Забур 102 - Пак Калам

Аллагьдин регьимдикай

1 Давудан дуьа.

¹ Давудан дуьа. Шукур ая, Реббидиз, зи чанни зи рикӀ, Адан пак ТӀварцӀиз!

² Шукур ая, зи рикӀ, Реббидиз, алуд мийир рикӀелай хъсан крар Адан,

³ Ви гунагьрилай гъил къахчузвайдан, ви азарар вири сагъ хъийизвайдан,

⁴ ви уьмуьр сурукай хиласзавайдан, вал регьимдинни жумартвилерин таж эцигзавайдан,

⁵ хъсан затӀарив ви уьмуьр ацӀурзавайдан, ви жегьилвал, лекь хьиз, цӀийи хъхьун паталди.

⁶ Реббиди гьахъ ийизва, дуван ийизва зулумдик квай вирибур патал.

⁷ Ада вичин рехъ къалурна Мусадиз, Вичин крар Исраилдин халкьдиз къалурна.

⁸ Муьгьуьббатни сабур Реббидихъ ацӀанва, мергьеметни регьим ава Адаз.

⁹ ДатӀана хъел къведач Адаз, датӀана жедач хъел аваз.

¹⁰ Ада чаз чи чӀуру крарай эвез ганач, чи гунагьрай къвезвайди ганач.

¹¹ Чилин винел гьикьван кьакьан ятӀа цав, гьакьван Адан регьимни пара я Адакай кичӀебур патал.

¹² РагъэкъечӀдай пад рагъакӀидай патавай гьикьван яргъа ятӀа, гьакьван яргъа авунва Ада чакай гунагьар чи.

¹³ Бубади вичин аялриз регьим ийирвал, гьакӀ Реббиди регьимзава Вичикай кичӀе тирбуруз,

¹⁴ куьз лагьайтӀа чизва Адаз чун куькай ятӀа, рикӀел алама чун руг тирди.

¹⁵ Инсандин йикъар векь хьиз я. Ада чуьлдин цуькведи хьиз цуьк гъида,

¹⁶ фида адан винелай гар, амач ам, садазни чир хъжедач ам гьинал алайтӀа.

¹⁷ Амма даим яз Реббидин регьим гала кичӀебурухъ Адахъай, Адан гьахъвал ала аялрални хтулрал –

¹⁸ хуьзвайбурал Адан Икьрар, Адан тагькимар рикӀел хуьзвайбурал, абур кьилиз акъудун паталди.

¹⁹ Реббиди Вичин тахт эцигнава цаварал; Адан пачагьлугъди агъавал ийизва виридал.

²⁰ Шукур ая Реббидиз, Адан малаикар, къуват авайбур, Адан эмирар кьилиз акъудзавайбур, Адан ванциз яб гузвайбур.

²¹ Шукур ая Реббидиз, Адан кьушунар, Адан къаст кьилиз акъудзавай къуллугъэгьлияр Адан.

²² Шукур ая Реббидиз, Ада халкьай вирибур, Ада агъавалзавай чкайра вири. Шукур, зи рикӀ, Реббидиз!