Забур 139 - Пак Калам

Аллагьди небгетрикай хуьн паталай дуьа

¹ Манидаррин чӀехидаз. Давудан мани.

² Хилас ая, Ребби, зун и пис касдикай, зун хуьх дарда твазвайдакай.

³ Абуру рикӀе чӀуру къаст тунва, датӀана дяведиз гьазур я.

⁴ Чпин кӀирер, гъуьлягъри хьиз, хци ийизва, абурун сивел агъу ала гуьрзедин. Макьамдин ара

⁵ Хуьх зун, я Ребби, небгетрин гъилерикай, къакъуда зун, зи кӀвачер татабиз, зун дарда тваз кӀанзавайбурукай.

⁶ Кьама ялар авайбуру зун паталди туькӀуьрнава желени кемен, рекьел чил къянава, эцигнава ракьар заз. Макьамдин ара

⁷ За Реббидиз лагьана: «Вун я зи Аллагь, зи дад-бидадриз яб це тӀун, я Ребби!

⁸ Агъа, Ребби, зи хиласвилин къуват, дяведин юкъуз Вуна зи кьил кӀевирна.

⁹ Ийимир, Ребби, небгетриз кӀандайвал, абурун чӀуру къастуниз агалкьун гумир, абурук дамах акат тийирвал». Макьамдин ара

¹⁰ Зал алтӀуш хьанвайбурун кьилерал атуй чпин мецери лагьай бедбахтвал.

¹¹ Къурай абурал кузвай жуьгьенар, абур цӀуз аватрай, дерин дагьардиз, мад хкаж техжервал.

¹² ЧӀуру мез авай касди чилел чка кьун тавурай: зун дарда твазвайдав писвал вичив агакьда вич телеф ийиз.

¹³ Заз чида, Реббиди кесибар патал дуван ийида, муьгьтежбурун пад кьада.

¹⁴ РикӀивайни, гьахъ-михьибуру шукур гъида тӀварцӀиз Ви, Вун авай чкада амукьда дуьзбур.