гъилерин михьивилиз килигна заз пай гана.

²⁶ Вафа гвайдаз Вун ачух жезва вафа гваз, рикӀин сидкьи къалурайдаз – рикӀин сидкьи къалуриз,

²⁷ михьидазни – михьиди яз, фендигарриз Вуна чпин фендерив кьурвал ийизва.

²⁸ Куьз лагьайтӀа На муьтӀуьгъбур хилас ийизва, амма кьама ял авайбур алчахарзава.

²⁹ Вуна зи чирагъ куькӀуьрзава; Реббиди, зи Аллагьди, зи мичӀ экуь ийизва.

³⁰ Вун куьмек яз за кукӀварна кьушун, зун зи Аллагь галаз цлалай элячӀда.

³¹ Аллагь! – Адан рехъ тамамди я; Реббидин гаф михьиди я. Вичикай далда кӀанзавай вирибуруз Ам къалхан я.

³² ГьикӀ лагьайтӀа Реббидилай гъейри мад вуж я Аллагь? Чи Аллагьдилай гъейри раг вуж я?

³³ Аллагьди зи юкьва къуватдин чӀул твазва, Ада зи рехъ дуьзди ийизва.

³⁴ Ада зи кӀвачер миргинбур хьиз ийизва, зун зи кьакьанрал акъвазариз,

³⁵ зи гъилериз дяве ийиз чирзава, зи дамарар тӀарамзава, чӀемерук хьиз буьруьнждин.

³⁶ На вугана зав къалхан Ви хиласвилин, кьуна хьиз зун эрчӀи гъилив; Ви регьимди зи дережа ийизва виниз.

³⁷ Вуна зи кам ийизва гьяркьуь, тахьун паталди зи кӀвачер татаб.

³⁸ Зун геле гьатна душманрин жуван, агакьарна абурув, тергдалди абур кьулухъ элкъвенач.

³⁹ За кукӀварна абур, кӀвачерик кутуна, къахрагъдач абур, абур зи кӀвачерик аватна.

⁴⁰ Дяве патал къуват гузва Вуна заз, зал къарагъай душманар На зи кӀвачик вегьизва.

⁴¹ Заз далу гуз туна Вуна душманрив, за тергна зун такӀанбур.

⁴² Минетнай абуру куьмекдихъ, амма абур хиласдай сад хьанач, абуру Реббидиз тавакъу авуна, амма Ада жаваб ганач.

⁴³ За душманар чукӀурна, чилин руг хьиз гару тухвай, абуруз за куьчеда авай палчухдиз хьиз кӀур гана.

⁴⁴ Вуна инсанрин гъулгъуладикай хиласна зун, чара халкьариз Вуна закай кьил авуна, заз течидай халкьари заз къуллугъзава.

⁴⁵ Яд чилерин инсанри зи вилик кьил агъуззава, закай жизви ван хьунни заз муьтӀуьгъ жезва.

⁴⁶ Абур руьгьдай аватнава, экъечӀзава зурзаз-зурзаз абур чпин къелейрай.

⁴⁷ Реббидал чан ала! Шукур хьурай зун хуьзвайдаз! Тарифар авурай зун хилас ийидай Аллагьдин,

⁴⁸ Ам Аллагь я, зи кьисас къахчудай, халкьарни муьтӀуьгъардай,

⁴⁹ зун душманрикай хилас ийидай! На зун мидядин винел хкажна, зун дарда турбурукай хиласна Вуна зун.

⁵⁰ И кардай, я Ребби, за маса халкьарин арада шукур гъида Ваз, за Ви тӀварцӀин тарифдин мани лугьуда.

⁵¹ Вичин пачагьдиз Ада чӀехи гъалибвилер гузва, ийизва регьим Вичин гуьцӀуьрдаз – Давудазни адан тухумдиз даим яз.