Забур 103 - Пак Калам

Халикьдиз шукур авун

¹ Шукур ая, зи рикӀ, Реббидиз! Ребби, Аллагь зи, лап чӀехи я Вун ажайибдиз, баркаллани гьайбат алчук хьанва Вал.

² Вуна Вал экв алукӀнава, партал хьиз, пердеди хьиз, кьунва цавар,

³ На Жуван КӀвал эцигнава ятарал, циферикай дапураг ийизва Жуваз, къекъвезва гарун луварал алаз.

⁴ Гарарикай ийизва Вуна Жуван илчияр, куькӀвенвай цӀукай ийизва жуваз лукӀар.

⁵ Вуна чилин мягькем бине туькӀуьрна, садрани ян ада тагун паталди.

⁶ Лап эвелдилай авай гьуьл адал алчук хьана, либас хьиз, дагъларилайни кьакьан яз акъвазнай ятар.

⁷ Кьулухъди хъфена ятар Вуна абуруз гьарайдалди, Ви гугрумдин ван хьайила, абур кьулухъди хъфена.

⁸ Хкаж хьана дагъларал, эвичӀна дерейриз, Вуна чпиз гьазурнавай чкадиз.

⁹ Вуна эцигна абурун вилик элячӀ тежер часпарни, абурувай мад чил хкьаз техжервал.

¹⁰ Вуна вацӀар ракъурзава дерейриз, абур авахьзава дагъларин арайрай.

¹¹ Абуру яд гузва тамун ничхирриз, ана чпин къанихвал рекьизва вагьши ламари.

¹² Къваларив уьмуьр тухузва цаварин къушари, тарарин пешерай ван къвезва манийрин.

¹³ Жуван КӀваляй На яд гузва кӀунтӀариз; чил тух жезва майвайралди крарин Ви.

¹⁴ Вуна векь цана чӀехи ийизва малар паталди, къацу хъчар – хийир патал инсандин, ада чиляй вичиз тӀуьн акъудун патал,

¹⁵ чехирни, рикӀ шад ийидай инсандин, чӀемни, адан чинив нур гуз тадай, фуни, адан рикӀ мягькем ийидай.

¹⁶ Тух я тарар Реббидин, Либандин муьткверар Ада цайи,

¹⁷ чпин хилерал муг ийизвай къушари, шамагъаж тарар, леглегриз муг тир.

¹⁸ Кьакьан дагълар чӀурун цӀегьер патал я, рагар далда я япатӀ-къуьрериз.

¹⁹ Варцар къалурун патал эцигнава Ада варз, чизва ракъиниз вич акӀидай пад.

²⁰ ЭкӀязава мичӀивал На, алукьзава йиф, тамун ничхирар къекъвезва йифен хъендик.

²¹ Жегьил асланри чпин гъуьрчехъ гъугъ ийизва, тӀалабзава Аллагьдивай чпиз тӀуьн.

²² Рагъ экъечӀзава, абур санал кӀватӀ жезва, къаткизва чпин магъарада.

²³ ЭкъечӀзава инсан вичин кӀвалахдал, няналди зегьмет чӀугвазва ада.

²⁴ Ребби, вуч гзаф я Ви крарин сан! Абур вири Вуна Жуван камалдивди авуна: Вуна халкьай затӀарив чил ацӀанва.

²⁵ Ингье чӀехи ва гегьенш гьуьл, ана кьадар авач халкьай затӀариз, гъвечӀи, чӀехи гьайванриз.

²⁶ Ана гимийри ийизва сирнав, Ана къугъун паталди На халкь авур ава ана аждагьанни.

²⁷ Абуру Вун вилив хуьзва вирида, чпиз Вуна вахтунда тӀуьн гун патал.

²⁸ Вуна абуруз гузва – абуру къачузва, Вуна Ви гъил ахъа хьайила – берекатдив абур тух жезва.

²⁹ Вуна Ви чин чуьнуьхайтӀа, кьазва абур велвелади. Къакъуд авуртӀа абурун нефес, рекьида абур, элкъвез руквадиз.

³⁰ Абуруз Ви Нефес ракъурайтӀа, кӀвачел акьалтда, Вуна цӀийи хъийида чилин чин.

³¹ Реббидин баркалла хьурай датӀана, Шад хьурай Ребби Вичин крарал.

³² Килигзава Ам чилиз – зурзазва чил, ХкӀазва Ам дагъларик – абурай гум акъатзава.

³³ Лугьуда за мани Реббидиз аламай кьван гагьда зал чан. Манидалди тарифда за Аллагьдин зун амай кьван береда.

³⁴ Адаз зи фикирар виже къведайбур, хушбур хьуй: Реббидикай фикириз шад жеда зун.

³⁵ Гунагькарар квахьрай чилин винелай, небгетар тахьурай мад. Шукур ая, зи рикӀ, Реббидиз! Тариф ая Реббидин!