Забур 105 - Пак Калам

Аллагьдин берекат ва Исраилди шукур тавун

¹ Тариф ая Реббидин! Шукур ая Реббидиз, вучиз лагьайтӀа Ам хъсанди я, Адан регьимни даим я!

² Нивай жеда къалуриз Реббидин къудрат, нивай Адан вири баркалладикай хабар гуз жеда?

³ Бахтавар я гьахъ-дувандин пад кьазвайбур, вири вахтара гьахъ крар ийизвайбур.

⁴ РикӀел хкваш зун, Ребби, Жуван халкьдихъ къалурдайла майилар, Вуна абур хиласдайла,

⁵ зазни са куьмек це, Вуна хкягъайбурун хушбахтвал акун патал, Ви халкьдихъ галаз шад хьун паталди, Ви ирсинал дамах авун паталди.

⁶ Гьам чнани, гьам чи бан-бубайрини гунагьар авуна, къанунсузвилер авуна, небгетдаказ тухвана чеб.

⁷ Чи бубаяр акьунач гъавурда Мисрида На къалурай аламатрин, Ви регьимдин булвал алудна рикӀелай, НацӀун гьуьлуьн патав абуру гъулгъула авуна.

⁸ ЯтӀани Ада Вичин тӀварцӀин хатурдай абуруз куьмек гана Вичин къудрат къалурун паталди.

⁹ НацӀун гьуьлуьз кьве пай хьунухь эмирна Ада, адай кьур акъатна, абур Ада тухвана дериндай гьуьлуьн, кьурумдайтӀуз хьиз.

¹⁰ Абур такӀанбурун гъиликай хиласна абур, душмандин гъиликай азадна абур.

¹¹ Цик акатна абурун душманар, амукьнач садни.

¹² Гьа чӀавуз агъуна абур Адан гафарихъ, Адаз тарифдин мани лагьана.

¹³ Амма фад алудна рикӀелай крар Адан, вилив хвенач меслят Адан.

¹⁴ Абурук кьурумда зурба каш акатна, кьурумда синагъна Аллагь.

¹⁵ Абуруз кӀандайди гана, амма абурал тӀегъуьн ракъурна.

¹⁶ Кундал абуру пехилвална Мусадал, Реббидин пак хахам тир Гьарунални.

¹⁷ Чил ахъа хьана, Датан туькьуьнна, гьакӀ Абираман вири шерикарни.

¹⁸ КуькӀвена цӀай абурун арада, кана ялавди небгетар.

¹⁹ Харебдал кӀалуб авуна данадин, бутрин кӀалубриз икрам авуна,

²⁰ Ребби, абурун баркалла, дегишна векь незвай жунгавдин шикилдихъ.

²¹ РикӀелай алудна Аллагь, чпин Хиласкар, Мисрида чӀехи крар авурди,

²² аламатар авурди Хаман чилерал, кичӀ кутадай крар авурди НацӀун гьуьлуьв.

²³ Гьавиляй Ада Вичи абур терг авун кьетӀна, Ада хкягъай Мусади абурун пад кьуначиртӀа Адан вилик Адан гъазаб алудун паталди, Ада абур терг тавун паталди.

²⁴ Мурад авур чил абуру кваз кьунач, чӀалахъ хьанач Ада гайи гафунин,

²⁵ къалурзавай наразивал чпин алачухрик, Реббидин ванциз ябни гузвачир.

²⁶ Гьавиляй абурун аксина Ада Вичин гъил хкажна абур барбатӀ авун патал кьурумда,

²⁷ гьакӀни абурун эвледар чукӀурна халкьарин арада, абур кутун патал чара гьукумдик.

²⁸ Абур Багьал-Пеарак акахьна, кьенвай аллагьриз ганвай къурбандар нез хьана.

²⁹ Чпин краралди абуру хъел гъизвай Реббидиз, абур тӀегъуьндик акатна.

³⁰ Къарагъна Пингьас, дуван авуна, тӀегъуьн алатна.

³¹ И кар гьахъ-михьивал яз кхьена адаз ва адан эвледриз даим яз.

³² Мерибадин ятаривни абуру Адаз хъел гъанай, абур себеб яз азаб ганай Мусадиз,

³³ вучиз лагьайтӀа абуру адан руьгьдиз хъел гъанай, ада вичин сивелди кьил-кьилел алачир лагьана гаф.

³⁴ Чпикай Реббиди абуруз лагьай халкьар абуру терг авунач,

³⁵ абурук акахьна, гьабурун крар кьуна,

³⁶ гьабурун бутриз къуллугъ авуна, абур патал а бутар элкъвена чилиниз.

³⁷ Рухваярни рушар чпин иблисриз къурбандна;

³⁸ тахсир квачир экъична иви, чпин рухвайрин, рушарин иви, Къенандин бутриз къурбанд авур иви, чил чиркин хьана ивидалди.

³⁹ Чиркинна чеб чпин краралди, ява хьана чпи авур амалралди.

⁴⁰ Гьавиляй Реббидиз атай хъел халкьдикай Вичин акьван къатиз куькӀвена, Адаз Вичин ирс лап такӀан хьана.

⁴¹ Ада абур гъиле туна чара чилерин агьалийрин, абурал агъавал авуна абур такӀанбуру.

⁴² Абур душманри дарвиле твазвай, абурукай лукӀар ийизвай.

⁴³ Гзаф гъилера абур Ада хиласнай, амма абуру чпин терсвилив хъел гъизвай Адаз, чпин гунагьрай русвагьнай абур.

⁴⁴ ЯтӀани Ам килигзавай хажалатдиз абурун; абурун цӀугъ ван хьайила,

⁴⁵ абурухъ галаз кутӀуннавай Вичин Икьрар хкизвай рикӀел, Вичин зурба регьимдив кьадайвал абурун язух чӀугвазвай.

⁴⁶ Ада абурун язух къвез тазвай абур есирда кьунвай виридав.

⁴⁷ Куьмек це чаз, Ребби, Аллагь чи, вири халкьарин юкьвай чун акъуда чна шукур авун патал Ви пак ТӀварцӀиз, чна дамах авун патал Ви тарифар авунал.

⁴⁸ Шукур хьуй Ваз, я Ребби, Исраилдин Аллагь, асиррилай асиррал кьван! Вири халкьди лугьурай «Амин!» Тариф ая Реббидин!