Якьуб 2 - Пак Калам

Са пад кьаз алахъмир

¹ Зи стхаяр-вахар, Иса Месигьдихъ, баркалла алай чи Реббидихъ, ийизвай иман аваз хьуналди, са инсанар муькуьбурун вилик вине кьун тахьуй.

² Лугьун хьи, куьн кӀватӀ жезвай кӀвализ багьа парталар алай, тупӀухъ къизилдин закӀал галай касни кесиб ва чиркин парталар алай кас къведа.

³ Куьне багьа парталар алайдаз килигна «Ша, буюр, ацукь и хъсан чкадал» лагьайтӀа, амма кесибдиз «Гьанал акъваз» ва я «Инал, зи кӀвачерив, ацукь» лагьайтӀа,

⁴ куьне, чӀуру фикирар авай дуванбегриз элкъвена, садбур муькуьбурун вилик вине кьазвачни бес?

⁵ Яб це, играми зи стхаяр-вахар, Аллагьди и дуьньяда кесибар хкянавачни мегер – абур имандалди девлет авайбур жедайвал ва абурукай Ада Вич кӀанибуруз хиве кьур Пачагьлугъдин ирссагьибар жедайвал?

⁶ Куьне лагьайтӀа, кесибдиз нифрет ийизва. Куьн зулумдик кутазвайбур ва куьн дуванриз чӀугвазвайбур девлет авайбур тушни мегер?

⁷ Квел алай иер ТӀвар русвагьзавайбур гьабур тушни мегер?

⁸ Куьне рикӀивайни, «Жув хьиз жуван мукьув гвайдини кӀан хьухь» кхьенвайвал, Къанундин кьилин къарардал амал ийизватӀа, куьне дуьз кар ийизва.

⁹ Амма куьне садбурун вилик муькуьбур вине кьазватӀа, куьне гунагь ийизва, ва Къанунди куьн тахсиркарар яз винел акъудзава.

¹⁰ Вири Къанундал амал ийиз, амма са карда гунагь ийидайдак вири Къанун чӀуру авунин тахсир ква.

¹¹ «Зинавал ийимир» лагьайда «Ягъна рекьимир» гафарни лагьанва. Вуна зинавал ийизвачтӀа, амма яна рекьизватӀа, вакай Къанун чӀурзавайди хьанва.

¹² АкӀ рахух ва акӀ ая хьи, гуя азадвал гузвай къанундалди, яни Шад Хабардалди куь дуван авун гьеле вилик кумайди хьиз.

¹³ Регьим къалур тийизвайбуруз дувандини регьим ийидач. Регьим авайдаз дувандал Аллагьди инсаф ийида!

Иман ва крар

¹⁴ Зи стхаяр-вахар, инсанди вичихъ иман ава лугьузватӀа, амма адав кьур крар авачтӀа, идакай вуч хийир ава? Ихьтин имандивай ам хиласиз жедани?

¹⁵ Стхадихъ ва я вахахъ партал ва тӀуьн авачтӀа,

¹⁶ ва квекай са ни ятӀани абуруз, «Саламатдиз фена жуваз чим акъуда ва тух жедалди неъ» лагьана, чпин муьгьтежвал авай са затӀни тагайтӀа, идакай вуч хийир ава?

¹⁷ Иманни гьакӀ я: адахъ крар галачтӀа, ам кьенвайди я.

¹⁸ Амма мумкин я, са ни ятӀани лугьун: «Садахъ иман ава, муькуьдахъ – крар». – «ГьакӀ ятӀа, заз крар галачир ви иман къалура. Амма завай ваз краралди зи иман къалуриз жеда.

¹⁹ Аллагь сад тирдахъ вуна иман ийизва, им хъсан кар я. Амма чӀуру жинерни имандал ала ва зурзазва».

²⁰ Крар галачир имандикай хийир авачирди чир жез кӀандани ваз, я акьул авачир инсан?

²¹ Вичин хва Исакь къурбангандал эцигунай чи бан-буба Ибрагьим адан крарин нетижа себеб яз гьахъ-михьивилиз акъудначирни бес?

²² Адан иман ва адан крар къакъат тийиз сад садахъ галаз галкӀанвайбур тирди ваз аквазва, иллаки адан краралди адан иман вичин тамамвилив агакьна.

²³ Гьа икӀ Каламда авай ихьтин гафар кьилиз акъатна: «Ибрагьима Аллагьдихъ иман авуна, им адан гьахъ-михьивал яз кьабулнай». Ибрагьимаз Аллагьдин дустни лагьанай.

²⁴ Са иман себеб яз ваъ, крарни себеб яз инсан гьахъ-михьивилиз акъудзавайди квез аквазва.

²⁵ Жасусар хушуналди кьабулна, абур маса рекьяй тӀуз ракъурай чӀавуз къагьбе Рагьаб адан крар себеб яз гьахъ-михьивилиз акъудначирни бес?

²⁶ ГьакӀ хьайила, руьгь галачир беден кьенвайди жедайвал, крар галачир иманни кьенвайди жеда.