Юнус 1 - Пак Калам

Пайгъамбардиз гайи буйругъ

¹ Амитаян хва Юнусав Реббидин гаф агакьна:

² «Къарагъ, чӀехи шегьер Ниневиядиз алад! Заз адан агьалийрин чӀуру крарикай ван хьана. Вуна абуруз акси яз вязер ая!»

³ Реббидин вилерикай Таршишдиз катун патал Юнус къарагъна, Яфадиз фена, ана адаз Таршишдиз физвай гими жагъана. Реббидин вилерикай Таршишдиз катун патал ам, фидай рекьин гьакъини гана, гимидиз акьахна.

Гьуьлеллай ксари чувуддиз абурар гузва

⁴ Амма Реббиди гьуьлел къати гар къарагъарна, зурба тӀурфан акьалтна ва гими кукӀвар жез са тӀимил амай.

⁵ Гимичийриз кичӀе хьана, гьарда вичин аллагьриз минетарна ва гими хатадикай хкудун патал пар гьуьлуьз гадариз хьана; Юнус, лагьайтӀа, гимидин кӀане авай са кӀвализ эвичӀна, ярх хьана, кӀеви ахвариз фенвай.

⁶ Адан кьилив гимидин чӀехиди атана ва адаз лагьана: «Вун вучиз ксанва? Къарагъ, жуван Аллагьдиз минет ая; белки, Аллагьди чун рикӀел хкин ва чун телеф тежен».

⁷ Абуру сада садаз лагьана: «Ша, чна, низ килигна и бедбахтвал чи кьилел атанвайди ятӀа, чирун патал, чип вегьин». Чип вегьена, ам Юнусал аватна.

⁸ Гьа чӀавуз адаз лагьана: «Низ килигна чи кьилел и бедбахтвал атанвайди я? Ви кар-пеше вуч я, вун гьинай атанвайди я? Ви уьлкве гьина ава, вун гьи халкьдикай я?»

⁹ Юнуса абуруз лагьана: «Зун чувуд я, за гьуьлни къурамат халкьнавай цаваравай Аллагьдикай-Реббидикай вил язва».

¹⁰ Инсанрик зурба кичӀевал акатна, абуру Юнусаз лагьана: «Вуна вучиз икӀ авуна?» Вучиз лагьайтӀа абуруз, Юнуса вичи малумарнавайвал, ам Реббидин вилерикай катзавайди чир хьана.

¹¹ Гьавиляй абуру адаз лагьана: «Гьуьлуь чун секиндиз тун патал, чна ваз вуч ийин?» Гьар гьикӀ ятӀани гьуьлуьн лепейрин къативал элекьзавачир.

¹² Гьа чӀавуз Юнуса абуруз лагьана: «Зун кьуна гьуьлуьз гадара, куьн патал гьуьл секин жеда, вучиз лагьайтӀа заз чизва хьи, куь кьилел и чӀехи тӀурфан заз килигна атанвайди я».

¹³ ЯтӀани и инсанри, къерехдив агакьун патал вири къуват эцигна кьусуйралди яд хчализ гатӀунна, амма абурувай жезвачир, вучиз лагьайтӀа абуруз акси яз гьуьлуь вичин къативал авун давамарзавай.

¹⁴ Гьа чӀавуз абуру Реббидиз дад-бидат авуна лагьана: «Минет хьурай Ваз, Ребби, чна и са касдин чан къачуна лугьуз чун рекьидайвал ийимир, тахсир квачир иви авадарна лугьуз чак тахсир кутамир, вучиз лагьайтӀа Вуна, Ребби, Ваз гьикӀ хьана кӀанзаватӀа, гьакӀ ийизва».

¹⁵ Абуру Юнус кьуна гьуьлуьз гадарна; пехъи гьуьл секин хъхьана.

¹⁶ А инсанриз Реббидихъай зурбадаказ кичӀе хьана, абуру Реббидиз къурбандар гана ва вядер хиве кьуна.