Забур 146 - Пак Калам

Тарихдани тӀебиатда Аллагьдин зурбавал

¹ Тариф ая Реббидин! Вуч хъсан я манидалди тариф авун чи Аллагьдин, вуч хъсан я ширин ва кутугай тариф авунин.

² Ярусалим эхцигзава Реббиди, кӀватӀ хъийизва Исраилдин суьргуьнар.

³ Ада дири хъийизва рикӀер ханвайбур, абурун хирер кутӀунзава,

⁴ гьисаб ийизва гъетерин кьадар, тӀварар гузва абуруз вирибуруз.

⁵ Чи Агъа чӀехи я ва къудрат авайди я, Адан акьулдиз чидач сергьятар.

⁶ Умундаз куьмек гузва Реббиди, небгет гьалчзава чилел.

⁷ Шукур авуналди мани лагь Реббидиз, кинур ягъ чи Аллагьдиз.

⁸ Ада цав кӀевзава циферив, чил патал марф гьазурзава, дагъларал векьив экъечӀиз тазва,

⁹ недайди гузва гьайванриз ва гьарайзавай шарагриз кӀвагъран.

¹⁰ Ам балкӀандин къуватдал туш шад жезвайди, я аскеррин кӀвачеринни зирингвилел,

¹¹ майилзава Реббиди кичӀебуруз Вичикай, умуд кутазвайбуруз Вичин регьимдик.