Забур 108 - Пак Калам

Четинвиле инсандин арза

1 Манидаррин чӀехидаз. Давудан мани.

¹ Манидаррин чӀехидаз. Давудан мани. Кис мийир, Аллагь, ийизвайди тариф за,

² куьз лагьайтӀа небгетри, фендигарри чпин сивер заз акси яз ахъайнава, захъ галаз рахазва тапан чӀалалди.

³ Элкъуьрна кьунва зун такӀанвилин гафарив, са себебни авачиз вегьенва зал.

⁴ Заз абур кӀан ятӀани, захъ галаз душманвал ийизва абуру, амма за жув вугузва дуьадив.

⁵ За авур хъсанвиляй зав писвал вахгузва, зи муьгьуьббатдай вахгузва такӀанвал.

⁶ Адан кьилел дуванбег яз небгет кас эцига, адан эрчӀи гъилихъай ацукьрай тахсирар къалурзавайди.

⁷ Тахсир квайди хьурай ам дуванда, адан дуьа гунагь яз гьисабрай.

⁸ Адан йикъар куьруь хьурай, масада къахчурай адан къуллугъни.

⁹ Етим хьурай аялар адан, адан паб хьуй хендеда.

¹⁰ Сиягь хьурай адан аялар, саилвализ хьуй, чпин кӀвалин харапӀайрив фу тӀалабиз хьуй.

¹¹ Адахъ вуч аватӀа къахчурай бурж вугайда, ада чӀугур зегьметдин майваяр чарабуру чуьнуьхрай.

¹² Тахьурай адан язух къведайди, регьим ийирди адан етимриз.

¹³ Терг хьуй адан эвледар, квахьрай адан тӀвар къвезвай несилда.

¹⁴ Реббидин вилик рикӀел хкурай небгетвал адан бан-бубайрин, рикӀелай тефирай гунагь адан дидедин.

¹⁵ И гунагьар хьуй даим Реббидин вилик, терграй Ада рикӀел хкунар небгетдин бан-бубаяр,

¹⁶ куьз лагьайтӀа небгетдин хиялдани авачир регьим къалурун, ам рикӀер ханвай кесибрин ва саилрин геле къекъвезвай, абур суруз чӀугун патал.

¹⁷ Лянет ийиз кӀандай адаз – адахъ вичихъ галукьда ам, рухсат гуз кӀандачир – вич адакай жеда магьрум.

¹⁸ Алчуд жеда адал лянет, партал хьиз, лянет адан къенез гьахьда, яд хьиз, чӀем хьиз, гьатда адан кӀарабра.

¹⁹ Лянет адахъ галчук хьурай, либас хьиз, ам кӀевирзавай, чӀул хьиз хьурай, адан юкь кьунвай датӀана.

²⁰ Зи душманриз, зи аксина пис рахазвайбуруз Реббиди гудай пай гьа им я.

²¹ Вуна, лагьайтӀа, я Ребби, Агъа, Жуван тӀварцӀин хатурдай ая заз са хъсанвал, Ви регьимдалди хилас ая зун.

²² Зун кесиб я, саил я, зи рикӀе хер ава.

²³ Зун квахьзава, хъфизвай хъен хьиз, зун, цицӀер хьиз, чукурзава.

²⁴ Сив хуьнивай зайиф хьанва метӀер зи, цӀранва зи беденни.

²⁵ Зун абуру хъуьруьнриз вегьенва: зун акурла, такӀанвилив галтадзава кьил.

²⁶ Куьмек це заз, я Ребби, Аллагь зи, хиласа зун Ви регьимдалди

²⁷ им Ви гъил тирди чир хьун паталди, и кар Вуна авурди чир хьун паталди.

²⁸ НегьайтӀани зун, Вуна рухсат це заз, абуруз регъуь жеда акси жез. Ви лукӀ, лагьайтӀа, шад жеда.

²⁹ Зи душманар акатда русвагьдик, айиб алчуд жеда абурал, партал хьиз.

³⁰ Зи мецелай кӀевидаказ шукурда за Реббидиз, гзаф инсанрин арада за Адан тарифда,

³¹ вучиз лагьайтӀа Ам акъвазнава эрчӀи патахъай кесибдин ам хиласун паталди адак тахсирар кутазвайбурукай.