Забур 143 - Пак Калам

Пачагьдин дуьа

1 Давудан дуьа.

¹ Давудан дуьа. Шукур хьуй Ваз, я Ребби, Раг зи, дяве ийиз вердишзавай гъилер зи, ягъунар кьаз – тупӀар зи.

² Зи регьим, зи къеле, зи далда, зи хиласкар, зи къалхан, Вичивай заз далда кӀанзавайди, Заз зи халкь табий ийизвайди.

³ Инсан вуч я кьван, я Ребби, Вуна адан къайгъу чӀугваз? Вуч я кьван ажал галайди, Вуна адаз дикъет гуз?

⁴ Инсан ухшар я гарун юзуниз, хъфизвай хъен хьиз адан йикъар я.

⁵ Ребби, алгъура цавар, эвичӀа, хкӀукӀ дагъларик, абурай гум акъатда.

⁶ Гадра цӀайлапан, чукӀура абур, Жуван хьелер ахъая, чукура абур.

⁷ Яргъи ая кьакьандай Жуван гъил, азад ая зун, хиласа зун церикай чӀехи, гъилерикай яд чилерин веледрин,

⁸ абурун сивери таб ийизва, абурун эрчӀи гъил – гъил я алцурунин.

⁹ За Ваз, Аллагь, цӀийи мани лугьуда, Ви тарифда цӀуд сим алай арфа ягъиз.

¹⁰ Пачагьриз куьмек гузвайда Вичин лукӀ Давуд хилас ийизва ажал гъидай туруникай.

¹¹ Азад ая зун, хиласа зун гъилерикай яд чилерин веледрин, абурун сивери таб ийизва, абурун эрчӀи гъил – гъил я алцурунин.

¹² Чи рухваяр чӀехи хьурай, жегьил тарар хьиз, чи рушарни ухшар хьурай тавханайра авай дигай гулариз;

¹³ чи гьамбарханаяр ацӀана хьурай, гьар жуьредин ризкьи бул яз; чи яйлахра агъзурралди хпер хуьрай;

¹⁴ кӀвалах патал куьк хьурай яцар чи; чи жугъунра тахьурай тӀеквенар, я шел-хвал тахьурай чи куьчейра.

¹⁵ Вири гьа икӀ язвай халкь бахтавар я, вичин Аллагь Ребби тир халкь бахтавар я!