Забур 145 - Пак Калам

Аллагьди зайифбур хуьн

¹ Тариф ая Реббидин! Тарифа, зи рикӀ, Реббидин!

² Вири жуван уьмуьрда за тарифда Реббидин; аламай кьван зал чан манидалди тарифда за зи Аллагьдин.

³ Умуд кутамир гьакимрик, ажал галайбурук, чпе хиласвал авачир.

⁴ Абурун чан хкатайла, элкъвена абурукай накьв хъжезва, гьа юкъуз абурун вири къастар квахьзава.

⁵ Бахтавар я, низ Якьубан Аллагьди куьмек гузвайди, далу акалзавайди Реббидихъ, вичин Аллагьдихъ,

⁶ халкь авурдахъ цавни чил, гьуьлни ана авай кьван вири, вафа турди Реббидиз, Вичихъ далу акализ жедай даим яз.

⁷ Ада пад кьазва дарда тунвайбурун, гишинбуруз тӀуьн гузва. Къазаматда тунвайбур ахъайзава Реббиди.

⁸ Буьркьуьбурун вилер ахъайзава Реббиди. Реббиди агъуз аватнавайбур хкаж ийизва. Реббидиз кӀанда гьахъ-михьибур.

⁹ Реббиди хуьзва масанай атана ацукьнавайбур, етимризни хендедайриз куьмек гузва, амма атӀузва небгетрин рехъ.

¹⁰ Реббиди пачагьвал ийида датӀана, Сигьан, ви Аллагь несилдилай несилдалди я. Тариф ая Реббидин!