Юнус 4 - Пак Калам

Юнус пайгъамбардин наразивал

¹ И карди Юнус пайгъамбардиз гзаф хъел гъана.

² Ада Реббидиз дуьаярна, лагьана: «Я Ребби! Бес за зи уьлкведа авайла лагьайдини гьа и гафар туширни? Зун Таршишдизни гьавиляй катайди я, вучиз лагьайтӀа заз чизвай хьи, Вун – хъсан, рикӀ регьимлу, яргъалди сабур хуьдай, гзаф мергьяматлу Аллагь я ва Вуна мусибат ийиз кӀан хьуникай гьайиф чӀугвада.

³ Гилани, я Ребби, завай зи чан къачу, вучиз лагьайтӀа заз яшамиш жердалай кьейитӀа хъсан я».

⁴ Реббиди лагьана: «И карди ваз гьакьван кӀевиз хъел гъанвани мегер?»

Аллагьди Юнусан батӀулвал къалурзава

⁵ Юнус шегьердай экъечӀна ва шегьердин рагъэкъечӀдай пата акъвазна, ана вичиз кума авуна ва анай шегьердин кьилел вуч къведатӀа килигиз, кумадин сериндик ацукьна.

⁶ Ребби-Аллагьди са кьен экъечӀдайвал авуна, ам Юнусан винел серинвал жедайвал ва адан хъел алудун патал адан кьилелай хкажна; Юнус и кьенцӀел гзаф шад хьана.

⁷ Ахпа Аллагьди акӀ авуна хьи, гуьгъуьнин юкъуз, пакаман яр ядайла, а кьен кукра тӀуьна, набатат кьурана.

⁸ Рагъ экъечӀдайла, Аллагьди рагъэкъечӀдай патан зегьемлу гар ракъурна, ракъини Юнусан кьил ифириз хьана, ам вич вичелай фена, ада вичиз ажал гун тӀалабна ва лагьана: «Заз яшамиш хьунилай кьейитӀа хъсан я».

⁹ Аллагьди Юнусаз лагьана: «А кьен кьуруникай ваз гьакьван хъел атанани мегер, ажал кӀан жедай кьван?»

¹⁰ А чӀавуз Реббиди лагьана: «Вуна жува зегьмет чӀугун тавуна экъечӀай ва вуна чӀехи тавур, вич са йифиз экъечӀай ва са йифиз кьурай кьенцӀин гьайиф чӀугвазва;

¹¹ Бес За чпиз эрчӀи гъилни чапла гъил гьим ятӀа чара ийиз тежедай вишни къад агъзурдалай гзаф инсанар ва гзаф кьадар гьайванар авай чӀехи шегьердин гьайиф чӀугвадачни?»