Забур 149 - Пак Калам

Сигьанди Реббидин тарифрай

¹ Тариф ая Реббидин! лагь Реббидиз цӀийи мани, Адав тариф агакьара вафа хуьзвайбурун кӀватӀалда.

² Шад хьурай Исраил Халикьдал вичин, хвешивал авурай Сигьандин рухвайри Пачагьдал чпин.

³ Абуру кьуьлералди тариф авурай тӀварцӀин Адан, мани лугьурай Адаз тафтни кинур ягъиз.

⁴ Вичин халкьдин хатур хуьзва Реббиди, Вичив гвай хиласвилив чӀехи ийизва умунбур.

⁵ Адаз вафа хуьзвайбур баркалла алаз шад хьурай, абуру хвешидаказ мани лугьурай чпин месерилай.

⁶ Аллагьдин тариф хьурай абурун мецерал, абурун гъиле хьуй кьве мурцан хци тур,

⁷ халкьарилай кьисас къахчун, абуруз жаза гун паталди,

⁸ абурун пачагьар зунжурралди кутӀунун паталди, абурун гьакимар ракьун бухавра тун паталди,

⁹ абуруз атӀанвай кар кьиле тухун паталди Реббидин гаф тирвал. Гьа им гьуьрмет къачун я Адаз вафа хуьзвай вирибуруз. Тариф ая Реббидин!