Юнус 2 - Пак Калам

АкьалтӀай бедбахтвиле авур дуьа

¹ Реббиди са зурба балугъдиз Юнус пайгъамбар туькьуьн ая лагьана. Ам пуд юкъузни пуд йифиз балугъдин руфуна амукьна.

² Ада балугъдин руфунай вичин Аллагь Реббидиз дуьаяр ийиз хьана

³ ва лагьана: «Жуван хажалатда за Аллагьдиз дад-бидадна, Ваз минетрин ван хьана зи; эхиратдин къеняй за цӀугъ авуна – Вазни зи ван атана.

⁴ Гьуьлуьн рикӀиз дериндиз вегьена На зун, селлери зун юкьва туна, элкъуьрна, Ви ятарин лепеяр зи винелай физ хьана.

⁵ За лагьана: „Хкатнава зун Ви вилерикай“, амма заз мад Ви пак мескен ахквада.

⁶ Ви ятар зал алчуд хьана нефес къаз, гургусди зун кьуна кӀевиз чуькьвена, аруш хьана зи кьил гьуьлуьн векьера.

⁷ ЭвичӀна зун лап дибдал кьван дагъларин, даим яз зун туна чили дапӀарра, амма Вуна, эй зи Аллагь, зи Ребби, зи руьгь кьуна эхиратдай ахкъудна.

⁸ Зи къене руьгь михьиз гьалдай фенвайла, хтана зи рикӀел Ребби, Вав зи дуьа агакьна, агакьна пак мескендив.

⁹ Тапан аллагьриз гьуьрметзавайбур инанмиш туш рикӀ регьимлу Аллагьдихъ.

¹⁰ За алхишрин ван хкажна Ваз къурбандар ийида; хиве кьурди кьилизни за акъудда. Къутармишдайди тек са Ребби я!»

¹¹ Реббиди балугъдиз Юнус къецел къураматдал ахкъуда лагьана буйругъна.